28 снежня прэм’ер-міністр Рэспублікі Беларусь Андрэй Кабякоў па даручэнні Прэзідэнта краіны ўручыў дзяржаўныя ўзнагароды шэрагу прадстаўнікоў розных сфер дзейнасці за шматгадовую плённую працу, узорнае выкананне службовых абавязкаў, высокі прафе-сіяналізм. Вельмі прыемна, што сярод узнагароджаных медалём “За працоўныя заслугі” і кіраўчанін Уладзімір Комар, трактарыст-машыніст ААТ “Кіраўскае райаграпрамтэхзабеспячэнне”.
Па прыездзе на Кіраўшчыну павіншавалі земляка з высокай адзнакай яго адказнай працы журналісты “раёнкі” і папрасілі падзяліцца ўражаннямі з чытачамі:
— Зразумела, мне і членам маёй сям’і, роднаму калектыву прыемна, што менавіта я трапіў у кагорту працаўнікоў, якія ўдастоены дзяржаўных узнагарод. Гэта надае ўпэўненасці ў сабе, а сэрца перапаўняе пачуццё гонару. Мой прыклад, спадзяюся, стане стымулам для іншых на стваральную, выніковую працу.
У Палацы Рэспублікі падчас мерапрыемства панавала ўрачыстая атмасфера. У адрас прысутных выказваліся шчырыя словы ўдзячнасці за добрасумленную працу.
Да гэтай узнагароды ішоў не адзін год: у кожную даручаную справу стараўся ўкласці часцінку сябе, выканаць любое заданне на сумленне, радаваўся поспехам роднага калектыву, засмучаўся нягодам. І так з дня ў дзень, з месяца ў месяц. І ніколі не ставіў для сябе мэтай працаваць дзеля ўзнагароды. Заўсёды помніў: зямля — наша карміцелька, і як да яе паставішся, як узорна будзеш выконваць любую работу з агульнага ланцуга, тое і атрымаеш.
Радуюся, што з пачуццём адказнасці ставяцца да справы і мае сыны. Дзмітрый таксама пастаянна ў ліку лепшых механізатараў раёна. Дарэчы, сёлета наш сямейны экіпаж на жніве намалаціў звыш 1000 т збожжа. Мікалай падчас летняга адпачынку прыязджае дадому са Слуцка і працуе камбайнерам у РАПТЗ. Як і я, абодва з дзяцінства прызвычаіліся да тэхнікі, палюбілі хлебаробскую справу, працуюць на заглядзенне.
Зараз я заняты на рамонце сельгастэхнікі. Неабходныя веды атрымаў у свой час падчас вучобы ў БСГА, маю значны вопыт. Кожны раз рамонтная справа патрабуе напружання сіл, строгага захавання тэхнікі бяспекі, працоўнай і тэхналагічнай дысцыпліны.
Не прыкмеціш, як надыдзе вясна, і трэба будзе выводзіць тэхніку ў поле. Упэўнены, што дружнаму і згуртаванаму калектыву райагра-прамтэхзабеспячэння па сіле працаваць эфектыўна. Прыемна, што побач з вопытнымі механізатарамі шчыруе моладзь, уносіць належны ўклад у дасягненне добрых вынікаў. А, значыць, наш раён, Пры-дняпроўскі край, родная Беларусь будуць і надалей стабільна развівацца, працвітаць.

Фота Максіма МІКЕШЫНА.