Сярод шматлікіх мерапрыемстваў, якія плануюцца правесці ў Год культуры, пэўная частка бу-дзе накіравана на папулярызацыю беларускай мовы, а таксама выхаванне патрыятычнай самасвядомасці грамадзян.

Любоў да сваёй Радзімы пачынаецца з любові да роднай мовы. Менавіта яна аб’ядноўвае нас у народ, які носіць прыгожае імя —  беларусы.

Родны край, родная зямля, родная мова… Гэта тое невычэрпнае багацце, якое перадаецца ў беларусаў ад дзядоў і прадзедаў.

Толькі родная мова натхняе нас на высакародныя ўчынкі, будзіць у сэрцах патаемную памяць і ў цяжкія хвіліны штурхае на самаахвярнасць. У родным слове для народа заключаецца ўсё: гісторыя мінулага, таямнічасць будучага, дзень учарашні, сённяшні і заўтрашні, яно здольнае лячыць душу чалавека, захоўваць памяць аб гісторыі свайго народа, у выпадку неабходнасці — аб’ядноўваць на абарону сваёй Радзімы.

Пра мову беларусы шаноўна і ласкава гавораць “родная мова”, “матчына мова”, “мова бацькоў і дзядоў”.

Нашы продкі нямала зрабілі, каб беларуская мова была прызнана як роўная сярод іншых моў свету. А таму, наш святы абавязак падтрымаць, захаваць і зберагчы “матчыну мову”, перадаючы яе з пакалення ў пакаленне. Мова — як жывая тканка, прырастае там, дзе крынічыць людское жаданне.