У рамках рэспубліканскай дабрачыннай акцыі «Ад усёй душы» старшыня райвыканкама Галіна Слабоднікава і намеснік старшыні райвыканкама Таццяна Бяляўская павіншавалі з юбілеем Ганаровага грамадзяніна Кіраўскага раёна кіраўчанку Надзею Каранкевіч.

Жыццёвы і працоўны шлях гэтай жанчыны – прыклад працавітасці, сумленнасці і прынцыповасці. Многія, каму давялося працаваць з Надзеяй Аляксееўнай, адзначаюць, што яна валодае такімі рысамі характару, як дабрыня, ветлівасць, неабыякавасць.
Родам Надзея Каранкевіч з Расіі. У Беларусь пераехала ў пачатку 1980-х гадоў пасля таго, як выйшла замуж за кіраўчаніна. Жанчына неаднойчы адзначала, што Кіраўшчына стала для яе другой Радзімай, самым любімым куточкам на зямлі.

У 1981 годзе пасля заканчэння Беларускай сельскагаспадарчай акадэміі Надзея Каранкевіч пачала працоўны шлях у Кіраўскім раёне з пасады галоўнага эканаміста калгаса імя Свярдлова, затым працавала эканамістам, галоўным спецыялістам, начальнікам аддзела эканомікі, намеснікам старшыні райвыканкама, з 2010 года была старшынёй раённага Савета дэпутатаў. З гэтай пасады пайшла на заслужаны адпачынак.

Надзея Каранкевіч прад’яўляла высокую патрабавальнасць, якаснае стаўленне ў рабоце да сябе і іншых, цаніла ў людзях прынцыповы падыход да вырашэння пытанняў і прыстойнасць. Як дэпутат, уважліва ставілася да заяў і патрэб грамадзян.

Падчас віншавання з юбілеем, Галіна Слабоднікава адзначыла, што Надзея Каранкевіч унесла значны ўклад у добраўпарадкаванне горада і сельскіх населеных пунктаў раёна. Прысваенне ёй звання «Ганаровы грамадзянін Кіраўскага раёна» – гэта шчырая прызнанасць жыхароў Кіраўшчыны за ўклад у развіццё рэгіёна і ўвагу да яго жыхароў.

З нагоды юбілейнай даты, за плённую дзяржаўную і грамадскую дзейнасць Галіна Слабоднікава ўручыла віноўніцы ўрачыстасці Ганаровую грамату раённага Савета дэпутатаў, падарункі і, вядома ж, прыгожай жанчыне – прыгожы букет чырвоных руж.

Яўгенія БЯЛЬКО.
Фота аўтара.