Амаль два дзесяцігоддзі звязваюць сяброўскія ўзаемаадносіны наш Кіраўскі раён і Белгародскі раён Расійскай Федэрацыі. Гэты час умясціў шмат дзелавых і сяброўскіх сустрэч, абмен дэлегацыямі, сумесныя святы, дзіцячы адпачынак падчас летніх канікулаў у абодвух рэгіёнах і г.д. Аб усім гэтым распавядае экспазіцыя дружбы нашых раёнаў, якая дзейнічае ў раённым Доме культуры.

Наша дружба і супрацоўніцтва працягваюцца. Зараз былы кіраўнік Адміністрацыі Белгародскага раёна Сяргей Цюцюноў, які ўнёс вялікі ўклад ва ўмацаванне дружбы братніх народаў, узначальвае Белгародскі навукова-даследчы інстытут сельскай гаспадаркі. Ён стаў прыхільнікам арганізацыі аздараўлення супрацоўнікаў інстытута, работнікаў яго падраздзяленняў у рассветаўскім санаторыі імя К.П.Арлоўскага, а разам з тым, наладжвання абмену вопытам у сельгасарганізацыях раёна.
Сам Сяргей Цюцюноў на чале дэлегацыі інстытута пабываў на Кіраў-шчыне падчас правядзення абласнога фестывалю-кірмашу працаўнікоў вёскі “Дажынкі-2014”. А нядаўна ў санаторыі адпачывала група работнікаў Белгародскага навукова-даследчага інстытута сельскай гаспадаркі на чале з начальнікам службы бяспекі і супрацьдзеяння карупцыі Мікалаем Сафонавым, які ўжо не раз бываў на Кіраўшчыне. Мікалай Васільевіч падзяліўся з журналістамі “раёнкі” сваімі думкамі і ўражаннямі:
— Кіраўскі і Белгародскі раёны аб’ядноўвае шматгадовая дружба. Мне вельмі падабаецца Кіраўскі раён сваёй прыгажосцю, чысцінёй. Тут адказна, добрасумленна ставяцца да сваёй работы кіраўніцтва раёна, кіраўнікі сярэдняга звяна, жыхары Кіраўшчыны — заўжды ёсць чаму павучыцца. На высокім узроўні вытворчая дзейнасць, вырашэнне пытанняў навядзення парадку на зямлі і іншых тэрыторыях, правядзенне культурна-масавых мерапрыемстваў. Вось і на “Дажынках” мы адчулі шчырасць, з якой у вас прымалі гасцей, тое, што ў падрыхтоўку фестывалю-кірмашу ўклалі ўсю душу не толькі рассветаўцы, але і прадстаўнікі іншых сельгасарганізацый, насельніцтва — атрымалася цудоўнае, запамінальнае свята!
Падчас нашага знаходжання на Кіраўшчыне ў нас была сустрэча ў райвыканкаме з новым кіраўніком раёна Аляксандрам Міхайлавічам Бутаравым: у ходзе размовы мы закранулі пытанні эканамічнага і сацыяльнага развіцця Кіраўскага і Белгародскага раёнаў, спыніліся на такім актуальным зараз пытанні, як правядзенне пасяўной кампаніі. І, безумоўна, асаблівае месца прысвяцілі перспектывам нашай дружбы: выказалі агульную ўпэўненасць, што яна будзе працягвацца.
Хвалюючай і запамінальнай была наша паездка на мемарыяльны комплекс “Памяці спаленых вёсак Магілёўскай вобласці “ ў в.Боркі. Яна стала асабліва сімвалічнай напярэдадні святога для беларусаў і расіян свята — 70-годдзя Вялікай Перамогі.
Мы звярнулі ўвагу на тое, наколькі шматлікай была колькасць населеных пунктаў Магілёўшчыны, якія сваім вогненным крылом закранула вайна. І абмяняліся з беларускімі сябрамі думкамі, што павінна быць неўміручай памяць аб тых людзях, якія адстаялі мір і спакой на нашай зямлі, аддалі жыцці ў барацьбе з фашызмам, данесці гэта да маладога пакалення, каб яно ведала цану міру, каб не дапусціць такіх падзей, якія адбываюцца ва Украіне.
Мы ўсклалі да мемарыяла вянкі і кветкі, паставілі свечкі ў капліцы ў гонар іконы Божай Маці “Взыскание погибших”.
Была ў праграме нашага знаходжання ў раёне і дзелавая паездка па абмене вопытам у СГФ “Чыгірынка”, на малочна-таварную ферму “Колбава”. Паколькі ў саставе нашай дэлегацыі былі і даяркі, іх вельмі цікавіла, як утрымліваецца буйная рагатая жывёла, якія надоі, тэхналагічны працэс, а таксама тое, якія ўмовы створаны для працы і адпачынку жывёлаводаў. Белгародцы пачэрпнулі для сябе шмат карыснага, па прыездзе раскажуць аб гэтым сваім калегам.
Ну, і нельга не падзяліц-ца ўражаннямі аб рассветаўскім санаторыі: умовы аздараўлення і адпачынку створаны выдатныя, людзі, якія тут працуюць, —добрыя, шчырыя, цудоўныя спецыялісты. Умела кіруе калектывам В.У.Гаршкова, якая ўнесла важкі ўклад у развіццё дружбы і супрацоўніцтва нашых рэгіёнаў, не раз бывала на Белгародчыне, яе ў нас добра ведаюць, паважаюць.
Хочацца дадаць, што мы прыехалі на Кіраў-шчыну з падарункамі: прывезлі саджанцы дрэў: каштана, дуба, абрыкоса для пасадкі на тэрыторыі санаторыя ў гонар нашай дружбы.
На здымку: кіраўнік дэлегацыі белгародцаў Мікалай Сафонаў (у цэнтры), дырэктар санаторыя імя К.П.Арлоўскага, старшыня раённай арганізацыі ГА «Беларускі фонд міру» Вольга Гаршкова, старшыня раённай арганізацыі РГА «Белая Русь» Васіль Маркевіч і госці з Белгародчыны на тэрыторыі санаторыя.
Фота
Максіма МІКЕШЫНА.