У мэтах стымулявання высокапрадукцыйнай працы прэзідыум райкама прафсаюза работнікаў АПК узнагародзіў падзячнымі пісьмамі і каштоўнымі падарункамі трактарыстаў-машыністаў сельгаспрадпрыемстваў, якія дасягнулі найлепшых вынікаў у ходзе працоўнага спаборніцтва на нарыхтоўцы кармоў з траў першага ўкосу. Ім таксама ўручаны наклейкі-аплікацыі райкама. На касьбе траў вылучыліся Мікалай Белакурскі з СВК “Рассвет” імя К.П.Арлоўскага, Юрый Фралоў з СВК “Калгас “Беларусь”, Раман Канавалаў з КСУП “Жылічы”, Мікалай Казакоў з СВК “Калгас “Свярдлова”, Міхаіл Галомзік з СВК “Добасна-агра”. Лепшымі на падборцы і здрабненні зялёнай масы прызнаны Міхаіл Вербенка з СВК “Рассвет” імя К.П.Арлоўскага, Фёдар Петрусёў з СВК “Добасна-агра”, Сяргей Лебедзеў з СВК “Калгас “Ніва”. На зграбанні, варушэнні і валкаванні траў вызначыўся Леанід Цяніцкі з СВК “Чырвоны баец”. Добрых вынікаў дабіліся механізатары з ААТ “Кіраўскае райаграпрамтэхзабеспячэнне” Яўген Рудак (на нарыхтоўцы сенажу і сена ў стрэч-плёнку) і Сяргей Гамалін (на прасаванні сена). ______________________________________________ З года ў год на нарыхтоўцы кармоў для грамадскага статка механізатары СВК “Чырвоны баец” працуюць старанна і зладжана. Пацвярджэнне таму — пастаянны пераходны запас сенажу: з мінулага года  яго тут засталося 1,5 тыс. тон. І сёлета, нягледзячы на няўстойлівае надвор’е,  механізатары таксама забяспечылі выкананне пастаўленых перад імі задач. Так, з траў першага ўкосу закладзена ў траншэі амаль 4,5 тыс. тон сенажу, запакавана ў стрэйч-плёнку 86 т сянажнай масы, закладзена ў ямы 590 т сіласу.  Маючы свабодныя адзінкі тэхнікі, механізатары змаглі дапамагчы сваім суседзям з СВК “Калгас “Ніва” своечасова ўбраць травы, нарыхтаваць неабходную колькасць сенажу і сена. А наогул, у сельгас-прадпрыемстве да прадстаячага зімова-стойлавага перыяду належыць нарыхтаваць яшчэ 7,5 тыс. тон сенажу і 120 тон сена. У пераліку на кармавыя адзінкі плануецца мець 31 ц травяных кармоў. Значны ўклад у агульную справу ўнёс Леанід Цяніцкі, які на МТЗ-1221 з граблямі “Миллениум” у сярэднім за дзень зграбаў, варушыў і валкаваў сянажную масу на плошчы 70 га. Дасягнутыя поспехі далі магчымасць стаць лепшым у ліку іншых механізатараў раёна на нарыхтоўцы кармоў з траў першага ўкосу. Леанід Леанідавіч — вопытны механізатар. Яшчэ ў дзяцінстве ён прызвычаіўся да калгаснай працы, калі прыходзіў да бацькі на мехдвор. І пасля заканчэння мясцовай школы перад ім не паўстала пытанне, кім стаць. Кіраўніцтва гаспадаркі выдзеліла яму трактар, які хлопец поўнасцю перабраў сваімі рукамі. І давераная яму тэхніка не падводзіла. Пасля службы ў арміі Леанід вярнуўся ў родную гаспадарку і на працягу амаль трыццаці гадоў сумленна працуе на ўсіх палявых работах. Зараз механізатары заняты падрыхтоўкай сельгастэхнікі да прадстаячай уборкі збожжавых і зернебабовых культур, далейшай нарыхтоўкі кармоў для грамадскага пагалоўя. Таццяна Барадзіна. Фота Максіма Мікешына. На здымку: механізатар Леанід Цяніцкі.