Амаль 23 гады працуе выкладчыкам матэматыкі ў Мышкавіцкай СШ Эма Мар’янаўна Жук. Прыехала яна сюды пасля заканчэння механіка-матэматычнага факультэта БДУ разам з мужам.
Выхаванцы Э.М.Жук неаднаразова займалі прызавыя месцы на раённых і абласных прадметных алімпіядах. У школе, акрамя гурткоў і факультатываў па матэматыцы, працуе навуковы цэнтр “Сігма” па далучэнні рабят да навуковай дзейнасці па матэматыцы. На занятках у цэнтры вучні знаёмяцца са спосабамі рашэння алімпіядных задач, займаюцца навукова-доследнай дзейнасцю.
У мінулым навучальным годзе вучаніца 9 класа Марыя Шапавалава пад кіраўніцтвам Эмы Мар’янаўны падрыхтавала навукова-даследчую работу “Некаторыя спосабы рашэння квадратных ураўненняў”, якая была ўдастоена прызу на абласным конкурсе.
Э.М.Жук з захапленнем працуе з вучнямі, паспяхова прымяняе на практыцы новыя методыкі, умее знайсці падыход да кожнага свайго выхаванца. Вядома, што сучасныя дзеці вельмі сябруюць з камп’ютарам, і не заўсёды для ўласнай карысці: роля настаўніка, па меркаванні Эмы Мар’янаўны, — правільна накіроўваць рабят у гэтым інфармацыйным патоку і самому ўдасканальвацца.
Радуюць маці і бацьку сваімі поспехамі ў адукацыі дачка і сын. Дачка Аксана, сёлетняя выпускніца Мышкавіцкай СШ, была пераможцай раённага конкурсу “Вучань года-2010”, а зараз яна — студэнтка Мінскага лінгвістычнага універсітэта.