З мэтай фарміравання ў падрастаючага пакалення грамадзянска-патрыятычных пачуццяў сродкамі экскурсійнай музейнай дзейнасці ва ўстановах адукацыі прайшоў рэспубліканскі конкурс юных экскурсаводаў музеяў устаноў адукацыі.

Актыўны ўдзел у конкурсе прынялі і вучні нашага раёна. А Лізавета Пятруша, вучаніца 9 класа Мышкавіцкай СШ, стала пераможцам абласнога этапа конкурсу, які складаўся з двух тураў. Спачатку Лізавета прадставіла аглядную анлайн-экскурсію па мемарыяльным музеі К.П.Арлоўскага. Яна пазнаёміла журы з музеем установы адукацыі, з яго адметнасцямі. У другім туры з 10 прадстаўленых установай адукацыі музейных экспанатаў дзяўчына адразу распрацавала і прадставіла імправізаваную экскурсію «Гісторыя аднаго экспаната» на аснове выбранага журы экспаната – шкатулкі-сувеніра (1956 года выпуску) ад Якава Вігдорчыка, рабочага завода імя Кулакова, Кірылу Арлоўскаму.

Поспех Лізаветы – гэта і поспех кіраўніка школьнага музею, настаўніка гісторыі Наталлі Аляксандраўны Шчэрбіч, якая дапамагала вучаніцы ў падрыхтоўцы да конкурсу.
Па выніках удзелу ў фестывалі Лізавета ўзнагароджана дыпломам лаўрэата Міністэрства адукацыі Рэспублікі Беларусь.

Інфармацыйная даведка

Мемарыяльны музей К.П.Арлоўскага быў адкрыты 7 снежня 2003 года. Стваральнік музея – Ніна Уладзіміраўна Бяляўская, настаўнік гісторыі і грамадазнаўства. Значны ўклад у развіццё музея ўнёс былы настаўнік дапрызыўнай падрыхтоўкі Аляксей Леанідавіч Абросімаў. Плошча музея – 17 м2. Музейны фонд налічвае 483 экспанаты.

Найбольшую цікавасць з экспанатаў музея ўяўляюць шкатулка-сувенір – падарунак Кірылу Арлоўскаму ад Якава Вігдорчыка, рабочага завода імя Кулакова; страва-сувенір ад КНР; тэлевізар “Беларусь-110” чорна-белы з радыёпрыёмнікам і радыёлай; гадзіннік настольны; слыхавыя акуляры; альбом асабістай перапіскі Героя Савецкага Саюза, Героя Сацыялістычнай Працы К.П.Арлоўскага.
У музеі знаходзяцца асабістыя рэчы К.П.Арлоўскага, падарункі ад дэлегацый, якія прыязджалі ў «Рассвет», узнагароды легендарнага старшыні калгаса, прадметы перыяду Вялікай Айчыннай вайны. Тут размешчана экспазіцыя “Жыццё, аддадзенае людзям”, якая прадстаўлена ў выглядзе стэндаў з фотаздымкамі з жыцця Кірылы Арлоўскага, яго працоўнай дзейнасці, уздыму і будаўніцтва калгаса «Рассвет».