Аператыўнасць і якасць – на першым месцы ў рабоце супрацоўнікаў Кіраўскага райаддзела Следчага камітэта
Па выніках работы за мінулы год Кіраўскі раённы аддзел Следчага камітэта Рэспублікі Беларусь прызнаны лепшым следчым падраздзяленнем на Магілёўшчыне. З гэтай нагоды службовы калектыў аддзела адзначаны кубкам і пасведчаннем упраўлення Следчага камітэта Рэспублікі Беларусь па Магілёўскай вобласці.
Начальнік райаддзела Канстанцін Васілеўскі расказаў: “Кожны год у нашай сферы падводзяцца вынікі службовай дзейнасці, ацэньваецца эфектыўнасць работы. Сёлета часова выконваючы абавязкі начальніка ўпраўлення Следчага камітэта па Магілёўскай вобласці Віталь Шляханаў падчас падвядзення вынікаў дзейнасці адзначыў, што прадпрынятыя арганізацыйна-практычныя меры дазволілі летась палепшыць шэраг паказчыкаў, якія характарызуюць эфектыўнасць і якасць следчай работы.
Адна з асноўных задач Следчага камітэта – усебаковае, поўнае, аб’ектыўнае расследаванне злачынстваў. Выконваючы свае штодзённыя службовыя абавязкі, мы прытрымліваемся арыенціру – аператыўнасць і якасць. Пасаду начальніка аддзела я займаю на працягу года і хачу адзначыць, што мне пашанцавала працаваць з маладым, энергічным, неабыякавым і дружным калектывам. Лічу, што гэтыя акалічнасці, у ліку іншага, сталі падставай для нашага агульнага поспеху”.
Канстанцін Васілеўскі дадаў, што работа Кіраўскага райаддзела Следчага камітэта зўсёды высока ацэньваецца вышэйстаячым кіраўніцтвам: аналагічнага сёлетняму поспеху кіраўскія следчыя дасягалі ў 2020 годзе, летась займалі другую пазіцыю ў вобласці.
Па выніках работы раённага аддзела лепшым супрацоўнікам прызнаны старшы следчы, маёр юстыцыі Максім Дудзінскі, які мае лепшыя рэзультаты і паказчыкі ў службовай дзейнасці. У райаддзеле Следчага камітэта Максім Аляксандравіч працуе з 2012 года – з моманту стварэння – і з’яўляецца адным з найбольш вопытных следчых. Родам ён з Кіраўска. Прафесійны шлях пачаў у жніўні 2011 года з пасады следчага ў райаддзеле ўнутраных спраў. “Калі стварыўся Следчы камітэт, мяне, як выпускніка следча-экспертнага факультэта Акадэміі МУС Рэспублікі Беларусь, запрасілі сюды працаваць, – падзяліўся ўспамінамі Максім Дудзінскі. – А наогул, з дзяцінства у мяне была мара стаць супрацоўнікам праваахоўных органаў. Яшчэ ў школе ўпарта рыхтаваўся да паступлення, вёў здаровы лад жыцця, падтрымліваў у добрым стане сваю фізічную форму. Дарэчы, прытрымліваюся гэтага і зараз”.
Маладым калегам, а таксама юнакам і дзяўчатам, якія жадаюць звязаць сваё жыццё з прафесіяй следчага, Максім Дудзінскі раіць быць цярплівымі і мэтанакіраванымі. “Важна памятаць: калі стаў на гэты шлях, трэба быць верным свайму выбару, а таксама абавязку і Айчыне, цвёрда стаяць на варце Закона”, – падагульніў гутарку лепшы следчы Кіраўшчыны.
Яўгенія БЯЛЬКО.
Фота Максіма МІКЕШЫНА.
На здымку: следчы Вячаслаў Свірыд (першы злева), намеснік начальніка аддзела Дзмітрый Каранькоў, начальнік аддзела Канстанцін Васілеўскі, следчы Вікторыя Бузава, старшы следчы Максім Дудзінскі.