Гэты дабрачынны праект застаецца важнай сацыяльнай ініцыятывай, аб’ядноўвае неабыякавых людзей, якія імкнуцца падарыць радасць і падтрымку дзецям.
У рамках акцыі намеснік старшыні Пастаяннай камісіі Савета Рэспублікі Нацыянальнага сходу Рэспублікі Беларусь па рэгіянальнай палітыцы і мясцовым самакіраванні, дырэктар ААТ “Рассвет імя К.П.Арлоўскага” Аляксандр Багель, намеснік дырэктара сельгаставарыства Наталля Шапавалава, старшыня прафкама гаспадаркі Святлана Акуліч наведалі сям’ю Казюліных у Валосавічах. У сям’і выхоўваецца сямёра дзяцей, усе яны атрымалі навагоднія падарункі і прысмакі ад гасцей.
Аляксандр Іванавіч пажадаў рабятам і іх бацькам моцнага здароўя і дабрабыту ў новым годзе, дзецям – добрай вучобы, слухацца бацькоў і дапамагаць ім, быць дружнымі і клапаціцца адзін пра аднаго, а бацькам – сіл і цярпення, узаемаразумення і падтрымкі.
Дзеці былі рады гасцям, падарункам, спявалі песні і дзяліліся сваімі планамі.
У святочныя дні Дзед Мароз і Снягурка наведалі і прыёмную сям’ю Наталлі Бегуновай з аграгарадка Мышкавічы, у якой выхоўваецца шасцёра дзяцей.
Ствараючы святочны настрой і дорачы радасць, ва ўтульнай атмасферы сямейнага цяпла дзеці атрымалі падарункі ад ААТ “Рассвет імя К.П.Арлоўскага”. Госці пажадалі ўсім шчасця і здароўя ў новым годзе.
Такія ініцыятывы робяць святы па-сапраўднаму чароўнымі, ствараюць атмасферу сацыяльнай падтрымкі і нагадваюць пра важнасць сямейных каштоўнасцяў у грамадстве, пра тое, што клопат пра будучыню краіны пачынаецца з клопату пра дзяцей…

У рамках акцыі член Савета Рэспублікі Нацыянальнага сходу Рэспублікі Беларусь, дырэктар ААТ “Рассвет імя К.П.Арлоўскага” Аляксандр Багель, Наталля Шапавалава і Святлана Акуліч завіталі з віншаваннямі, падарункамі і салодкасцямі да выхаванцаў Кіраўскага цэнтра карэкцыйна-развіваючага навучання і рэабілітацыі.
Госці павіншавалі рабят з навагоднімі і каляднымі святамі, уручылі цацкі, развіваючыя гульні і цукеркі. Вочы дзетак свяціліся радасцю, а на вуснах былі шчырыя ўсмешкі. Было бачна, што ім вельмі спадабаліся падарункі і яны былі ўдзячныя за клопат і ўвагу. Рабяты разам з дарослымі, з Дзедам Марозам і Снягуркай вадзілі карагоды, спявалі.
– Раство і Новы год – гэта заўсёды час чараўніцтва. Дзеці ў гэтыя дні асабліва чакаюць казку і цудаў, – адзначыў Аляксандр Багель. – А рабяты з пэўнымі асаблівасцямі здароўя, акрамя іншага, маюць вялікую патрэбу ў клопаце і станоўчых эмоцыях. Наведваючы гэтых дзетак, бачыш, наколькі яны шчырыя, адкрытыя, добразычлівыя.
У нашай краіне кожнае дзіцяці агорнута падтрымкай і клопатам. Рабяты маюць цудоўныя магчымасці для навучання, раскрыцця сваіх талентаў, заняткаў рознымі відамі спорту. Пад пільнай увагай дзеці з асаблівасцямі развіцця. Для іх створаны і працуюць цэнтры карэкцыйна-развіваючага навучання і рэабілітацыі, у якіх рабяты атрымліваюць медыцынскую, псіхалагічную і адукацыйную дапамогу. Увогуле, кіраўніцтва нашай краіны робіць усё магчымае, каб
сацыяльная падтрымка сем’яў з дзецьмі толькі ўмацоўвалася.

Галіна РУСЕЦКАЯ,

Людміла СЯМЁНАВА.