Беларускі рэспуб­ліканскі саюз моладзі адзначыў 16-ты дзень нараджэння. А гэта нагода ацаніць пройдзены шлях, вызначыць планы на перспектыву. Асноўныя аспекты гэтага закрануў в.а. першага сакратара райкама БРСМ Алег БОЙКА:
— Нагадваючы гісторыю ўтварэння нашай арганізацыі, мы адзначаем, што яна з’яўляецца пераемнікам Усесаюзнага Ленінскага Камуністычнага Саюза Моладзі, 100-годдзе якога святкуецца сёлета. У бягучым годзе таксама — 55-годдзе будатрадаўскага руху. У тым ліку ў сувязі з гэтымі датамі будуе сваю работу раённая арганізацыя БРСМ, якая налічвае 827 юнакоў і дзяўчат. Шануем традыцыі камсамола, які ў свой час для многіх маладых людзей стаў школай жыцця, выхаваў такія якасці, як адказнасць за даручаную справу, братэрства, гатоўнасць прыйсці на дапамогу іншым. Запал той энергіі, шчырага імкнення да ўвасаблення ў жыццё значных спраў застаўся ў нашых бацькоў і дзедаў, якія прайшлі шлях у камсамоле, на ўсе наступныя гады. І нам, БРСМаўцам, ёсць чаму ў іх павучыцца і што ўзяць на ўзбраенне.
Завяршыўся працоўны семестр-2018, які паказаў, што юнакі і дзяўчаты нашай арганізацыі — дастойныя нашчадкі будатрадаўцаў мінулых гадоў. Яны добрасумленна працавалі на шэрагу аб’ектаў раёна. А ўвогуле было сфарміравана 20 атрадаў розных профіляў агульнай колькасцю 226 чалавек. Рабяты займаліся відавой праполкай сельгаскультур, падрыхтоўкай складскіх памяшканняў да прыёмкі ўраджаю, выконвалі рамонтна-будаўнічыя работы ва УКП “Жылкамгас”, працавалі на Кіраўскім харчовым камбінаце і інш.
Будуць падведзены вынікі працоўнага семестра і адзначаны лепшыя.
Заслугоўвае ўвагі работа двух валанцёрскіх атрадаў “Добрае сэрца”, у якіх задзейнічаны навучэнцы Жыліцкага сельгаскале­джа. Яны аказваюць дапамогу ветэрану Вялікай Айчыннай вайны І.Я.Касалапаву на яго прысядзібным участку. Валанцёры і іншыя сельгаскаледжаўцы прымаюць актыўны ўдзел у работах па навядзенні парадку і добраўпарадкаванні, праводзімых у межах абласнога месячніка і падрыхтоўкі да раённых “Дажынак”.
Учора, 6 верасня, стартаваў агульнарэспубліканскі маладзёжны праект «#ЗаДело!». У ходзе яго маладыя людзі ўнясуць уклад у навядзенне парадку на тэрыторыі сваёй малой радзімы. Прычым кожны можа самастойна выбраць месца для добраўпарадкавання і вызначаць віды работ. Гэта не адзінкавая акцыя, а доўгатэрміновы праект. У ліку аб’ектаў добраўпарадкавання — месцы адпачынку, паркі, скверы, прыдамавыя, прышкольныя тэрыторыі і іншыя. Заклікаю моладзь раёна прыняць актыўны ўдзел у праекце!
Хачу назваць актывістаў нашай арганізацыі, якія паказваюць прыклад ва ўсіх карысных справах: сакратар пярвічнай арганізацыі сельгаскаледжа Анастасія Фарчанава, Анастасія Панасенка з ДЮСШАР, Таццяна Садоўнікава з СШ №2 імя К.П.Арлоўскага, Антон Свірыдаў з сельгаскаледжа і многія іншыя.
Час дыктуе нам развіваць новыя формы работы, захапляць імі моладзь, на гэтым і будуць сканцэнтраваны нашы намаганні ў перспектыве.
Мы ставім задачу пашыраць рады раённай арганізацыі БРСМ. Будзем рады бачыць у іх ініцыятыўных, дзейных, энергічных, крэатыўных юнакоў і дзяўчат, а ўсе разам, я ўпэўнены, унясем дастойны ўклад у развіццё і добраўпарадкаванне нашай Кіраўшчыны, працвітанне роднай Беларусі.