На базе КСУП “Барчыцы-агра” прайшоў штогадовы раённы конкурс аператараў па штучным асемяненні буйной рагатай жывёлы, арганізаваны ўпраўленнем па сельскай гаспадарцы і харчаванні райвыканкама сумесна з ДУСВП «Магілёўскае дзяржплемпрадпрыемства» і яго філіялам па Кіраўскім раёне.

Галоўнае прызначэнне конкурсу – павышэнне прафесійнага майстэрства і павелічэнне прэстыжу адной з самых запатрабаваных у жывёлагадоўчай галіне прафесій. Акрамя таго, лепшыя прадстаўнікі атрымліваюць павышэнне класнасці, што станоўча ўплывае на заробкі.

На малочнатаварных комплексах і фермах раёна працуе 24 тэхнікі-асемянатары, удзел у конкурсе прынялі 18. Ацэньвала веды і навыкі канкурсантаў кампетэнтнае журы, у склад якога ўвайшлі начальнік аддзела па ўзнаўленні ДУСВП «Магілёўскае дзяржплемпрадпрыемства» Алена Маслак і начальнік біятэхналагічнага аддзела Марына Галафаст, начальнік філіяла ДУСВП «Магілёўскае дзяржплемпрадпрыемства» па Кіраўскім раёне Галіна Шкрабава.
Са словамі прывітання да ўдзельнікаў конкурсу звярнулася першы намеснік начальніка ўпраўлення па сельскай гаспадарцы і харчаванні райвыканкама Антаніна Смятана. Яна адзначыла, што прафесія тэхніка па штучным асемяненні БРЖ – адна з самых важных у жывёлагадоўлі. Менавіта ад работы гэтых спецыялістаў залежыць будучы патэнцыял малочнага статка сельгаспрадпрыемства: вышэйшы выхад цялят, большыя надоі.

Па яе словах, у тых гаспадарках, дзе ёсць кваліфікаваныя, адданыя сваёй справе спецыялісты, як правіла, на высокім узроўні пастаўлена работа па ўзнаўленні статка. Там заўсёды ёсць паспяховыя расцёлы, высокая захаванасць маладняку, ёсць малако і мяса, а ў канчатковым выніку – стабільнае развіццё эканомікі гаспадаркі, дабрабыт працаўнікоў.

Конкурс складаўся з тэарэтычнай і практычнай частак. Майстэрства ўдзельнікаў члены камісіі ацэньвалі па некалькіх крытэрыях: правяралі веды тэхнікаў-асемянатараў па пытаннях правільнай арганізацыі іх працоўнага месца, падрыхтоўкі інструментаў да асемянення, адтайвання і вызначэння якасці семені пад мікраскопам, ацэньвалі правільнасць вядзення журналаў ацёлаў і іншай дакументацыі, а таксама навыкі асемянення буйной рагатай жывёлы. Браліся ў разлік і вынікі практычнай работы.

Варта адзначыць, што з кожным годам канкурсанты дэманструюць усё больш трывалыя і дасканалыя веды, практычныя навыкі. І, канешне ж, немалаважную ролю адыгрывае пэўны вопыт работы ў прафесіі.

І хаця строгае журы за любую памылку зніжала балы, агульныя вынікі ведаў, прадэманстраваныя тэхнікамі-асемянатарамі, аказаліся даволі высокімі.
Падвядзенне вынікаў праходзіла ўрачыста. Алена Маслак адзначыла добрую падрыхтоўку і навыкі канкурсантаў і падкрэсліла, што ў гэтай прафесіі павінны быць людзі, адданыя ёй цалкам, якія разумеюць усю важнасць свайго ўкладу ў справу развіцця жывёлагадоўлі.
Па выніках конкурсу – па колькасці набраных балаў за правільныя адказы па тэорыі, дэманстрацыю практычных навыкаў і вынікі работы за мінулы год пераможцай прызнана Таццяна Шчэрбіч з СВК “Бераснёўскі” ААТ “Упраўляючая кампанія холдынга “Бабруйскаграмаш”, другое месца ў Васіля Фядотава з КСУП “Барчыцы-агра”, трэцяе – у Віталя Бяляўскага з ААТ “Рассвет імя К.П.Арлоўскага”. Дарэчы, Таццяна Шчэрбіч і Васіль Фядотаў на працягу апошніх гадоў у гэтым конкурсе заўсёды ўваходзяць у тройку лідараў, гэта сведчыць аб адказнасці і стараннасці спецыялістаў, трывалых ведах і адданасці сваёй справе.

Антаніна Смятана павіншавала пераможцаў з добрымі вынікамі і ўручыла ім каштоўныя падарункі.
Усім удзельнікам конкурсу таксама былі ўручаны падарункі ад раённага аграпрамысловага саюза БелАПС, райкама прафсаюза работнікаў АПК, ад перапрацоўчых прадпрыемстваў Магілёўшчыны, з якімі супрацоўнічаюць сельгасарганізацыі раёна.

Людміла СЯМЁНАВА.
Фота аўтара.