Сельская гаспадарка – гэта не проста адна з галін эканомікі, гэта жывое сэрца нашай краіны, якое мае патрэбу ў энергіі маладога пакалення. Моладзь – будучае, рухаючая сіла, здольная ўдыхнуць новае жыццё ў любую сферу. Малады працаўнік палёў КСУП
«Ніва-Барсукі» Андрэй Свірко – прыклад шчырай працавітасці.
Родам з сельскагаспадарчай дынастыі. Яго бацька, маці і сястра таксама шчыруюць у КСУП «Ніва-Барсукі». Сёлета будзе 10 гадоў,
як і сам Андрэй працуе ў сельгаспрадпрыемстве. За гэты час ён стаў адным з лепшых механізатараў у рэгіёне.

Пасля заканчэння Кіраўскага ліцэя №15 юнак стаў асвойваць механізатарскую справу, пачаўшы сваю практыку ў роднай гаспадарцы. З першых дзён працы зразумеў, што гэта яго прызванне. Першапачатковыя тэхнічныя навыкі пераняў ад свайго бацькі, а прафесійнае майстэрства прыйшло з вопытам.
Зараз Андрэй Свірко займаецца падкормкай пасеваў і корманарыхтоўкай. А яго збожжаўборачны камбайн ужо ў поўнай баявой гатоўнасці чакае старту найважнейшай сельскагаспадарчай кампаніі года – жніва. Дарэчы, цяперашняя ўборачная для Андрэя таксама юбілейная – дзясятая. У складзе маладзёжных экіпажаў сельгасарганізацыі Андрэй Свірко неаднаразова займаў лідзіруючыя пазіцыі ў працоўным раённым спаборніцтве, паказваючы, што моладзь не толькі здольна адаптавацца да сучасных умоў, але і дабівацца выдатных вынікаў.
Асабісты прыклад маладога аграрыя важны не толькі для калег, але і для яго дваіх дзяцей – чатырохгадовага сына Ягора і маленькай дачушкі Алёны. Разам з жонкай Юліяй, якая да адпачынку па доглядзе за дзіцяці таксама працавала ў гаспадарцы – насенняводам, Андрэй імкнецца прывіць дзецям любоў да працы на зямлі і адказнае стаўленне да даручанай справы.
Яўгенія БЯЛЬКО. Фота аўтара.