Стала добрай традыцыяй кожны год у межах рэспубліканскай акцыі “Нашы дзеці” праводзіць раённую дабрачынную навагоднюю ёлку. Учора ў Мышкавіцкім СДК на святочнае мерапрыемства былі запрошаны 297 рабят з ліку пераможцаў алімпіяд, творчых конкурсаў, фестываляў, турніраў і розных спаборніцтваў, 76 дзяцей-сірот і дзяцей, застаўшыхся без бацькоўскай апекі, дзеці-інваліды і выхаванцы Лёўкавіцкага дзіцячага сацыяльнага прытулку.
Павіншаваць іх з самым доўгачаканым і любімым усімі святам — Новым годам — прыйшлі ганаровыя госці: першы намеснік старшыні райвыканкама, начальнік райсельгасхарчу Уладзімір Царыкаў, старшыня раённага Савета дэпутатаў На-дзея Каранкевіч, член Савета Рэспублікі Нацыянальнага сходу Рэспублікі Беларусь, галоўны ўрач райбальніцы Алена Круцько, намеснік старшыні райвыканкама Галіна Слабоднікава.
У фае СДК дзяцей чакала навагодняя прыгажуня-ёлка, а ў глядзельнай зале сустракалі казачныя героі, фальклорныя персанажы і гаспадыня надыходзячага года Козачка.

Са сцэны з прывітальным словам да рабят, іх бацькоў і ўсіх прысутных звярнуўся Уладзімір Царыкаў. Ён адзначыў, што вельмі рады бачыць у гэтым зале рабят, якія сваімі добрымі справамі і ўчынкамі, стараннай вучобай, творчымі поспехамі і дасягненнямі ў спорце заваявалі ганаровае права прадстаўляць на галоўнай ёлцы раёна сваю школу і свой калектыў.
Менавіта дзецям і іх ўсебаковаму развіццю надаецца вялікая ўвага ў нашай краіне, падкрэсліў Уладзімір Царыкаў. У кожнага ёсць магчымасць вучыцца, атрымліваць дастойную прафесію і выбіраць работу па душы. Несумненна, асаблівая ўвага — адораным дзецям і студэнтам, таленавітай моладзі, маладым вучоным. Менавіта сённяшнім школьнікам у будучым будаваць і развіваць нашу цудоўную і любімую Беларусь.
Уладзімір Царыкаў адзначыў, што ў адыходзячым годзе многія рабяты зрабілі асаблівы падарунак сваім бацькам, настаўнікам, выхавальнікам — гэта перамогі ў розных конкурсах, алімпіядах і спаборніцтвах. Сярод тых, хто праславіў сваімі дасягненнямі наш раён — Юлія Багданава, вучаніца СШ №1, якая стала пераможцай заключнага этапу рэспубліканскай алімпіяды па працоўным навучанні. Вялікі ўклад у капілку агульных дасягненняў раёна ўнеслі вучні гімназіі горада. Кірыл Дрозд стаў пераможцам фінальнага тура 7-га рэспубліканскага конкурсу “Школа бяспекі-2014”, Веялета Бяляўская заняла 1-е месца ў рэспубліканскім конкурсе дзіцячай творчасці “АрхНавацыя-2014”, Любоў Чайка і Анастасія Лыбзікава сталі дыпламантамі ІІ-й ступені рэспубліканскага конкурсу “Я родным краем ганаруся”.
Значных поспехаў дасягнуў калектыў студыі стылю і моды “Гламур”, стаўшы лаўрэатам І-й і ІІ-й ступеняў у Міжнародным творчым фестывалі “Хваля ідэй-2014”, а ў рэспубліканскім конкурсе “Юныя таленты Беларусі” — дыпламантам ІІІ-й ступені.
Па выніках удзелу ў абласных і рэспубліканскіх турнірах па інтэлектуальных гульняў сярод школьнікаў у 2013-2014 навучальным годзе каманды “Смайлы”, “Мадагаскарскія чайкі” і “6 элементаў” сталі ўладальнікамі дыпломаў ІІ-й і ІІІ-й ступеняў.
Дастойны імідж раёна сфарміравалі юныя спартсмены Кіраўшчыны. Юныя валейбалісткі ДЮСШ сталі пераможцамі першынства Рэспублікі Беларусь “Дзіцяча-юнацкая валейбольная ліга”. Выхаванкі ДЮСШ Крысціна Акуліч і Дар’я Рыжова па выніках рэспубліканскай алімпія-ды школьнікаў узнагароджаны дыпломам ІІ-й ступені. Свае зорачкі з’явіліся і ў такім відзе спорту, як цяжкая атлетыка: Мікалай Бяляўскі і Дар’я Лазаковіч у рэспублікан-скай спартакіядзе ДЮСШ занялі другія месцы.
Віншуючы рабят з надыходзячым Новым годам, першы намеснік старшыні райвыканкама, начальнік райсельгасхарчу Уладзімір Царыкаў пажадаў ім і далей развіваць свае творчыя здольнасці, дасягаць новых поспехаў і перамог, а таксама параіў усім жыць з верай у дабро і з чаканнем цуда, бо мары і жаданні вельмі часта збываюцца.
Са шчырымі словамі віншаванняў і пажаданняў звярнулася да прысутных Алена Круцько.
Ад усіх рабят раёна кіраўніцтву і іншым прадстаўнікам раённай улады былі ўручаны навагоднія сувеніры.
Шмат станоўчых эмоцый прынесла дзецям навагодняе тэатралізаванае прадстаўленне “Новы год у падводным царстве”. Іх літаральна зачаравала казачная гісторыя са шматлікімі прыгодамі, чарадзействамі і адвечнай барацьбой дабра са злом. Хто толькі ні завітаў на гэта казачнае прадстаўленне: Дзед Мароз са Снягуркай, медзведзяня Умка, пінгвін, прыгажуня Шахерэзада, чароўная Залатая Рыбка і іншыя персанажы.
Пасля навагодняй казкі кожнага юнага гледача чакаў навагодні падарунак ад Дзеда Мароза.
І, гледзячы на тое, якім шчасцем свяціліся вочы хлопчыкаў і дзяўчынак, можна было смела сказаць: свята адбылося, свята ўдалося, свята атрымалася радасным і чароўным. Так бывае заўсёды, калі прыходзіць Новы год!
Людміла СЯМЁНАВА.
Фота
Максіма МІКЕШЫНА.