Штогод у межах рэспубліканскай акцыі “Белая Русь” — з любоўю да дзяцей” кіраўніцтва, члены арганізацыйных структур гэтага грамадскага аб’яднання уручаюць падарункі, віншуюць мам, чые дзеці нарадзіліся 3 ліпеня, у Дзень Незалежнасці Рэспублікі Беларусь.
Сёлета ў гэты адметны для краіны дзень нарадзілася новая жыхарка нашага горада Арыяна Трафімава: дзяўчынка з’явілася на свет у Бабруйскім радзільным доме. Маладыя бацькі Крысціна і Аляксей былі вельмі рады двайному святу.
Нядаўна ў госці да Трафімавых завіталі старшыня раённай арганізацыі РГА “Белая Русь” Васіль Маркевіч і галоўны спецыяліст аддзела ідэалагічнай работы, культуры і па справах моладзі райвыканкама Наталля Каранкевіч з падарункамі і самымі найлепшымі пажаданнямі маладой сям’і. Маленькая Арыяна была паўнапраўнай удзельніцай гэтай падзеі. Дарэчы, яе незвычайнае імя па-грэчаску азначае “аддадзеная”, “святая”.
Мама Крысціна да дэкрэтнага адпачынку вучылася ў Бабруйскім аграрна-эканамічным каледжы, тата Аляксей працуе на фірме ААТ “Анкорстрой” у г.Бабруйску. Знайшлі адзін другога ў сацыяльных сетках.
Як адзначыў галава сям’і падчас візіту гасцей, яны з жонкай вельмі чакалі нараджэння дачкі. 3 ліпеня ўвечары яму здавалася, што і ў гонар з’яўлення Арыяны над Кіраўскам грымеў святочны фейерверк.
Пакуль у планах бацькоў — паставіць дачку на ногі, а далей — час пакажа…
Васіль Маркевіч у размове з карэспандэнтам раённай газеты падкрэсліў, што акцыя “Белая Русь” — з любоўю да дзяцей” праводзіцца ў гонар святкавання Дня Незалежнасці Рэспублікі Беларусь з 2009 года — для падтрымкі мацярынства, умацавання інстытута сям’і. Яна стала ў нашай краіне традыцыйнай.
Фота Максіма МІКЕШЫНА.