Актыўна разгарнулася ўборачная кампанія ў СВК “Рассвет” імя К.П.Арлоўскага, дзе збожжавыя і зернебабовыя культуры займаюць плошчу каля 2725 га — найбольшую сярод астатніх сельгасарганізацый раёна.

Як адзначыў першы намеснік старшыні праўлення Аляксандр Жылінскі, гаспадарка поўнасцю ўкамплектавана механізатарскімі кадрамі. Людзі, занятыя на жніве, разумеюць усю важнасць і адказнасць пастаўленай перад імі задачы, а таму працуюць старанна і добрасумленна. Тым больш, што тэхніка ўся прадрыхтаваная, няма перабояў з гаруча-змазачнымі матэрыяламі, працаўнікі забяспечаны спецвопраткай і сродкамі аховы, гарачым харчаваннем.

Умовы аплаты, маральнага і матэрыяльнага стымулявання якаснай працы загадзя былі даведзены да ўдзельнікаў жніва. Акрамя таго яны былі праінфармаваны аб правядзенні працоўнага спаборніцтва, лідары якога атрымаюць каштоўныя падарункі і прэміі.
Каб правесці жніво ў сціслыя тэрміны і якасна, на палеткі гаспадаркі штодзённа выходзіць 12 камбайнаў, бесперапынную дастаўку збожжа на ачышчальна-сушыльныя комплексы дастаўляюць 10 адзінак тэхнікі.
Калі карэспандэнты “раёнкі” наведаліся на ячменнае поле каля в.Капусціна, там шчыравалі камбайнеры. Праз некалькі кругоў камбайна, ззяючы на сонцы, зерне сыпалася ў кузаў пад’ехаўшага аўтамабіля. Дарэчы, у гаспадарцы ўжо ўбрана 850 га, з планавых 11200 т намалочана 3790 т ячменю.
Тэмп уборцы, як і ў папярэднія гады, надаюць вопытныя хлебаробы. У ліку лідараў — экіпаж у саставе Івана Салановіча і Івана Багеля. Сёлетняя ўборачная кампанія для Салановіча ўжо 30-я, а яго памочнік-цёзка ўжо 7 год падчас свайго адпачынку (ён займае пасаду вядучага інжынера праектна-інжынернай группы холдынгу “Магілеўвадбуд”) дапамагае яму ўбіраць вырашчаны ўраджай. У дружным тандэме яны намалацілі ўжо амаль 500 тон збожжа.
Не адстаюць ад перадавікоў і іншыя экіпажы. Так, на рахунку Пятра Мухіна і Юрыя Нікафараўца каля 300 т. Не губляючы ні хвіліны, механізатары шчыруюць на збожжавым полі, тым самым набліжаючы завяршэнне ўборкі новага ўраджаю.
Як толькі камбайны пакідаюць палеткі, без прамаруджвання ўключаюцца ў работу прэс-падборшчыкі: яны ўбіраюць з палёў салому.
З года ў год рассветаўцы атрымліваюць адзін з самых высокіх ураджаяў у раёне (сёлета – 45 ц/га), таму можна з упэўненасцю сцвярджаць, што прозвішчы прадстаўнікоў гаспадаркі не раз будуць надрукаваны на старонках “раёнкі” ў ліку лідараў працоўнага спаборніцтва на жніве.
У гэтыя дні зладжанай уборцы перашкаджаюць дажджы, таму хлебаробам неабходна задзейнічаць усе рэзервы, каб у сціслыя тэрміны і з мінімальнымі стратамі ўбраць вырашчаны ўраджай, які ў народзе называюць простым, але вельмі важным словам «хлеб».
Анастасія ЛОГВІНАВА.
Фота
Максіма МІКЕШЫНА.