Бытуе меркаванне, што сучасныя людзі — актыўныя карыстальнікі Інтэрнэта і прыхільнікі тэлебачання — рэдка чытаюць перыядычныя выданні. Аднак разнастайнасць выпісваемых газет і часопісаў сведчыць аб тым, што хапае і тых, хто застаўся верным сваім традыцыям і працягвае актыўна чытаць перыёдыку. Пагадзіцеся, прыемна ўвечары, прыйшоўшы з работы, сесці ў крэсла і ў цішы і спакоі прачытаць любімае выданне. Тым больш, што сучаснаму чалавеку, які імкнецца да адукаванасці, мабільнасці і паспяховасці, карысна мець на ўвазе жыццёвы арыенцір знакамітага Дэні Дзідро: «Человек, перестающий читать, перестает и мыслить».
Прыемна, што ў газеты “Кіравец” ёсць армія надзейных чытачоў і падпісчыкаў, якія шмат гадоў крочаць па жыцці з “раёнкай”. Частка з іх, а таксама шэраг іншых кіраўчан, завіталі ў мінулую сераду, 21 снежня, на Дзень падпісчыка, які праходзіў у раённым Доме культуры ў межах падпісной кампаніі на перыядычныя выданні на першае паўгоддзе 2017 года.

Начальнік аддзела ідэалагічнай работы, культуры і па справах моладзі райвыканкама Андрэй Карпук расказаў аб ходзе падпісной кампаніі ў раёне, а таксама аб тым, наколькі важна быць у гушчыні падзей, валодаць даставернай і дакладнай інфармацыяй.
На стэндах з узорамі перыядычных выданняў можна было пацікавіцца разнастайнымі газетамі і часопісамі.
Намеснік начальніка РВПС Таццяна Тарабуева афармляла падпіску на перыёдыку на 3 альбо 6 месяцаў будучага года.
Супрацоўнікі цэнтральнай бібліятэкі арга-нізавалі навагоднюю віктарыну, а работнікі РДК наладзілі канцэртную праграму, на якую завіталі Дзед Мароз і Снягурка.
Галоўны рэдактар газеты “Кіравец” Наталля Хадакова нагадала асноўныя вехі гісторыі нашай “раёнкі” і падкрэсліла, што Дзень падпісчыка — важная акцыя, якая накіравана на тое, каб зацікавіць новымі праектамі ранейшых падпісчыкаў і прывабіць новых. З гэтай мэтай рэдакцыя падрыхтавала шмат прыемных сюрпрызаў. Прайшла традыцыйная віктарына на веданне гісторыі і сучаснага дня “Кіраўца”. Найбольшую дасведчанасць прадэманстравалі няштатны аўтар газеты Л.М.Лукановіч, пенсіянерка Н.Ю.Расіч і выкладчык фізкультуры СШ №1 А.С.Каранкевіч, які заўсёды завітвае на Дзень падпісчыка з сям’ёй. Пераможцы віктарыны атрымалі прызы ад рэдакцыі.
Адбыўся розыгрыш суперпрыза сярод тых, хто падпісаўся на “Кіравец” прама падчас мерапрыемства. Тут зноў пашанцавала Н.Ю.Расіч — менавіта яна стала шчаслівым уладальнікам прыза — электрачайніка. Падпіску адразу на два экземпляры “раёнкі” аформіла кіраўчанка Г.Прыгажаева, а самым маладым падпісчыкам у гэты дзень стаў А.Карпенкін.
Была наладжана латарэя, падчас якой разыгралі прызы — бясплатныя падпіскі на “Кіравец”, віншаванні і аб’явы ў газеце, а таксама некалькі падарункаў. Практычна ўсім удзельнікам Дня падпісчыка дасталіся фірменныя календары “раёнкі”.
У межах бягучай падпісной кампаніі “Кіравец” прапануе цікавыя навагоднія бонусы, якія дзейнічаюць на працягу снежня і да канца студзеня 2017 года.
Наша раённая газета не адстае ад часу і папулярызуе свой сайт у сетцы Інтэрнэт — www.kirovsk.by. Наведвальнікаў сайта запрашаем прыняць удзел у новым фотаконкурсе “Мы сустракаем Новы год!”. Да 15 студзеня 2017 года чакаем фота аб тым, як вы альбо вашы блізкія сустракалі навагоднія і калядныя святы. Фотаздымкі можна прыносіць у рэдакцыю альбо дасылаць па электроннай пошце: kirovetc@mogilev.by. Лепшыя фота будуць надрукаваны на сайце раённай газеты “Кіравец”. Пераможцы атрымаюць прызы!
“Раёнка” імкнецца стаць для кожнага свайго чытача надзейным сябрам, дарадчыкам і цікавым субяседнікам. Жывы інтарэс да яе, які прадэманстравалі прыйшоўшыя на Дзень падпісчыка кіраўчане, не можа не радаваць. Дзякуючы такому неабыякаваму стаўленню, газета і надалей будзе старацца радаваць чытачоў актуальнымі публікацыямі пад традыцыйнымі і новымі рубрыкамі, крэатыўнымі ідэямі і новымі падыходамі да работы са сваёй аўдыторыяй.

Яўгеня БЯЛЬКО.

Фота Максіма МІКЕШЫНА.