Прафесія медыцынскага работніка спакон веку лічыцца адной з самых паважаных
і запатрабаваных і ў той жа час – неверагодна адказнай: ад рашэнняў, прымаемых людзьмі ў белых халатах, залежыць якасць здароўя, а часам нават і жыццё пацыентаў.

Зараз у сістэме аховы здароўя насельніцтва Кіраўшчыны задзейнічана 40 урачоў і 179 прадстаўнікоў сярэдняга медыцынскага персаналу. Спектр іх прафесійных абавязкаў даволі шырокі: штодзённы клопат аб здароўі насельніцтва, прафілактыка захворванняў, вяртанне пацыентаў да паўнавартаснага жыцця – усё гэта патрабуе ад медыкаў кампетэнтнасці, а таксама пачуцця высокага грамадзянскага абавязку. Па словах намесніка галоўнага ўрача ЦРБ па амбулаторна-паліклінічным абслугоўванні насельніцтва Таццяны Комар-Маскалёвай, у медыцыне не бывае выпадковых людзей: “Не памылюся, калі адзначу, што кожны з членаў нашага калектыву абраў сваю прафесію па закліку сэрца. Хтосьці марыў аб ёй з дзяцінства, для кагосьці прыкладам былі родныя – медыкі, іншыя ж імкнуліся дапамагаць людзям. Варта разумець, што прафесія медработніка – не з лёгкіх, нават з пункту гледжання навучання і станаўлення. Каб стаць добрым доктарам альбо медсястрой, неабходна шмат вучыцца і старанна працаваць. Акрамя таго, міласэрнасць, дабрыня, паважлівае стаўленне да людзей – якасці, якія павінны быць надзейным падмуркам у прафесіі для кожнага з яе прадстаўнікоў. Нездарма ж яна лічыцца самай гуманнай у свеце”.

На думку Таццяны Комар-Маскалёвай, акрамя кампетэнтнасці работнікаў установы аховы здароўя немалаважныя і ўмовы, у якіх пацыенты атрымліваюць меддапамогу і працуе персанал. На сённяшні дзень медыцынскія паслугі насельніцтву раёна прадастаўляюцца ў цэнтральнай райбальніцы на 119 ложкаў, у сельскай мясцовасці дзейнічаюць Любоніцкая бальніца сястрынскага догляду, Жыліцкая і Любоніцкая амбулаторыі ўрача агульнай практыкі і 14 фельчарска-акушэрскіх пунктаў.
Першасную меддапамогу жыхары атрымліваюць у цэнтральнай раённай паліклініцы, разлічанай на 250 наведванняў у змену. Яе маштабная рэканструкцыя, праводзімая на працягу некалькіх год і завершаная летась, стала значнай падзеяй: з’явілася магчымасць не толькі якаснага, але і больш камфортнага абслугоўвання.
Наогул, за мінулы год і з пачатку бягучага матэрыяльна-тэхнічная база райбальніцы значна палепшылася. Па ініцыятыве і з актыўным удзелам сельгасарганізацый раёна адрамантаваны палаты на другім паверсе хірургічнага корпусу; ва ўсіх кабінетах паліклінічнага аддзялення заменена офісная і медыцынская мэбля, набыты новы медінвентар; са сродкаў абласнога бюджэту закуплены сучасны апарат ультрагукавой дыягностыкі; аддзяленне хуткай медыцынскай дапамогі папоўнілася новай карэтай хуткай дапамогі; у хірургічным корпусе ўсталявалі новы ліфт, на якім перавозяць пацыентаў з аперацыйнай у рэанімацыйнае аддзяленне; абноўлена стаматалагічнае аддзяленне. Яшчэ адна прыемная падзея адбылася некалькі тыдняў таму: рэгіянальная дырэкцыя ААТ “Белаграпрамбанк” па Магілёўскай вобласці перадала райбальніцы падарункавы сертыфікат на 20 камп’ютараў.
Зараз вядзецца добраўпарадкаванне Мышкавіцкага ФАПа: абнаўляецца фасад, мяняюцца вокны, праводзіцца касметычны рамонт унутраных памяшканняў.

Летась калектыў медработнікаў значна папоўніўся маладымі спецыялістамі. Шлях у прафесію ў Кіраўскай ЦРБ пачалі 18 чалавек. Таццяна Комар-Маскалёва адзначае, што гэтыя маладыя ўрачы і медсёстры – зацікаўленыя ў абранай справе, цярплівыя, жадаюць развівацца ў прафесіі і шчыра дапамагаць людзям. Вядома ж, арганізацыя аказання медыцынскай дапамогі абапіраецца на вопыт і напрацоўкі спецыялістаў, якія не адзін дзясятак год прысвяцілі рабоце ў райбальніцы.
На сённяшні дзень у ЦРБ вядуць прыём 7 урачоў агульнай практыкі, неўролаг, 2 хірургі, ЛОР-урач, дэрматавенеролаг, 2 гінеколагі, інфекцыяніст, 2 псіхіатры, псіхолаг, 3 педыятры, а таксама ўрач-тэрапеўт – загадчык аддзялення дзённага знаходжання. У жніўні чакаюць прыбыцця ўрача-афтальмолага – яшчэ аднаго маладога спецыяліста.

З кагорты тых, для каго наша ЦРБ стала адпраўной кропкай у самастойнае плаванне ў медыцыне, – ураджэнка Магілёва Марыя Карытка. Летась яна – выпускніца Віцебскага дзяржаўнага медуніверсітэта – прыступіла да выканання абавязкаў урача агульнай практыкі. Стаць доктарам яе падштурхнуў прыклад сястры, якая таксама знайшла прызванне ў медыцынскай справе. Вядома ж, пандэмія COVID-19 значна ўскладніла работу маладога медыка. Аднак, як падкрэс­ліла Марыя Сяргееўна, праца ў такіх умовах садзейнічала хуткай адаптацыі ў прафесіі і стала моцным штуршком для далейшага развіцця. Зараз Марыя Карытка шчыруе ў саставе каманды медыкаў, якія праводзяць вакцынацыю насельніцтва супраць каранавіруснай інфекцыі. Разам з ёй у прышчэпачным кабінеце працуе медсястра аддзялення дзённага знаходжання з 28-гадовым стажам Ала Костка. Жанчына – карэнная кіраўчанка – з дзяцінства марыла быць медработнікам. Як пазней пацвердзілася, – невыпадкова: веды і навыкі, набытыя ёй падчас навучання ў Бабруйскім медыцынскім вучылішчы, а таксама напрацоўваемы вопыт спатрэбіліся, калі захварэла яе маці, Алла Андрэеўна магла аказваць дапамогу роднаму чалавеку. Яна прызналася, што вельмі любіць сваю прафесію і ніколі не пашкадавала аб выбары. Самае складанае для ее – перажыванне за пацыентаў, па прызнанні медсястры, амаль за кожнага яна хвалюецца, прыкладвае максімум асабістых намаганняў, каб дапамагчы.

У мінулым жніўні педыятрычную службу раёна папоўніў малады ўрач, выпускнік Гродзенскага дзяржаўнага медыцынскага ўніверсітэта Дзяніс Мацюшонак. Нарадзіўся ён у суседнім Клічаве, з дзяцінства перад вачамі быў прыклад маці, якая шчыруе старэйшай медсястрой у рэанімацыйным аддзяленні Клічаўскай ЦРБ, таму з выбарам будучай прафесіі вызначыўся адразу. Па словах Дзяніса Генадзьевіча, лячыць самых маленькіх пацыентаў – вельмі адказна, для гэтага варта быць выдатным дыягностам, які падчас першаснага агляду здольны беспамылкова ацаніць стан дзіцяці і неадкладна ака­заць патрэбную кваліфікаваную дапамогу.
На замацаваным за ім участку малады педыятр працуе з вопытнай медсястрой Анастасіяй Калеснікавай, якая ў медыцынскай справе – больш за 15 год, і ўвесь гэты час яна – у педыятрычным аддзяленні. У прафесію Анастасія Пятроўна таксама трапіла невыпадкова: з маленства “лячыла” цацкі, хатнюю жывёлу і марыла насіць на будучай рабоце беласнежны халат – асноўнае адрозненне медработнікаў, сімвал служэння людзям. Да выканання сваіх абавязкаў медсястра ставіцца з пачуццём высокай адказнасці і лічыць, што акрамя добрай кампетэнцыі медработнікі павінны быць добразычлівымі і ўважлівымі, умець вы­слухаць і падтрымаць пацыента ў цяжкую для яго хвіліну.

Урачы агульнай практыкі Марына Рудзянкова і Таццяна Цыбуля – таксама з ліку маладых спецыялістаў. У засваенні прафесіі яны ў тым ліку карыстаюцца парадамі старэйшай калегі Марыны Котавай, якая працуе ў райбальніцы з 2014 года, і памочніка ўрача агульнай практыкі Марыны Араевай – у райбальніцы з 2015-га.
Дапамагаць людзям быць здаровымі – высакародная справа. Часам, медыцынскія работнікі лечаць не толькі наша цела, але і душу, напаўняючы яе надзеяй і верай. Ну а самай галоўнай узнагародай за сваю працу лічаць здаровых удзячных пацыентаў, якія, нягледзячы ні на што, працягваюць жыццё і радуюцца кожнаму новаму дню.
Яўгенія БЯЛЬКО.
Фота Максіма МІКЕШЫНА.