Традыцыйна 22 чэрвеня ў Дзень усенароднай памяці ахвяр Вялікай Айчыннай вайны праводзіцца абласная маладзёжная акцыя “Звон смутку”, наладжваюцца вахты Памяці, іншыя патрыятычныя акцыі, інфармацыйныя гадзіны. Лейтматыў акцыі: «Спыніся, памаўчы, паслухай журботны  званоў, ушануй памяць загінуўшых, успомні аб іх гераічным подзвігу ў імя жыцця будучых пакаленняў…»

Ля памятнага знака, устаноўленага ў райцэнтры ў гонар 60-годдзя вызвалення раёна ад нямецка-фашысцкіх захопнікаў, у гэты дзень адбыўся мітынг-рэквіем “Дзень памяці і смутку”. Удзел у ім прынялі прадстаўнікі раённай улады, члены райвыканкама, ветэраны Вялікай Айчыннай вайны, прадстаўнікі грамадскасці, кіраўнікі раённых арганізацый і прадпрыемстваў, школьнікі, навучэнцкая моладзь.
На працягу мітынгу-рэквіему ля памятнага знака неслі вахту школьнікі-піянеры.
Звяртаючыся да прысутных, намеснік старшыні райвыканкама Таццяна Бяляўская выказала словы ўдзячнасці ветэранам, якія вынеслі ўвесь цяжар вайны, сваім гераізмам і мужнасцю набліжаючы свяшчэнны Дзень Перамогі. Яна адзначыла, што Вялікая Айчынная вайна, якая прайшла практычна праз лёс кожнага беларуса, стала выпрабаваннем для ўсяго народа.  Таццяна Бяляўская звярнулася да моладзі з заклікам берагчы памяць пакаленняў, не забываць пра тых, хто аддаў сваё жыццё за наша шчаслівае сёння.

Свой наказ маладому пакаленню Кіраўшчыны даў ветэран Вялікай Айчыннай вайны Васіль Антонавіч Буслаў. Ён заклікаў прысутных памятаць пра тых, хто абараніў краіну падчас ваеннага ліхалецця і аднаўляў яе ў пасляваенныя гады. Дзякуючы мужнасці абаронцаў Айчыны мы сёння маем магчымасць будаваць незалежную і моцную Беларусь.

Ад імя маладога пакалення кіраўчан да ўзельнікаў мітынгу-рэквіему звярнулася вучаніца 7 класа СШ №1 горада Дар’я Ананіч. Дзяўчына выказала словы ўдзячнасці ветэранам вайны за тое, што сучаснае пакаленне мае магчымасць жыць, вучыцца, атрымліваць прафесію ў мірнай, прыгожай і квітнеючай краіне. А ўсё таму, што 76 гадоў назад дзеды і прадзеды ўступілі ў смяротную схватку з бесчалавечным ворагам, праявілі сапраўдны гераізм і вызвалілі сваю Радзіму ад фашысцкай навалы. Сёння моладзь будуе планы на будучыню, увасабляе ў жыццё свае мары. Найважнейшая задача сучаснага пакалення — зрабіць усё магчымае, каб на нашай беларускай зямлі былі мір і спакой.

Удзячныя нашчадкі ўшанавалі памяць загінуўшых мінутай маўчання, усклалі да памяітнага знака вянкі і кветкі.

Фота Максіма МІКЕШЫНА.