У раёне працягваецца традыцыйная акцыя “Цуды на Раство”, якая праходзіць у межах рэспубліканскай дабрачыннай акцыі “Нашы дзеці”. Яна прадоўжыцца да 9 студзеня 2017 года. Далучайцеся! Спяшайцеся дзяліцца дабрынёй!

Да актывістаў раённых арганізацый ГА “БРСМ” і “БРПА”, якія ў перыяд зімовых святаў імкнуцца акружыць увагай і клопатам, душэўнай цеплынёй маленькіх жыхароў Кіраўшчыны, далучаюцца кіраўнікі розных службаў і арганізацый. Днямі, пракурор раёна Вячаслаў Чучулін з дабрачыннай мэтай завітаў да мнагадзетнай сям’і Юліі Зяньковай. Вячаслаў Віктаравіч прывёз падарункі для дочак кіраўчанкі: Віталіны, Караліны і Віялеты, а таксама масу перадсвяточных віншаванняў і шчырых пажаданняў.

Напярэдадні Новага года ў межах дабрачыннай акцыі “Нашы дзеці” супрацоўнікі раённага аддзела Следчага камітэта Рэспублікі Беларусь наведалі ў Кіраўску дзіцячы дом сямейнага тыпу Калінкіных. Гаспадыня Ларыса Дзмітрыеўна, а таксама выхаванцы гасцінна сустракалі начальніка аддзела Ірыну
Савельеву-Чмара і яе намесніка Леаніда Тарабуева, якія завіталі з падарункамі. Зараз у доме выхоўваецца сямёра прыёмных дзяцей, усе яны агорнуты любоўю, увагай і клопатам.