Пачаткам новых дасягненняў выпускнікоў сталі экзамены! Учора, 26 мая, 11-класнікі здавалі цэнтралізаваны экзамен па прадмеце па выбары. У нашым раёне найбольшай папулярнасцю, як і ў папярэднія гады, карыстаецца матэматыка, якую выбралі 18 чалавек. Па 12 выбралі біялогію і гісторыю Беларусі, грамадазнаўства – 11, фізіку – 8, англійскую мову – 4 і хімію – 2.
Другі цэнтралізаваны экзамен па рускай або беларускай мове рабяты будуць здаваць 29 мая. Трэба заўважыць, што сёлета беларускую мову выказалі жаданне здаваць толькі 6 выпускнікоў, рускую ж – 61.
Цэнтралізаваныя экзамены праходзяць на базе сярэдняй школы №2 г.Кіраўска імя К.П.Арлоўскага, дзе для 11-класнікаў створаны камфортныя ўмовы для правядзення іспытаў, да месца правядзення якіх вучняў давозяць арганізавана, на школьных аўтобусах, у суправаджэнні педагогаў.
Сёлета механізм правядзення цэнтралізаваных экзаменаў застаўся ранейшым. Аднак ёсць і навацыі. Перш за ўсё гэта тычацца мабільных тэлефонаў і сродкаў аўдыё-, відэа- і фотафіксацыі. Яны цяпер забаронены не толькі ў аўдыторыі, але і на ўсёй тэрыторыі пункта правядзення ЦЭ.