“Зялёнае жніво” у СГФ “Чыгірынка”
Традыцыйна высокія тэмпы корманарыхтоўчых работ у СГФ “Чыгірынка” РУП “Беларусьнафта-Магілёўаблнафтапрадукт”.
Каб пад поўную патрэбу забяспечыць грамадскі статак кармамі, чыгірынцам неабходна назапасіць 6000 тон сенажу, 694 тоны сена і 9200 тон сіласу.
Па словах галоўнага агранома сельгасфіліяла Пятра Мухіна, вельмі важна не прапусціць фазу паспявання і ўбраць травы своечасова, пры фарміраванні асноўнай масы ўраджаю, калі ў іх утрымліваецца максімальная колькасць карысных рэчываў. Таму першымі ўбіралі ранняспелыя культуры. Пры гэтым зялёная маса не толькі актыўна закладваецца ў траншэі, а і выкарыстоўваецца ў якасці падкормкі для БРЖ.
Як адзначыў галоўны аграном, травы першага ўкосу сёлета крыху горшыя, чым былі летась. Але цяпло і прайшоўшыя дажджы паспрыялі іх росту. Спецыяліст упэўнены, што без кармоў сельгасфіліял не застанецца, чыгірынцы для гэтага прыкладуць усе намаганні. Дарэчы на мінулы зімова-стойлавы перыяд утрымання жывёлы ў “Чыгірынцы” нарыхтавалі двугадовы запас кармоў.
Да ўборкі траў у гаспадарцы падрыхтаваліся выдатна: тэхніка працуе без сур’ёзных збояў, запчастак хапае, праблем з пастаўкамі паліва не ўзнікае. А інакш і быць не можа: кіраўніцтва і механізатары разумеюць важнасць корманарыхтоўчай кампаніі: грамадскі статак у гаспадарцы вялікі — больш
за 1600 галоў БРЖ, з якіх 707 — дойных кароў, а вось земляў недастаткова, таму тут імкнуцца з максімальнай аддачай выкарыстоўваць кожны гектар. Належным чынам падрыхтавалі да прыёму зялёнай масы і сянажныя траншэі. На прадстаячую зімоўку ўжо маецца больш за 1800 т сенажу, 212 т сена.
За якасцю закладваемых кармоў наладжаны пастаянны кантроль. Адказныя спецыялісты адсочваюць захаванне тэхналагічных патрабаванняў: пастаянна вымяраецца тэмпература і вільготнасць сянажнай масы. Кантралююць сітуацыю і спецыялісты ветэрынарнай службы раёна, якія займаюцца адборам проб сянажнай масы для вызначэння яе якасці.
Як і ў папярэднія гады, першым свой МТЗ-1221 з касілкай “Кроне-320” вывеў на палеткі вопытны механізатар Мікалай Бабіцкі (на здымку ўверсе).
Добра зарэкамендаваў сябе на варушэнні траў малады механізатар Аляксандр Якавенка (на здымку ўнізе). На падборы і здрабненні зялёнай масы працуюць Дзмітрый Конюхаў і Віталь Шаўцоў. Хутка дастаўляюць кармы да месца трамбоўкі Валерый Замкоў, Іван Куляшоў, Сяргей Ляшчынскі, Сяргей Юхнавец, Сяргей Брэн-дзікаў і Сяргей Гурулёў.
Пры закладцы кармоў абавязкова выкарыстоўваюць кансервант. Правяленую зялёную масу падбіраюць і здрабняюць пры 50-55% вільготнасці. Трамбоўка сенажу вядзецца кругласутачна: інакш немагчыма атрымаць кармы добрай якасці. Даручылі гэтую адказную справу вопытным працаўнікам: Паўлу Корзуну, Мікалаю Глушакову і Леаніду Садоўскаму.
Усе ўдзель
нікі корманарыхтоўчай кампаніі забяспечаны спецвопраткай, у сельгасфіліяле заўсёды надаецца належная ўвага захаванню тэхнікі бяспекі. Паклапацілася кіраўніцтва і аб стварэнні належных бытавых умоў для механізатараў, распрацавана палажэнне аб працоўным спаборніцтве, якое прадугледжвае маральнае і матэрыяльнае заахвочванне за якаснае і своечасовае правядзенне работ. Смачныя абеды, што гатуюцца ў мясцовай сталовай, дастаўляюцца прама на палеткі.
Ад рассвета да змяркання шчыруюць механізатары на сельгаспалетках, разумеюць, што ў тым ліку і ад іх стараннай працы залежыць, наколькі ўпэўнена грамадскі статак увойдзе ў наступную зімоўку, наколькі спажыўным будзе рацыён жывёлы і ў выніку — колькасць атрыманай жывёлагадоўчай прадукцыі.
Людміла СЯМЁНАВА.
Фота аўтара.