“Кладезь” — фестываль духоўнай спадчыны
На мінулым тыдні Кіраўшчына ў чарговы раз прымала на сваёй зямлі фестываль праваслаўнай культуры “Кладезь”. Гісторыю свайго падарожжа па гарадах і весях Беларусі фестываль пачаў у 2008 годзе і за гэты час пабываў у больш чым 60 населеных пунктаў краіны, прычым у многія гарады ён наведваецца кожны год.
Арганізатарамі фестываля выступілі Магілёўская і Мсціслаўская епархіі, райвыканкам, Сястрынства ў гонар св. княгіні Елісаветы (г.Мінск).
Адкрыццё фестывалю “Кладезь” і выставы-кірмашу, што размясціліся ў раённым Доме культуры, пачалося ўрачыстым малебнам перад абразамі з часцінкамі мошчаў святых апосталаў Пятра і Паўла і святога вялікамучаніка Панцеляймона, які правёў настаяцель Свята-Пакроўскага храма іерэй Дзмітрый Первій. А папярэднічаў гэтай падзеі хрэсны ход, які пачаўся ля сцен Свята-Пакроўскага храма і рушыў па вуліцах горада да месца правядзення фестывалю праваслаўнай культуры.
Падчас адкрыцця фестывалю яго гасцей і ўдзельнікаў вітаў начальнік аддзела ідэалагічнай работы, культуры і па справах моладзі Андрэй Карпук, які адзначыў важнасць духоўна-асветніцкай дзейнасці, праводзімай Свята-Елісавецінскім манастыром. Яна аб’ядноўвае людзей і нясе ім святло і дабро, дапамагае знайсці сапраўдны сэнс жыцця, далучае да духоўнасці. “Няхай фестываль праваслаўнай культуры ў чарговы раз пакіне светлы след у душах жыхароў нашага горада і раёна”, — адзначыў ён.
У межах фестывалю былі праведзены шматлікія мерапрыемствы і сустрэчы. Праект “Добрае кіно” даў гледачам магчымасць паглядзець цікавыя і змястоўныя мастацкія і дакументальныя кінастужкі: “Святы Аўгустын”, “Тры словы аб прабачэнні”, “ Таямніца Ягора ”, “Прытчы” і іншыя. Для вучняў устаноў адукацыі раёна былі арганізаваны праекты “Добрыя кнігі”, “Маладосць — час выбару”, “Праваслаўныя святыні Беларусі”, “Моладзь і праваслаўе”, для настаўнікаў — “Педагогіка і праваслаўе”.
Падчас рэалізацыі праекта “Музыка — выхаванне душы” быў арганізаваны канцэрт кампазітара, пісьменніцы, лаўрэата конкурсу “Залаты грамафон” Таццяны Дашкевіч.
З работнікамі райбальніцы была праведзена сустрэча, падчас якой абмяркоўваліся пытанні духоўна-маральных аспектаў медыцынскай этыкі. Кожны дзень маленькім гледачам дэманстраваліся прадстаўленні лялечнага тэатра “Батлейка”. Шчырую зацікаўленасць у наведвальнікаў выставы выклікала экспазіцыя “Скрыпторый”, якая была прысвечана гісторыі славянскага пісьменства. Тут можна было пазнаёміцца са зменамі, якія адбываліся з кнігамі па працягу соцень гадоў, як унікальныя творы шматгадовай працы манахаў ператварыліся ў электронны носьбіт інфармацыі.
На выставе-кірмашы быў прадстаўлены шырокі і разнастайны асартымент вырабаў майстэрняў Свята-Елісавецінскага манастыра. Наведвальнікі мелі магчымасць набыць іконы, царкоўныя рэчы, адзенне, кнігі, аўдыё- і відэадыскі, сувеніры, манастрыскі хлеб, мёд, лячэбную касметыку, травы і многае іншае. Усе сродкі ад продажу пойдуць на дабрачынныя справы, якімі займаецца Свята-Елісавецінскі манастыр, дапамагаючы дзецям і дарослым з асаблівасцямі псіхафізічнага развіцця, малазабяспечаным і мнагадзетным сем’ям, удзельнічаючы ў рэабілітацыі хворых на алкагалізм і наркаманію, асобаў, якія вызваліліся з месцаў пазбаўлення волі.
Цырымонія закрыцця фестывалю праваслаўнай культуры “Кладезь” адбылася ў мінулую нядзелю. Хочацца спадзявацца, што мерапрыемствы, праведзеныя ў рамках фестывалю, падарылі кожнаму яго наведвальніку часцінку веры, надзеі і любові, а таксама пакінулі добрыя эмоцыі ад дачынення да духоўнай спадчыны.
Людміла СЯМЁНАВА.
Фота аўтара.