Чарговыя віншаванні з працоўнымі дасягненнямі зноў прымалі рассветаўцы: старшы камбайнер Валерый Піскуноў і камбайнер Ігар Гаўрылюк, вадзіцель Аляксандр Белы.

На рахунку экіпажа збожжаўборачнага камбайна на момант віншавання было ні многа ні мала – 2 тысячы тон намалочанага збожжа. Яны першымі ў гаспадарцы і ў раёне дасягнулі такога выніку!

Станаўленне Валерыя Піскунова як прафесіянала хлебаробскай справы адбывалася спачатку на палях калгаса Ільіча, затым – калгаса імя Кірава. І ўжо больш 15 гадоў шчыруе Валерый Раманавіч у “Рассвеце”. Сваім працоўным вопытам ён дзеліцца з моладдзю, таму ўпэўнены, што яго напарнік Ігар Гаўрылюк у хуткім часе будзе дастойным канкурэнтам лепшым камбайнерам. А сёння сплаў вопыту і маладосці дае свае вынікі…

На працягу ўсяго жніва ў ліку лідараў і вадзіцель Аляксандр Белы. На момант ушаноўвання ён перавёз ад камбайнаў 3 тысячы тон збожжа.
У гаспадарцы Аляксандр працуе ўсяго год, але адказнасць і стараннасць дазволілі яму дасягнуць такіх вынікаў. Наогул жа, за яго плячамі больш 15 гадоў вадзіцельскага стажу. У Мышкавічы ён пераехаў з Мінска, дзе працаваў у аўтобусным парку. Свежае паветра, зямля, адным словам, вяскавае жыццё ўзяло верх, пераманіла маладога чалавека са сталіцы, куды ён пераехаў з Расіі. Сваім выбарам і жыццёвымі зменамі Аляксандр Віктаравіч задаволены. Чаму менавіта Мышкавічы? Адказ просты: сюды пераехалі яго бацькі.

…Лёгкай перамогі на хлебнай ніве не бывае. Патрэбна нечым ахвяраваць: вольным часам, нават сном, зносінамі з роднымі… Цана таму – вага будучага караваю, харчовая бяспека краіны, сямейны дабрабыт. Пры тым хлебаробы добра разумеюць, што іх перамога – гэта перамога ўсіх земляробаў гаспадаркі. А яшчэ ва ўсім гэтым вялікая заслуга тых, хто чакае іх дома…

У адрас герояў жніва гучалі словы віншавання і ўдзячнасці за працу, пажаданні далейшых поспехаў у хлебаробскай справе, ім таксама былі ўручаны падарункі.

Тым часам на мінулым тыдні працэс папаўнення атрада камбайнераў і вадзіцеляў, якія дабіліся знакавых рубяжоў на сёлетнім жніве, не спыняўся. Літаральна штодня хтосьці дабаўляўся ў кагорту перадавікоў, адзначыўшыся працоўнымі дасягненнямі. І зноў вызначыліся рассветаўцы-вадзіцелі. Сяргей Цмыг і Сяргей Іваніцкі дасягнулі новай высокай планкі – цяпер у 3000т перавезенага ад камбайнаў збожжа. У ААТ “Дабаснянскае” тысячнага намалоту дабіўся экіпаж у саставе Алега Сосава і Максіма Голубева, а вадзіцель Яўген Кавалёў на МАЗ-555142 перавёз ад камбайнаў больш за тысячу тон збожжа.
Такога ж рубяжу дабіліся хлебаробы КСУП “Жылічы” Уладзімір Бычкоў і Алег Сазонаў. А вадзіцель Валерый Кісялёў стаў тысячнікам на малапад’ёмнай аўтамашыне САЗ. Перадавікі на жніве не засталіся па-за ўвагай. Іх прама ў полі віншавалі прадстаўнікі раённай улады, раённай прафсаюзнай арганізацыі работнікаў АПК, кіраўніцтва і прафкамаў сельгасарганізацый.

Галіна РУСЕЦКАЯ, Аляксандр ХАХЛОЎ.
Фота Сяргея АЧЫНОВІЧА.