30 чэрвеня — Дзень эканаміста
За гады работы Ірына Бяляўская, галоўны эканаміст СВК “Рассвет” імя К.П.Арлоўскага, пераканалася, што яе прафесія адначасова і цікавая, і складаная. І сапраўды, да эканаміста прад’яўляюцца высокія патрабаванні: ён павінен разбірацца ў законах эканамічнай навукі, умець аналізаваць статыстычныя дадзеныя і даваць ім правільную ацэнку, умець думаць, супастаўляць і рабіць правільныя вывады, бо ад гэтага ў цэлым залежыць эканамічная стабільнасць любога прадпрыемства.
У 1986 годзе Ірына Мікалаеўна закончыла Беларускую сельгасакадэмію, па размеркаванні працавала эканамістам у адным з ПМК г.Смаленска. Адпрацаваўшы 3 гады, прыехала жыць на радзіму мужа. І вось ужо звыш 20 гадоў яна працуе эканамістам у “Рассвеце”.
Ірына Бяляўская па-праву лічыцца спецыялістам высокага класу, да яе меркаванняў прыслухоўваецца і кіраўніцтва сельгаскааператыву, і калегі па працы.
Добрасумленныя і старанныя адносіны Ірыны Бяляўскай да сваіх абавязкаў не застаюцца без увагі: па выніках штогадовага раённага спаборніцтва сярод галін народнай гаспадаркі за 2013 год яна была прызнана “Лепшым эканамістам”.
