Розныя эмоцыі выклікае ў людзей музыка духавых аркестраў, у залежнасці ад нагоды яе гучання, месца і часу. З даўніх часін маршыруюць духавыя аркестры па плошчах, іграюць у парках, на сцэнах палацаў і ў невялікіх залах і нікога не пакідаюць раўнадушнымі. Як і народны духавы аркестр “Фанфары Кіраўска”, з дня ўтварэння якога нядаўна споўнілася 35 год. З нагоды гэтай адметнай падзеі на сцэне раённага Дома культуры адбылося ўрачыстае мерапрыемства, якое наведала нямала аматараў духавой музыкі горада і раёна. Вечар быў па-дамашняму шчырым і цёплым.

Нязменны кіраўнік аркестра Аляксандр Хадакоў, як адзначылі вядучыя, “мудры настаўнік, таленавіты педагог, галоўны дырыжор”, нагадаў старонкі станаўлення і развіцця творчага калектыву, яго дасягненні, якіх было нямала на абласным і рэспубліканскім узроўнях, і, безумоўна, з асаблівымі пачуццямі расказаў пра ўдзельнікаў аркестра, пачынаючы з першых яго крокаў і завяршаючы сённяшнімі выхаванцамі. Уся праграма суправаджалася фотапрэзентацыяй з гісторыі калектыву.
Ля вытокаў стварэння аркестра стаялі і аддалі яму шмат год Уладзімір Каранкевіч, Ігар Каранкевіч, Сяргей Хадакоў, Міхаіл Дайнека, Ула­дзімір Ваакс, Віктар Ціхановіч, Аляксандр Царыкаў, Вячаслаў Нявінскі, Віталь Іваніцкі.
Разам з аркестрам уся зала, стоячы, ушанавала памяць былых музыкантаў аркестра, якія пакінулі гэты свет.
Юбілейны вечар рыхтаваўся з удзелам цяперашніх выхаванцаў “Фанфараў Кіраўска”, ранейшых, некаторыя з якіх зай­маюцца ці закончылі ўстановы адукацыі музычнай накіраванасці.
Колькі юнакоў за доўгія гады прайшло праз гэты калектыў, развіваючыся творча, шліфуючы сваё майстэрства. Калісьці і сам Аляксандр Хадакоў, будучы школьнікам, прыехаўшы ў Кіраўск з бацькамі з г.Каменска-Шахцінскага Растоўскай вобласці, разам з братам Сяргеем хадзіў на заняткі духавога аркестра мясцовай музычнай школы. І гэтае захапленне ператварылася ў справу ўсяго жыцця. Закончыўшы Магілёўскае музычнае вучылішча імя М.А.Рымскага-Корсакава, Мінскі інстытут культуры, Аляксандр Уладзіміравіч шмат год працуе выкладчыкам гарадской дзіцячай школы мастацтваў і кіруе духавым аркестрам РДК.
Яго музыканты паказалі спаўна, на што здатныя: гучалі самыя розныя мелодыі, знаёмыя ўсім і таму ўспрымаемыя гледачамі шчыра, узнагароджваемыя авацыямі. Па-майстарску выступілі, праявіўшы сябе сапраўднымі віртуозамі, Ягор Ляоненка, Уладзіслаў Нявінскі, Юрый Гушчын, Аляксей і Аляксандр Шапялевічы, Кірыл Шамедзька, Міхаіл Бухенка, Наталля Лазарчык, Уладзіслаў Чэкулаеў, Мікіта Бокі, Ула­дзіслава Харлінская, Вадзім Арцюхоў, Данііл Папоў і іншыя.
Нечакана на сцэну выйшаў з віншаваннямі былы ўдзельнік “Фанфараў Кіраўска” Аляксандр Усцінчык, які спецыяльна прыехаў з Санкт-Пецярбурга, дзе працуе ў прафесійным духавым аркестры.
Гучалі песні ў суправаджэнні калектыву-юбіляра. А “Чертово колесо” ў выкананні Сяргея Лаўрыненкі, “ Пусть тебе приснится Пальма-де-Майорка” — Аляксандра Хадакова проста ўзарвалі залу.
З віншавальнымі словамі ад імя раённага выканаўчага камітэта, сябе асабіста звярнуўся да ўдзельнікаў аркестра і яго кіраўніка намеснік старшыні райвыканкама Вячаслаў Нявінскі. Ён адзначыў, што народны духавы аркестр “Фанфары Кіраўска” — жаданы госць на ўсіх гарадскіх і раённых мерапрыемствах. Усе гады калектыў дарыў людзям цеп­лыню, дабрыню, далучаючы іх да музыкі. Вячаслаў Вітальевіч нагадаў, што ён — вучань
А.У.Хадакова, больш за 15 год быў у саставе аркестра, іграў партыю першага тэнара, а зараз працягвае музычны шлях сын Уладзіслаў.
Раней, успомніў былы выхаванец творчага калектыву, яны ігралі ў асноўным маршы, вальсы, класіку, а зараз аркестр іграе блюз, джаз, твіст. “Прыемна пачуць гэтыя мелодыі, добра, што ёсць таленавітая моладзь, якая творча расце, значыць, ёсць будучыня ў аркестра!” — канстатаваў Вячаслаў Нявінскі.
За шматгадовую добрасумленную працу, прафесійнае майстэрства, вялікі асабісты ўклад у эстэтычнае выхаванне падрастаючага пакалення і з нагоды 35-годдзя ўтварэння народнага духавога аркестра “Фанфары Кіраўска” Ганаровай граматай райвыканкама быў узнагароджаны кіраўнік творчага калектыву Аляксандр Хадакоў, Падзячнымі пісьмамі — удзельнікі аркестра Сяргей Бялянка, Сяргей Лаўрыненка.
Гучалі віншаванні ад аддзела ідэалагічнай работы, культуры і па справах мола­дзі райвыканкама, кіраўніцтва цэнтральнай клубнай сістэмы раёна, дзіцячай школы мастацтваў г.Кіраўска, бацькоў выхаванцаў аркестра і проста аматараў духавой музыкі.
Завяршыла канцэртную праграму светлая і патрыятычная песня “Белая Русь” у суправаджэнні духавога аркестра, якую, стоячы, спявала разам з салістамі ўся зала.
Гледачы развітваліся з музыкантамі з надзеяй на новыя творчыя сустрэчы…
Наталля ХАДАКОВА.
Фота Максіма МІКЕШЫНА.