Работа па рэалізацыі маладзёжнай палітыкі ў раёне знаходзіцца на пастаянным кантролі ў вертыкалі ўлады. Гэтае пытанне было абмеркавана і на красавіцкім пасяджэнні райвыканкама.

Аб праводзімых мерапрыемствах, прадпрымаемых мерах, накіраваных на ўсебаковае выхаванне моладзі, садзейнічанне яе духоўнаму, маральнаму і фізічнаму развіццю, стварэнне умоў для свабоднага і эфектыўнага ўдзелу маладых людзей ва ўсіх сферах жыцця грамадства, забеспячэнне іх сацыяльнай, матэрыяльнай, прававой і іншай падтрымкі праінфармаваў удзельнікаў пасяджэння начальнік аддзела ідэалагічнай работы, культуры і па справах моладзі райвыканкама Андрэй Карпук.
Ён падкрэсліў, што надаецца вялікая ўвага арганізацыі мерапрыемстваў, прадугледжаных рэспубліканскім, абласным і раённым планамі па рэалізацыі Года моладзі.
Адзін з прыярытэтных напрамкаў маладзёжнай палітыкі — грамадзянска- патрыятычнае выхаванне. Гэты накірунак асабліва актуальны сёлета, калі адзначаецца 70-годдзе Перамогі савецкага народа ў Вялікай Айчыннай вайне.
Значная ўвага надаецца арганізацыі занятасці моладзі. Актыўнае развіццё атрымаў у раёне будатрадаўскі рух. Так, з 2011 г. колькасць студэнцкіх атрадаў узрасла з 4-х (44 навучэнцы) да 45 у 2014 г. (542 навучэнцы).
Праводзяцца працоўныя акцыі “Моладзь — за чысціню гарадоў і сёлаў”, “Чысты вадаём”, “Мой двор — мой клопат”, у межах якіх ажыццяўляюцца работы па добраўпарадкаванні прышкольных тэрыторый, паркаў, прыбярэжных палос і іншых грамадскіх месцаў.
На пастаяннай аснове арганізавана работа з сельскай моладдзю. Расшыраюцца сацыяльныя гарантыі для маладых працаўнікоў, прадугледжаныя калектыўнымі дагаворамі арганізацый у раздзеле “Моладзь”.
Працуе раённы клуб маладога спецыяліста, у лютым створаны раённы савет моладзі.
Ствараюцца ўмовы для раскрыцця творчага патэнцыялу маладых жыхароў Кіраўшчыны. У мінулым годзе яе прадстаўнікі былі ўдастоены 37 дыпломаў па выніках міжнародных, рэспубліканскіх і абласных алімпіяд, конкурсаў і спаборніцтваў у розных сферах.
У цэнтры ўвагі — работа з перспектыўнай моладдзю. Перспектыўны кадравы рэзерв, сфарміраваны аддзелам арганізацыйна-кадравай работы райвыканкама, уключае 27 чалавек ва ўзросце да 31 года.
Наладжваюцца мерапрыемствы, накіраваныя на фарміраванне здаровага ладу жыцця, развіваецца маладзёжны праваахоўчы рух.
Разам з тым, ёсць і праблемныя пытанні, якія патрабуюць вырашэння. Напрыклад, гэта падлеткавая злачыннасць. На ўліку ў інспекцыі па справах непаўналетніх РАУС у цяперашні час знаходзіцца 62 непаўналетнія (летась — 53). У мінулым годзе да адміністрацыйнай адказнасці было прыцягнута 133 падлеткі, з якіх 57 — за распіцце алкагольных напіткаў ці знаходжанне ў п’яным выглядзе ў грамадскіх месцах.
Сваімі меркаваннямі аб мерах па выпраўленні становішча падзяліліся кіраўнікі Жыліцкага сельгаскаледжа — Уладзімір Белы, ліцэя №15 — Франя Старавойтава, начальнік аддзела адукацыі, спорту і турызму райвыканкама Таццяна Бяляўская, першы сакратар райкама ГА “БРСМ” Алена Осіпава.
Шэраг слушных заўваг выказаў старшыня райвыканкама Аляксандр Бутараў і патрабаваў больш актыўна ўцягваць моладзь у правядзенне розных мерапрыемстваў, акцый, павысіць дзейснасць прафілактычнай работы ў супрацьдзеянні злачынным праявам.
Рашэннем райвыканкама вызначаны шэраг напрамкаў па актывізацыі работы з працуючай моладдзю, падлеткамі, якія стаяць на ўліку ў інспекцыі па справах непаўналетніх, прадастаўлення адпаведнымі арганізацыямі аб’ёмаў работ для студэнцкіх атрадаў і інш.