Лета для аграрыяў – гарачая пара: поўным ходам ідзе ўборка ўраджаю, нарыхтоўка кармоў… Адказны летні перыяд і ў жывёлагадоўлі. Яшчэ яго называюць перыядам вялікага малака. Жывёлагадоўля круглы год робіць “надвор’е” ў дачыненні да папаўнення грамадскай касы. Мы пацікавіліся ходам спраў у галіне. А для рэдакцыйнага візіту выбралі аб’ект “наўгад” – пальцам у карту раёна: трапілася малочнатаварная ферма “Ізабеліна” КСУП “Ніва-Барсукі”. Аб рабоце мясцовых жывёлаводаў і ў цэлым у сельгасарганізацыі нам расказаў намеснік дырэктара Сяргей Гур’янаў.

Спачатку спынімся якраз на агульных паказчыках гаспадаркі, якія, да слова, знаходзяцца ў дынаміцы росту. Валавы надой за студзень – люты бягучага года дасягнуў 5159 тон, што ў параўнанні з годам мінулым складае 108,9%. Кожная ніваўская рагуля з пачатку года ў сярэднім дала па 3696 кг малака, што больш, чым летась на 137 кг. Таварнасць гэтай каштоўнай прадукцыі – 93%. Варты адзнакі той факт, што ўсё малако пастаўлена на перапрацоўку гатункам “экстра” – найвышэйшай якасці.

І з вырошчваннем мяса ў сельгасарганізацыі – як мае быць. Яго вытворчасць за студзень – ліпень склала 424,9 т, і гэта на 3,2% больш, чым за гэты ж перыяд мінулага года. Узраслі і сярэднясутачныя прывагі жывёлы: зараз яны дасягаюць 674 г, што больш, чым у студзені – ліпені мінулага года на 39 г.

Ферма “Ізабеліна” кампактная. Узнікла на месцы былога комплексу па вырошчванні авечак – была калісьці ў раёне і такая вытворчасць. У пачатку нулявых гадоў з дапамогай дзяржавы аб’ект мадэрнізавалі. Асноўная вытворчасць зараз тут накіравана на атрыманне малака. У дойным стаку налічваецца 318 кароў, якія размешчаны ў двух хлявах, а ўсяго на ферме 759 галоў. Ёсць цялятнік і радзільнае аддзяленне. Для маладняка групы дарошчвання ад 6 месяцаў і больш з былога сенасховішча было зроблена ўтульнае памяшканне, дзе цялушкі зараз выдатна сябе адчуваюць. Ды і ў вазе прыбаўляюць няблага – у сярэднім па 869 грамаў у суткі. Амаль не адстаюць у вазе і маленькія цяляткі – ад нараджэння да 2-3 месяцаў: іх сутачныя прывагі складаюць па 838 грамаў.

Калі гаварыць аб надоях і прывагах, то заслугу ў іх атрыманні трэба адрасаваць мясцовым жывёлаводам. Наогул неабходна адзначыць, што калектыў на ферме, якім умела кіруе Алена Малахоўская, падабраўся дружны, а кожны работнік працуе з пачуццём высокай адказнасці. І вытворчыя паказчыкі ад іх сумленнага стаўлення да справы не прымушаюць сябе чакаць. З пачатку года мясцовыя аператары машыннага даення паставілі дзяржаве 1324 тоны малака, і гэта больш, чым яны надаілі летась за такі ж перыяд, на 36 тон. А кожная з іх дойных падапечных дала па 4270 кілагарамаў. Старанна працуюць з імі, даглядаюць і абслугоўваюць іх аператары Ганна Рымарава, Надзея Рыдзеўская, Анастасія Жарына. Дарэчы, апошняя з гэтага шэрагу не так даўно працуе на ферме. Але як якасна! Адметна, што дагэтуль жанчына жыла ў Бабруйску. А вось прызванне гараджанка знайшла ў сельскай мясцовасці. Хутка праявіла сябе ў прафесіі і зараз паказвае выдатныя вынікі, нібыта пражыла ўвесь час ў вёсцы.

Добрых слоў заслугоўвае стаўленне да прафесійных абавязкаў і іншых работнікаў жывёлагадоўчага аб’екта. Не дапускае тэхнічных непаладкаў у абсталяванні аператар Мікалай Іваноў, усе аналізы прадукцыі якасна і своечасова праводзіць лабарант Аксана Сямёнава, уважліва сочыць за статкам на выпасе Сяргей Шпак.

Стараннасць даглядчыкаў – высокія прывагі цялятак. Гэты працэс уважліва кантралююць Дзіна Русаўская, Святлана Дырыкава, Таццяна Борэк, Надзея Прыгунова.

У чым сакрэт такой работы і такога выніку? Мяркуйце самі. Заработная плата – ад 2 тысяч рублёў і вышэй. Толькі яе трэба менавіта зарабіць – дасягаць росту вытворчасці. А гэта не церпіць “прахалоджвання”. А яго і няма! Яшчэ сяброўскае стаўленне членаў калектыву адзін да аднаго – кожны дапаможа, падкажа, падстрахуе. І такое ж стаўленне да кожнага работніка з боку кіраўніцтва: ніхто не застаецца без вырашэння хвалюючага пытання. Усё разам – і ёсць складаемыя агульнага поспеху.

Нельга не спыніцца і на корманарыхтоўцы ў сельгасарганізацыі. Ад таго, як наладжана зялёнае жніво, у многім залежыць мясамалочная прыбаўка на працягу года, ад чаго, варта паўтарыцца, залежыць эканамічная трываласць гаспадаркі. Пакуль мы знаходзіліся на ферме ў Ізабеліна, на сянажнай траншэі (чарговай) не застойваўся рабочы працэс. Адзін за адным сюды прыязджалі трактары і самазвалы са здрабнёнай зялёнай масай, разгружаліся і адпраўляліся ў чарговы рэйс. На пагрузчыку “Амкадор” умела трамбаваў будучы корм механізатар Сяргей Няфёдаў. Для агульнага пагалоўя буйной рагатай жывёлы ў 4314 галоў, з якіх 1393 – дойны статак, – ужо нарыхтавана 12328 тон сенажу. На кожную галаву назапашана па 12,3 ц к. адз. Паралельна нарыхтоўваецца сена. А на падыходзе – сакавітая кукуруза, з якой атрымаецца выдатны сілас. Мясцовы статак будзе мець кармавы дастатак.

Аляксандр ХАХЛОЎ. Фота аўтара.