На Кіраўшчыне працягваецца нарыхтоўка кармоў для грамадскага пагалоўя. На парадку дня — уборка кукурузы (на сілас), якая сёлета займае плошчу ў 6866 га. Па да­дзеных райсельгасхарчу, па стане на ўчарашні дзень кукуруза на зялёны корм убрана на 2664 га, нарыхтавана 65975 т сіласу са 164 тыс.т неабходных.

Актыўна вядуць корманарыхтоўчую кампанію працаўнікі КСУП “Ніва-Барсукі”. Сёлета “каралева палёў” займала тут плошчу ў 971 га, з іх на 800 га яна будзе ўбрана на сілас. Актыўны тэмп работ ужо дазволіў ніваўцам убраць кукурузу на амаль 190 га: валавы збор зялёнай масы склаў каля 4000 т, сярэдняя ўраджайнасць з гектара — амаль 365 ц. Усяго ж у сіласныя траншэі закладзена 5417 т якасных сакавітых кармоў.
Зараз ніваўцы ўбіраюць кукурузу на полі ў раёне в.Капусціна. Закладка сіласу вядзецца недалёка ад месца ўборкі. На ўборцы кукурузы задзейнічаны кормаўборачны камбайн КВК-800 і некалькі адзінак тэхнікі на адвозцы (у залежнасці ад адлегласці да месца закладкі). Камбайнам кіруе малады, але вопытны і адказны механізатар Алег Стальмакоў (за дзень ён паспявае здрабніць кукурузу на 25-30 га).
Да даручанай справы камбайнер заўсёды ставіцца добрасумленна і адказна (падчас жніва разам з напарнікам быў у ліку лідараў у раёне).
Трамбоўку на “К-700” вядзе Валерый Кухарэнка. Не даюць прастойваць кормакамбайну, хутка адвозячы масу да месца складзіравання, занятыя на адвозцы Іван Скрыпуноў, Уладзімір Еўдакімаў, Сяргей Ярыгін, Аляксей Сямёнаў і іншыя.
Корманарыхтоўка ў сельгаспрадпрыемстве вядзецца хуткімі тэмпамі, дарэмна не траціцца ні хвілінкі. Рабочы дзень доўжыцца з раніцы і да змяркання, трамбоўка ідзе кругласутачна. Арганізавана гарачае харчаванне, якасцю якога работнікі цалкам задаволены. Закладка сіласу ажыццяўляецца ра­зам з суданскай травой, якая з’яўляецца вельмі карыснай для жывёлы і значна паляпшае спажыўнасць нарыхтоўваемага корму. Яе здрабненнем займаецца Сяргей Лебе­дзеў і Уладзімір Лукановіч.
Неўзабаве мясцовыя механізатары пачнуць убіраць кукурузу і на зерне.
Па словах намесніка дырэктара КСУП “Ніва-Барсукі” Аляксея Ланкуця, за якасцю закладкі кансерваванага корму сочаць і агранамічная, і ветэрынарная службы. Але і ўсе працаўнікі, занятыя на корманарыхтоўцы — людзі на- дзейныя і адказныя, якія разумеюць усю важнасць праводзімай работы па забеспячэнні галіны жывёлагадоўлі якаснымі кармамі ў дастатковай колькасці.
Застаецца спадзявацца, што і надоі ад каровы, і валавая вытворчасць малака ў КСУП “Ніва-Барсукі” штомесяц будуць толькі ўзрастаць — усе падставы для гэтага ёсць.
Людміла СЯМЁНАВА.
Фота
Максіма МІКЕШЫНА.
На здымках: механізатар Алег Стальмакоў (на верхнім здымку справа) працуе на кормаўборачным камбайне, Сяргей Ярыгін — на адвозцы зялёнай масы; Валерый Кухарэнка (на ніжнім здымку) заняты на трамбоўцы.