Ажыўлена зараз на сенажацях раёна – ідзе масавая нарыхтоўка кармоў з траў першага ўкосу.

Традыцыйна высокія тэмпы касьбы забяспечвае механізатарскі атрад КСУП “Ніва-Барсукі”, у чым карэспандэнты “раёнкі” пераканаліся, пабываўшы на мясцовых палетках у мінулую пятніцу.
Кіраўніцтва і працаўнікі сельгаспрадпрыемства, як ніхто іншы, разумеюць важнасць своечасовага правядзення корманарыхтоўчай кампаніі: грамадскі статак у гаспадарцы вялікі, таму тут імкнуцца з максімальнай аддачай выкарыстоўваць кожны гектар.

На сельгаспалетках ва ўсю кіпіць работа. Першым свой МТЗ-3522 з 9-мятровай касілкай лідскай вытворчасці на касьбу траў вывеў вопытны механізатар Генадзь Макаронак. Пазней да яго далучыліся Мікалай Таранаў на МТЗ-1221 з “Sip-3000” і Сяргей Ярыгін на МТЗ-1025 з “Krone”. Зараз на кашэнні задзейнічана 4 касілкі.
На падборы і змяльчэнні зялёнай масы на КВК-800 шчыруюць Уладзімір Еўдакімаў і Алег Стальмакоў. На адвозцы ад камбайнаў задзейнічана 12 адзінак тэхнікі. У лідарах па дастаўцы духмяных змяльчоных траў да месцаў складзіравання на МТЗ-3022 с ПС-60 – Юрый Сямёнаў. Добрасумленна працуюць на адвозцы Аляксей Сямёнаў і Аляксей Макаронак, першы – на МТЗ-80 с ПС-9, другі – на МТЗ-80 з ПСТ-12. На магутных МАЗах адвозяць правяленую масу Васіль Марозаў і Уладзімір Ермалаеў.
Трэба адзначыць, што ніваўцы па-гаспадарску паставіліся да догляду за травастоем: падкормлены ўгнаеннямі ён радуе вока, а ўслед за касілкай застаюцца высокія густыя валкі свежаскошанай травы. “Зялёнае жніво” пачалі з нарыхтоўкі сенажу: балазе, некалькі дзён стаяла спякотнае надвор’е, таму травы хутка правяльваліся, ператвараючыся ў духмяны корм.
Як адзначыў намеснік дырэктара Аляксей Лан­куць, варта не прамарудзіць спрыяльны для ўборкі траў час, каб нарыхтаваць кармы з максімальным утрыманнем карысных рэчываў. У гэтым выпадку можна спа­дзявацца на важкія надоі і прывагі падчас будучай зімоўкі грамадскага статка.
Усяго мясцовым корманарыхтоўшчыкам неабходна скасіць травы першым укосам на 1245 га,
а таксама нарыхтаваць 740 т сена, 14 тыс. т сенажу і 17,5 тыс. т сіласу.
Па стане на ўчарашнюю раніцу травы скошаны на 710 га, што дазволіла нарыхтаваць 2715 т сенажу і 2675 т сіласу. Каля МТК у в.Капусціна ўжо закладзены дзве траншэі, па адной – у Ізабеліна і Барсуках.
Закладка кармоў у ямы вя­дзецца пад строгім кантролем спецыялістаў, яны нясуць поўную адказнасць за якасць масы. Для павышэння пажыўнасці корму абавязкова выкарыстоўваецца канцэнтрат. Зараз у траншэі кладуць правяленую канюшыну, у адной з ужо закрытых ям – свірэпіца.
Каля 500 т траў з дапамогай прэса запакавалі ў плёнку. Гэты адказны ўчастак работы даверылі вопытнаму механізатару Сяргею Гушчыну, які на МТЗ-1521 с «Comprima» хутка абгортвае сабраную масу, пакідаючы на палях вялізныя белыя рулоны.
Тэхніка, якая задзейнічана на “зялёным жніве”, ніваўцамі была своечасова і якасна пад­рыхтавана, што зараз дазваляе нарыхтоўваць кармы без прастояў і значных паломак. Належным чынам давялі да ладу і сянажныя траншэі.
Механізатарскае звяно поўнасцю ўкамплектавана адказнымі і стараннымі работнікамі, якія выконваюць пастаўленую перад імі задачу хутка і добрасумленна. Інакш мясцовыя працаўнікі і не могуць, бо ўсведамляюць, што ад асабістага ўкладу кожнага залежыць дабрабыт гаспадаркі і іх уласны.
Ёсць і добрыя стымулы, каб не прахалоджвацца на рабочым месцы. Кіраўніцтва паклапацілася, каб занятыя на корманарыхтоўцы былі забяспечаны ўсім неабходным: прама ў поле дастаўляюцца гарачыя смачныя абеды і вячэры, распрацаваны ўмовы спаборніцтва, якія прадугледжваюць маральнае і матэрыяльнае заахвочванне лепшых работнікаў.
Нарыхтоўка травяных кармоў у КСУП “Ніва-Барсукі” працягваецца. І калі не будзе перашкаджаць надвор’е, тэмпы правядзення касавіцы толькі павялічацца. А гэта значыць, што грамадскі статак будзе мець багаты і разнастайны рацыён кармоў.
Людміла СЯМЁНАВА.
Фота Максіма МІКЕШЫНА.