Прыемная навіна прыйшла днямі ў наш раён: адразу два нашы землякі ўдастоены медаля “За працоўныя заслугі” — першы намеснік начальніка ўпраўлення сельскай гаспадаркі і харчавання райвыканкама Мікалай Баніфацьевіч Пад’ялоўскі і старшыня СВК “Калгас “Ніва” Іван Уладзіміравіч Рыняк.
Згодна адпаведнага Указа Кіраўніка дзяржавы Аляксандра Лукашэнкі ад 22 красавіка 2015 г. №170, у ліку заслужаных людзей краіны яны ўдастоены высокай дзяржаўнай узнагароды за шматгадовую плённую працу, узорнае выкананне службовых абавязкаў, значны асабісты ўклад у дасягненне высокіх вытворчых паказчыкаў у сельскай гаспадарцы.

У гэтыя веснавыя дні і ў галоўнага тэхнолага палёў Мікалая Пад’ялоўскага, і ў кіраўніка сельгасарганізацыі Івана Рыняка аднолькавыя клопаты: належным чынам арганізаваць і своечасова правесці ўвесь комплекс веснавых палявых работ, каб атрымаць выдатны ўраджай збожжавых, зернебабовых культур, агародніны, назапасіць дастатковую колькасць якасных кармоў для прадстаячай зімоўкі грамадскага статка.
Абодва кіраўнікі — граматныя, прынцыповыя, адказныя, яны душой хварэюць за агульную справу. Тым больш, што жывуць і працуюць яны ў родным раёне, абодва з адной мясцовасці. Яны нарадзіліся на так называемай “куйбышаўскай зямлі”, тут працавалі іх бацькі, дзяды, прадзеды, якія стаялі ля вытокаў стварэння роднай для абодвух гаспадаркі, якая, пачынаючы з 1930 года, пераўтваралася, да яе далучаліся розныя падраздзяленні і зараз СВК “Калгас “Ніва” — адна з лідзіруючых сельгасарганізацый раёна па вытворча-эканамічных паказчыках гаспадарчай дзейнасці.
І не толькі абавязак перад землякамі, але і сумленне, адказнае стаўленне да даручанай справы, а інакш яны не могуць працаваць, аб’ядноўваюць Мікалая Пад’ялоўскага і Івана Рыняка. А яшчэ — любоў да зямлі, якую прывівалі ім іх бацькі. Дарэчы, Б.Д.Пад’ялоўскі-старэйшы ў 1960 годзе ў ліку іншых працаўнікоў тагачаснага калгаса імя Куйбышава быў узнагароджаны знакам “Пераможца пяцігодкі”. Сярод перадавікоў гаспадаркі былі і бацькі Івана Рыняка.
М.Б. Пад’ялоўскі і І.У.Рыняк не падвялі сваіх бацькоў, яны карыстаюцца заслужанай павагай у аднавяскоўцаў, сваіх падначаленых, кіраўніцтва раёна, вобласці, рэспублікі. Іх дасягненні — гэта вынік не толькі стараннай працы, але і людзей, якія шчыруюць пад іх умелым кіраўніцтвам на розных участках.
Дарэчы, у мінулым годзе падчас правядзення абласнога фестывалю-кірмашу “Дажынкі-2014” на галоўнай сцэне СДК а/г Мышкавічы М.Б.Пад’ялоўскаму была ўручана Ганаровая грамата Савета Міністраў Рэспублікі Беларусь. На працягу чатырох дзесяцігоддзяў Мікалай Баніфацьевіч працуе ў раслінаводчай галіне, з іх 33 гады — у райсельгасхарчы. За гэты час ён вывучыў кожнае поле сельгасарганізацый, ведае кожнага земляроба.
І.У.Рыняк быў удастоены спецыяльнай прэміі Магілёўскага аблвыканкама “Чалавек года-2006”.
Сёлетнія ўзнагароды, якімі адзначана іх выніковая праца, надаюць большай адказнасці перад землякамі. І ў тым, што яны і ў далейшым будуць плённа працаваць на карысць роднай Беларусі, нікога не трэба пераконваць.
Віншуем нашых землякоў з заслужанай узнагародай!
Таццяна БАРАДЗІНА.