Ва ўсе часы важнейшай задачай супрацоўнікаў органаў унутраных спраў была і застаецца бяспека грамадзян ад злачынных замахаў, захаванне іх жыцця, здароўя і маёмасці. На пярэднім рубяжы гэтай барацьбы знаходзіцца і служба крымінальнага вышуку.

Па выніках 2015 года аддзяленне крымінальнага вышуку раённага аддзела ўнутраных спраў прызнана лепшым сярод аднайменных падраздзяленняў рэспублікі і ўзнагароджана Дыпломам і пераходным прызам імя П.А.Каралёва за адданасць службе і высокае майстэрства ў аператыўна-вышуковай дзейнасці.

А сноўнымі паказчыкамі работы аддзялення крымінальнага вышуку РАУС лічыцца дынаміка колькасці злачынстваў і іх раскрывальнасць. З учыненых у раёне ў мінулым годзе 238 злачынстваў — 170 зарэгістраваны па лініі крымінальнага вышуку. У межах праведзенай аператыўнай работы па 127 злачынствах падазроныя былі ўстаноўлены, раскрывальнасць склала 78,7%. З агульнай колькасці зарэгістраваных злачынстваў 11 былі аднесены да катэгорыі цяжкіх і асабліва цяжкіх. Нямала давялося супрацоўнікам аддзялення папрацаваць, каб устанавіць асоб, іх учыніўшых. Але кампетэнтнасць, адказнасць і высокі прафесіяналізм дазволілі раскрыць усе злачынствы, як кажуць, па “гарачых” слядах.

Значная частка злачынстваў па лініі крымінальнага вышуку — крадзяжы. Часта ахвяры самі правакуюць злачынцаў: пакідаюць без нагляду свае рэчы, не зачыняюць дзверы, распіваюць спіртныя напоі з малазнаёмымі людзьмі. А гэта і ёсць першапрычыны, па якіх здараюцца правапарушэнні.

Большасць злачынстваў мае рэцыдыўны характар. Таму пэўную ўвагу супрацоўнікі аддзялення надаюць прафілактыцы правапарушэнняў. Сустрэчы ў калектывах, прыватныя гутаркі, інфармацыя, друкуемая ў СМІ, даюць свой плён: грамадзяне сталі больш адказна ставіцца да захавання сваёй маёмасці, выказваюць жаданне супрацоўнічаць з міліцыяй.

Немалаважным накірункам  у дзейнасці супрацоўнікаў крымінальнага вышуку з’яўляецца арганізацыя пошуку злачынцаў, грамадзян, прапаўшых без вестак, а таксама асоб, якія ўхіляюцца ад уплаты аліментаў.

У бягучым годзе было ўстаноўлена месцазнаходжанне 8 злачынцаў, 14 асоб, якія ўхіляюцца ад уплаты аліментаў, а таксама 4 прапаўшых без вестак. За ўсімі гэтымі лічбамі стаіць штдзённая і карпатлівая работа міліцыянераў.

Часта супрацоўнікам аддзялення даводзіцца працаваць у рэжыме павышанай гатоўнасці: у любы час дня ці ночы яны павінны тэрмінова прыбыць на месца злачынства. Але напружанасць у рабоце не адбіваецца адмоўна на зладжанасці калектыву: людзі, якія прышлі працаваць у крымінальны вышук, упэўнены ў сваім выбары.

Адным з галоўных паказчыкаў сваёй работы супрацоўнікі аддзялення лічаць аўтарытэт сярод насельніцтва. А для гэтага міліцыянер павінен валодаць асноўнымі якасцямі: прафесіяналізмам, кампетэнтнасцю, адказнасцю.

Атрыманая заслужаная ўзнагарода стала яскравым пацвярджэннем таго, што са сваімі асноўнымі задачамі па ахове грамадскага парадку, забеспячэнні асабістай і маёмаснай бяспекі грамадзян, прадухіленні і спыненні злачынстваў і іншых правапарушэнняў, іх выяўленні, раскрыцці і расследаванні на тэрыторыі нашага раёна калектыў аддзялення крымінальнага вышуку спраўляецца паспяхова.

Людміла Сямёнава