Чарговы восеньскі кірмаш па продажу сельгаспрадукцыі адбыўся ў мінулую суботу ў райцэнтры на вул. Ленінскай. З самага ранку тут было шматлюдна: сельгаспрадпрыемствы і арганізацыі, сялянска-фермерскія гаспадаркі, райспажыўтаварыства, Жыліцкі сельгаскаледж, ліцэй №15,  уласнікі прапаноўвалі разнастайны тавар, а пакупнікі з задавальненнем яго набывалі.

Хочацца адзначыць, што да ўдзелу ва ўсіх кірмашах з адказнасцю паставіліся прадстаўнікі райспажыўтаварыства: кожную суботу тут прапаноўваецца мноства відаў прадукцыі, а прыгожа ўбраная гандлёвая кропка прыцягвае да сябе пакупнікоў. Дарэчы, амаль увесь тавар, а гэта прадукцыя, закупленая ў насельніцтва, распрадаецца. Карыстаецца попытам капуста, морква, бульба, цыбуля, журавіны, фасоля. Па словах старшыні райспажыўтаварыства Святланы Сарока, гандляры з кірмашу заўсёды прывозяць да 350 рублёў.
Вялікім попытам карыстаецца збожжа: кожную суботу прадаецца ўсё прывезенае — пшаніца, жыта, ячмень, авёс. Так, насельніцтву ўжо рэалізавана 16 тон, з іх — 9 т ячменю, 5,5 — пшаніцы. Стаялі чэргі каля гандлёвых прылаўкаў СВК “Бераснёўскі” і “Калгас “Ніва”, ААТ “Дабаснянскае”, КСУП “Барчыцы-агра”, СГФ “Чыгірынка”, РАПТЗ і інш.
Па выніках трох кірмашоў лідарам па продажу з’яўляецца КСУП “Чырвоны баец”, які рэалізаваў мяса (у мясным павільёне на гарадскім рынку), яблыкаў, збожжа на 2121 руб.
Кожную суботу кіраўчане з задавальненнем набывалі жывую рыбу, агародніну, прапаноўваемыя СВК “Рассвет” імя К.П. Арлоўскага. Дзякуючы гэтаму, рассветаўцы папоўнілі грамадскую касу на 659 руб.
У мінулыя выхадныя стаяла чарга за рыбай, якую прывезла на продаж СФГ “Рыба”: значныя памеры карпаў, белых амураў, таўсталобікаў здзіўлялі пакупнікоў.
Ніводны гараджанін, які жадаў набыць саджанцы пладовых дрэў, парэчак (іх прапаноўвалі Жыліцкі сельгаскаледж і садаводы-аматары), не пайшоў без пакупак: усіх задавальняў іх выбар і кошт. Карысталася попытам і кустоўе рознакаляровых кветак, якія ўпрыгожвалі кірмаш. Іх вырошчваюць уласнікі.
Усе жадаючыя скарысталі транспартную паслугу, аказваемую райспажыўтаварыствам.
Каб гандаль ішоў весялей і актыўней, удзельнікі мастацкай самадзейнасці РДК і Баравіцкага СДК радавалі сваімі музычнымі нумарамі. Весялілі народ і казачныя персанажы.
Як паведамілі ў аддзеле эканомікі райвыканкама, кіраўчан чакаюць яшчэ 2 кірмашы. Таму ўсім жадаючым неабходна актывізавацца: адным — прадаць тавар, а другім — яго набыць.
Тэкст і фота
Таццяны
БАРАДЗІНОЙ.