Ужо ў сакавіку аматары свежай агародніны мелі магчымасць у гандлёвых кропках Мышкавіч, Кіраўска, Бабруйска, Магілёва і Расійскай Федэрацыі набыць таматы і агуркі з выбаркі сёлетняга года. Акрамя таго калектыў цяплічнага камбіната ААТ “Рассвет імя К.П.Арлоўскага” рабіў выганку цыбулі на пяро, а ў верасні плануе атрымаць першы ўраджай кавуноў. 

Рэсурсазберагальная тэхналогія
Для вырошчвання агародніны выдзелена 10 га цяплічных плошчаў, большую частку з якіх – 8 га – займаюць таматы. Галоўны тэхнолаг камбіната Марыя Бяляўская расказала, што летась было атрымана 3600 тон памідораў і 1076 тон агуркоў. Сёлетні сезон рассветаўскія агароднінаводы распачалі напрыканцы мінулага года – у снежні, менавіта тады палажылі ў глебу насенне. У сярэдзіне студзеня расада адправілася ў блокі.
Нагадаем, што вырошчванне агародніны ў цяплічным камбінаце таварыства наладжана па галандскай тэхналогіі – на малааб’ёмнай гідрапоніцы. Гэта значыць, што агародніну вырошчваюць без глебы, на штучных субстратах пры дапамозе пажыўных раствораў. У “Рассвеце” ў якасці субстрата ўжо некалькі год выкарыстоўваюць спецыяльную мінеральную вату для раслінаводства.
Аграном камбіната Таццяна Стэльмах расказала, што ў блок з мінеральнай ватай высаджваюць звычайна па дзве расліны. Напрыклад, сцябло таматаў за сезон можа вырасці ў вышыню да 15 метраў. З сакавіка да лістапада з раслін збіраюць плады. Да кожнай падведзена індывідуальная кропельніца, праз якую па спецыяльнай схеме ажыццяўляецца кропельны паліў, заснаваны на тым, што вада падаецца з пэўнымі інтэрваламі. Таццяна Стэльмах падкрэсліла, што сярод сучасных метадаў вырошчвання агародніны малааб’ёмная гідрапоніка займае асаблівае месца, бо яна экалагічна бяспечная, рэсурсазберагальная, эканамічна эфектыўная. Важна, што расліна атрымлівае з раствораў усе неабходныя пажыўныя рэчы ў патрэбнай колькасці і дакладных прапорцыях, таму расце моцнай і здаровай.
Кожны год – новы гатунак
Марыя Бяляўская займае пасаду галоўнага тэхнолага пяты год, а наогул у цяплічнай справе – з 1996-га. Да слова, у камбінаце было яе першае і пакуль што адзінае працоўнае месца. Таму Марыя Мікалаеўна добра ведае сваю справу – як гаворыцца, ад А да Я.
Перш чым разлічваць на добры ўраджай, трэба не памыліцца з выбарам гатункаў. М.М.Бяляўская адзначыла, што вырошчваюць правераныя віды таматаў і агуркоў, аднак кожны год спрабуюць і новыя – у пошуках больш устойлівых, пладавітых, прыстасаваных да ўмоў камбіната. Напрыклад, летась апрабавалі новы гатунак таматаў “алтадэна”. У мінулым сезоне пад яго было выдзелена 1,5 га, сёлета ўжо – 4,5 га. “Праверку на якасць і ўстойлівасць гэты гатунак прайшоў паспяхова, – адзначыла Марыя Мікалаеўна, – таму вырашылі пашырыць аб’ём вырошчвання. Робім стаўку менавіта на гэты від, бо летась атрымалі вялікія прыгожыя смачныя плады, акрамя таго пладаножка больш устойлівая і моцная: памідоры нават вялікіх памераў не абрываюцца і не падаюць уніз, а спакойна даспяваюць, што, зразумела, павялічвае ўраджайнасць.
Таксама на цяплічных палетках растуць таматы гатунку “сікурытус”, “тарэра”, навінка гэтага сезона – ружовыя памідоры “малуна” – усяго больш за 70 тысяч раслін. Агуркі высадзілі сярэднеплодных гатункаў “яні” і “магура”.

Добрасумленны калектыў
У цяплічным камбінаце працуе 172 чалавекі, больш за 100 з якіх – агароднінаводы. Зараз яны занятыя на зборы ўраджаю, доглядзе за раслінамі – фарміруюць куст, выдаляюць адпрацаваныя кісці, абрываюць жоўтае лісце і гэтак далей…
За змену – да слова, працоўны дзень для агароднінаводаў ў цяпліцы пачынаецца з 6 гадзін раніцы, пакуль на двары спрыяльная тэмпература, бо ў памяшканні камбіната тэмпературны рэжым такі, каб агародніна добра расла пры любых умовах надвор’я – і ў дождж, і ў спёку – адна цяплічніца здольная сабраць ураджай з 10 – 12 сотак. Летась лепшыя паказчыкі па збору таматаў былі на рахунку агароднінаводаў Валянціны Цішковай – ураджайнасць 53,36 кг з 1 кв.м і Марыны Арлоўскай – 51,94 кг з кв.м. Па агурках лідзіравалі Наталля Андрэева – 53,93 кг з кв. м і Кацярына Бельская – 53,53 кг з кв. м.
Свежазнятыя агурчыкі і памідорчыкі цяплічніцы складаюць у картонныя каробкі альбо пластмасавыя скрыні. На кожнай з іх указваецца прозвішча агароднінавода, гатунак расліны, нумар партыі, дата збору, тэмпература і тэрмін захоўвання, вільгаць пры захоўванні і інш. Марыя Бяляўская адзначае, што дробязей у іх справе не бывае, усё павінна быць адзначана, улічана, бо гэта адбіваецца на выніках работы і якасці атрыманай прадукцыі, а значыць і агульным дабрабыце калектыву.
Чакаем рассветаўскія кавуны!
Сёлета калектыў таварыства ўпершыню заняўся вырошчваннем кавуноў. Напрыканцы красавіка пасеялі насенне турэцкай селекцыі гатунку “місон” – найбольш падыходзячага да нашых прыродных умоў. Зараз расада – а гэта 30 тысяч раслін, якія знаходзяцца ў касетах з грунтам, чакае спрыяльнага надвор’я, каб з утульных і цёплых цяплічных умоў “перабрацца” ў адкрыты грунт. Для гэтага адведзена 5 га пасяўных плошчаў.
Ад семечка да смачнага плада кавунам трэба прайсці складаны шлях даўжынёй прыкладна ў 120 дзён. Да слова, плануемая ўраджай­насць гэтага гатунку дасягае да 100 т з 1 га.
Разам з расадай кавуноў сваёй чаргі перасаджвання ў адкрыты грунт чакае і расада позніх гатункаў капусты. Галоўнае зараз – каб хутчэй прыйшлі цеплыня і сонейка, а астатняе – за сумленнай працай рассветаўскіх агароднінаводаў!
Яўгенія БЯЛЬКО.
Фота Максіма МІКЕШЫНА.