Як паведамляла раённая газета, СГФ “Чыгірынка” прысу-джана 1-е месца па выніках абласнога спаборніцтва ў 2014 годзе сярод сельскагаспадарчых і іншых арганізацый (іх філіялаў) па вытворчасці і продажу дзяржаве малака.

Журналісты “раёнкі” добра ведаюць, што развіццю жывёлагадоўчай галіны ў сельгасарганізацыі надаюць першачарговую ўвагу. Не раз пераканаліся ў гэтым, наведваючы тутэйшыя малочнатаварныя фермы, гутарачы з кіраўніцтвам, спецыялістамі, работнікамі жывёлагадоўчых аб’ектаў. І, безумоўна, ведаючы паказчыкі, якія маюцца на рахунку сельгасфіліяла.
З мэтай нарошчвання пагалоўя грамадскага статка, павелічэння вытворчасці і паляпшэння якасці малака поўнасцю рэканструяваны хлявы Нямкоўскай і Чыгірынскай малочнатаварных ферм, пабудавана сучасная МТФ у в.Колбава, дзе вытворчасць якаснага малака ажыццяўляецца па новых тэхналогіях. Гэтыя захады прадпрымаюцца па ініцыятыве і пры актыўнай падтрымцы галаўнога прадпрыемства на чале з Аляксандрам Несцеравым і яго намеснікам па сельскай гаспадарцы Аляксандрам Саханенкам, якія перакананы, што ўкладанне немалых сродкаў у мадэрнізацыю, будаўніцтва новых аб’ектаў — гэта ў канчатковым выніку клопат аб людзях, паляпшэнні іх дабрабыту і якасці жыцця.

У тым, што ў сельгасарганізацыі ладзяцца справы ў жывёлагадоўлі, значная заслуга ўсяго калектыву. Як падкрэсліў у размове падчас нашага нядаўняга наведвання сельгасфіліяла яго дырэктар Ігар Кузняцоў, усе ў іх працуюць старанна, да выканання сваіх абавязкаў ставяцца з адказнасцю. І механізатары, і жывёлаводы разумеюць, што ад вынікаў іх працы залежаць і дабрабыт гаспадаркі, і іх уласны. Трэба адзначыць, што сярэднямесячная заработная плата па гаспадарцы за студзень-красавік складае 5 млн. 642 тыс. руб., а ў аператараў машыннага даення — ад 6,5 да 7,5 млн. руб. (адна з самых высокіх сярод іншых сельгасарганізацый раёна). Немалую долю ў прыведзеных лічбах складаюць усемагчымыя даплаты: за якасныя паказчыкі, высокую прадукцыйнасць працы, строгае захоўванне тэхналагічных патрабаванняў.
Зараз дойны статак у СГФ складае 700 кароў, ён сфарміраваны ў асноўным са сваіх цялушак, размешчаны на дзвюх малочнатаварных фермах: “Колбава” і “Чыгірынка”. Вы-творчыя паказчыкі на абедзвюх амаль аднолькавыя. Надой на карову ў гэтыя дні складае ў сярэднім па 16,3 кг малака ў суткі. Штодня на прыёмныя пункты паступае звыш 11 тон якаснай прадукцыі пры таварнасці 95,5%. Пераважная большасць малака прадаецца гатункам “экстра”.
—Дзякуючы наладжанаму камп’ютарнаму суправаджэнню вытворчасці прадукцыі, ёсць магчымасць пастаянна кантраляваць якасць малака кожнай жывёліны, — адзначыла пры размове галоўны заатэхнік Любоў Корзун. — Калі здараецца змяншэнне паказчыкаў пэўнай каровы, адразу ж прымаюцца канкрэтныя меры.
Рэнтабельнасць вытворчасці малака за 5 месяцаў склала 15,3%.
З адказнасцю ў гаспадарцы ставяцца да нарыхтоўкі кармоў, надаючы асаблівую ўвагу іх якасці. Бо перакананы: чым карову накорміш — тое і атрымаеш. У запасе — не распачатая сіласная яма на 1000 т, 300 т якаснага сена. Зараз на корм жывёле выкарыстоўваецца і зялёная маса.
Значную ўвагу надаюць племянной рабоце. Тут лічаць, што 100-працэнтнае штучнае асемяненне дае магчымасць у далейшым атрымліваць высокапрадуктыўных кароў.
З адказнасцю ставяцца жывёлаводы да атрымання здаровага маладняку, яго вырошчвання і захаванасці. Пасля расцёлу аператары машыннага даення на працягу месяца самі выпайваюць цялятак. Затым іх перадаюць на дарошчванне на МТФ “Чыгірынка”, дзе даглядчыкамі працуюць Тамара і Аляксандр Гаўрылавы. Дарэчы, у маі месяцы сярэднясутачныя прывагі кожнага гадаванца па іх групе склалі 800 г.
Як заўважыла Любоў Корзун, каб пазбегнуць хвароб і захаваць высокую прадуктыўнасць кароў, трэба строга захоў-ваць усе тэхналагічныя патрабаванні: забяспечваць правільнае і збалансаванае кармленне, своечасова праводзіць усе ветэрынарныя апрацоўкі.
Кіраўніцтва гаспадаркі важным момантам лічыць стварэнне неабходных умоў як на працоўных месцах, так і ў вырашэнні бытавых умоў. На фермах усе працэсы механізаваны, у хлявах устаноўлены і пастаянна працуюць вентылятары, абсталяваны пакоі для адпачынку, маюцца неабходныя бытавыя прыборы. У кожнага жывёлавода ёсць магчымасць прыняць душ, памыць спецвопратку ў пральнай машыне.
Спыняцца на дасягнутым у сельгасарганізацыі не збіраюцца: тут стараюцца адшукваць новыя рэзервы і ўкараняць іх у практыку, бо ўпэўнены, што новыя тэхналогіі – шлях у будучыню.