Жывы інтарэс, шмат пытанняў рознага кшталту, даверлівы расказ пра свае захапленні — такой была рэакцыя гімназістаў з аб’яднання па інтарэсах “Юны журналіст” падчас экскурсіі ў рэдакцыю раённай газеты “Кіравец”. Яны завіталі сюды разам з кіраўніком аб’яднання Таццянай Храмянковай.

Рабяты ўважліва выслухалі расказ галоўнага рэдактара “раёнкі” Наталлі Хадаковай пра гісторыю, традыцыі газеты, яе сённяшні дзень, запыталіся пра тое, што іх найбольш цікавіла. А потым з дапамогай супрацоўнікаў акунуліся ў таямніцы стварэння матэрыялаў і фотаздымкаў, дызайна і вёрсткі газетных палос з выкарыстаннем розных камп’ютарных праграм.
У некаторых гурткоўцаў, напрыклад, Данііла Елісеенкі, Дар’і Салановіч ужо былі спробы падрыхтоўкі матэрыялаў для “Кіраўца”, і юныя журналісты засталіся задаволенымі, што іх творчыя работы ўбачылі свет на старонках “раёнкі”.
Магчыма, захапленне гэта для кагосьці ў будучым стане прафесіяй і прызваннем на ўсё жыццё. І, як запэўніла галоўны рэдактар, яны аб гэтым ніколькі не пашкадуюць. Гімназісты атрымалі на добрую памяць фірменныя каляндарыкі “Кіраўца” і нумары газет. І паабяцалі абавязкова нагадаць сваім бацькам, каб падпісаліся на раённую газету на першы квартал ці паўгоддзе 2017 года.