Узнёсла і ўрачыста прайшло на Кіраў-шчыне галоўнае свята беларускай дзяржаўнасці — Дзень Незалежнасці Рэспублікі Беларусь (Дзень Рэспублікі). Цудоўнае надвор’е, выдатны настрой у жыхароў раёна, музыка панавалі на працягу ўсяго дня. А самымі галоўнымі на свяце былі ветэраны Вялікай Айчыннай вайны: людзі, якія, не шкадуючы сябе, змагаліся з ненавісным ворагам. Дзякуючы  гераізму і мужнасці абаронцаў Айчыны сёння ўсе мы жывем у мірнай і незалежнай краіне.

Па традыцыі, святочныя мерапрыемствы пачаліся ля брацкай магілы воінаў і партызан, размешчанай па вул.Гагарына райцэнтра. Сюды прыйшлі ветэраны Вялікай Айчыннай вайны і працы, прадстаўнікі раённай улады, працоўных калектываў, грамадскіх аб’яднанняў, моладзь. Сярод іх быў Ганаровы грамадзянін Кіраўскага раёна Аляксандр Серакоў.
Была ўшанавана памяць загінуўшых. Адбылася цырымонія ўскладання вянкоў і кветак да брацкай магілы: першымі кошык з кветкамі ўсклалі старшыня райвыканкама Аляксандр Бутараў і старшыня раённага Савета дэпутатаў Надзея Каранкевіч.
Далей святочная калона на чале з экскортам машын, ганаровыя месцы ў якіх занялі ветэраны, пад гукі духавога аркестра рушыла па галоўнай вуліцы горада да стадыёна — там працягваліся святочныя ўрачыстасці.
Перад трыбунамі, дзе размясціліся ганаровыя госці — ветэраны вайны і працы, члены райвыканкама, кіраўчане — святочным маршам праходзяць дэлегацыі працоўных калектываў раёна. Адкрыў шэсце калектыў райаграпрамтэхзабеспячэння, які прызнаны пераможцам раённага спаборніцтва за мінулы год сярод сельскагаспадарчых арганізацый, калектываў жывёлагадоўчых ферм, фермерскіх гаспадарак у намінацыях “За лепшыя вынікі вытворча-эканамічнай дзейнасці” і “За павелічэнне вытворчасці і нарыхтовак мяса”.

Святочнае шэсце працягваюць калектывы СВК “Рассвет” імя К.П.Арлоўскага, СГФ “Чыгірынка” РДУП “Беларуснафта-Магілёўаблнафтапрадукт”, КСУП “Жылічы”, СВК “Калгас “Ніва”, “Калгас “Беларусь”, “Чырвоны баец” — кожны з іх па выніках мінулага года мае пэўныя працоўныя перамогі ў абласным і раённым спаборніцтвах.
Вядучыя з гонарам называюць дасягненні сельгасарганізацый, прадпрыемстваў, арганізацый, устаноў, прозвішчы лепшых з лепшых прадстаўнікоў, чыя праца прыносіць плён на карысць роднага краю.
Як толькі закончылася святочнае шэсце, пачаўся тэатралізаваны канцэрт “Славім зямлі нашай светлае імя!”.
Да прысутных — ветэранаў Вялікай Айчыннай вайны і працы, прадстаўнікоў працоўных калектываў, грамадскіх аб’яднанняў, моладзі, жыхароў горада і сельскіх населеных пунктаў, гасцей урачыстасцей — з віншавальнымі словамі звярнуўся старшыня райвыканкама Аляксандр Бутараў.
У сваёй прамове ён адзначыў, што гісторыя нашай зямлі — гэта цяжкі і доўгі шлях да незалежнасці. Нашым продкам неаднойчы даводзілася мужна адстойваць свабоду і самабытнасць. Вы-трымаўшы ўсе выпрабаванні, наш народ застаўся нескароным, моцным духам і адданым роднай зямлі, якую заўсёды адраджаў з попелу і беззапаветна любіў.
Кожны год у гэты святы для нас дзень мы аддаем даніну павагі подзвігу беларускага народа, нізка схіляем галовы перад загінуўшымі на палях бітваў за сваю Радзіму, шануем тых, хто ўнёс свой уклад у вызваленне Беларусі ад нямецка-фашысцкіх захопнікаў і прынёс на нашу зямлю доўгачаканую Перамогу.
Мы ганарымся тым, што ў нашай краіне пануюць мір, згода, парадак. А на Кіраўшчыне жывуць людзі, якія свята захоўваюць і прымнажаюць слаўныя баявыя і працоўныя традыцыі, уносяць свой дастойны ўклад у сацыяльна-эканамічнае і культурнае развіццё раёна, вобласці і краіны.
Далей кіраўнік раёна агучыў пералік дасягненняў раёна, арганізацый аграпрамысловага комплексу, сацыяльнай сферы, назваў прозвішчы асобных працаўнікоў, якія выйшлі пераможцамі на рэспубліканскім і абласным узроўнях. Аляксандр Бутараў выказаў ім шчырую ўдзячнасць за тое, што сваімі працоўнымі здабыткамі, творчымі поспехамі і спартыўнымі дасягненнямі яны прасляўляюць сваю малую радзіму.
Сёлетні год адзначаны знакавымі падзеямі ў гісторыі раёна і краіны: 80-годдзе з дня ўтварэння раёна, 70-годдзе Перамогі савецкага народа ў Вялікай Айчыннай вайне, выбары Прэзідэнта Рэспублікі Беларусь. Гэтыя падзеі — падстава для асмыслення пройдзенага шляху і стымул для новых працоўных перамог.
Старшыня райвыканкама з асаблівай цеплынёй звярнуўся да ветэранаў: гэта яны абаранілі Айчыну ад нямецка-фашысцкіх захопнікаў, падарылі нам мір і спакой, адбудавалі пасляваенную Беларусь і ўсё жыццё добрасумленна працавалі на яе карысць. Людзі старэйшага пакалення ўвасабляюць сабой непахісныя патрыятычныя і маральныя асновы грамадства. Мы ніколі не забудзем таго, што яны зрабілі для Радзімы.

У заключэнне Аляксандр Бутараў павіншаваў усіх прысутных са святам і пажадаў, каб вера ў сябе, сваю дзяржаву жыла ў сэрцы кожнага, каб заўсёды было мірнае неба над нашай Радзімай!
Вядучыя працягвалі святочную праграму. Быў зроблены экскурс у мінулае: удзельнікі праграмы змаглі данесці да гледачоў усе перыяды станаўлення і развіцця роднага краю — ад далёкай мінуўшчыны да сённяшніх дзён. У сцэнах прымалі ўдзел прадстаўнікі многіх працоўных калектываў, касцюмаванае іх увасабленне было арыгінальным і відовішчным.
Усе мы: і людзі сталага ўзросту, і моладзь — беражліва захоўваем памяць аб мужнасці воінаў і бязмерна ўдзячныя ім за сонечнае неба, за нашу Незалежнасць.
Дзеці ўручылі ветэранам вайны і працы кветкі, яны таксама атрымалі каштоўныя падарункі.
Далей вядучыя нагадалі прысутным моманты станаўлення раёна: як паўставалі з руін спаленыя вёскі, як вялося будаўніцтва сельскагаспадарчых, сацыяльных аб’ектаў, як у 1949 г. з г.Бабруйска ў Кіраўск праз в.Любонічы была праведзена высакавольтная лінія электраперадач, якая паклала пачатак электрыфікацыі раёна. Як з’явіліся мехлесапункт, леспрамгас, рай-прамкамбінат, цагляны завод, пякарня і інш.
Як сімвал працвітання роднага краю — духмяны каравай — быў уручаны старшыні райвыканкама Аляксандру Бутараву.
…На стадыён уехаў пажарны аўтамабіль, і прадстаўнікі раённага аддзела па надзвычайных сітуацыях прадэманстравалі пажарнае абсталяванне, з дапамогай якога выратавальнікі ліквідуюць надзвічайныя сітуацыі, забяспечваюць пажарную бяспеку жыхарам раёна.
Кінолагі-бабруйчане са сваімі службовымі сабакамі паказалі шэраг выступленняў, кожны з іх суправаджаўся гучнымі апладысментамі гледачоў.
Прыемна асэнсаваць, што на Кіраўшчыне з пачатку года створана 70 маладых сем’яў, 93 — адзначылі сярэбранае вяселле і 8 — залатое. Тры сямейныя пары: маладажонаў Сяргея і Зарыны Сакалоўскіх, Аляксандра і Наталлі Комараў (сярэбраны юбілей), Уладзіміра і Ларысы Караткевічаў (залаты юбілей) прайшлі праз кветкавыя аркі, ім былі выказаны пажаданні шчаслівага сямейнага жыцця і ўручаны падарункі.
Затым усе прысутныя шчырымі апладысментамі сустракалі нашу будучыню — маленькіх дзетак у прыгожых калясках, якіх выкацілі маладыя матулі. Усім малышам былі ўручаны падарункі — цацкі.
Далей на стадыён выходзяць пераможцы алімпіяд, конкурсаў, будатрадаўцы, пераможцы і ўдзельнікі фестываляў “Фламінга-2015”, “Парад парасонаў-2015”, “Міс Кіраўчанка” — моладзь, якая з гонарам працягвае слаўныя традыцыі старэйшых пакаленняў, мэтанакіравана глядзіць у будучыню і пакарае новыя вяршыні.
На працягу святочнага мерапрыемства гучалі любімыя песні, мелодыі, выконваліся танцавальныя нумары. А фінальным акордам стала кампазіцыя “Мы — адзінае цэлае”, над стадыёнам разляцелася бліскучае канфеці.
Пасля заканчэння канцэртнай праграмы да ўвагі прысутных было прапанавана цыркавое прадстаўленне: хлопчыкі і дзяўчынкі з радасцю назіралі за выступленнямі жанглёраў, вясёлых клоўнаў, дрэсіраваных сабачак.

Працавалі тэматычныя пляцоўкі, з устаноўленых тут сельгасарганізацыямі раёна падвор’яў разносілася вясёлая музыка. Трэба адзначыць, што ўсе пастараліся, каб выглядаць дастойна: выстаўленыя старадаўнія рэчы прыцягвалі ўвагу прахожых. Вельмі прыгожыя вышываныя ручнікі, абрусы, тканыя рэчы, розныя падзелкі — гэта сведчыць аб тым, што ў нашым раёне жывуць майстравітыя людзі, з рук якіх выходзяць цудоўныя вырабы. А якіх толькі тут ні было пачастункаў! І кожнае падвор’е прапаноўвала сваё кароннае блюда.
Прадставілі свае творчыя работы раённы цэнтр сацыяльнага абслугоўвання насельніцтва, раённая школа мастацтваў.
Весела было каля маладзёжнай пляцоўкі “БРСМ — Будучае краіны будаваць маладым!”: тут усе жадаючыя мелі магчымасць праявіць эрудыцыю ў збіранні пазлаў, прыняць удзел у конкурсах, гульнявых праграмах.
Актыўна працавалі гандлёвыя палаткі райспажыўтаварыства, УКП “Бытпаслугі”, прадпрымальнікаў.
Наладжваліся шматлікія спартыўныя мерапрыемствы, у якіх прымалі ўдзел кіраўчане розных узростаў.
Паралельна з канцэртна-забаўляльнай праграмай у гарадскім парку каля раённага Дома культуры працавала дзіцячая пляцоўка: тут для малышоў было шмат забаў.
Увечары святочныя мерапрыемствы працягваліся на галоўнай плошчы горада: адбыўся канцэрт народнага духавога аркестра “Фанфары Кіраўска” “Беларусь, жыцця майго крыніца”, затым усе прысутныя прынялі ўдзел у рэспубліканскай акцыі “Спяем гімн разам!”.
Вельмі відовішчным быў святочны фейерверк, які азарыў увесь горад сваімі рознакаляровымі фарбамі.
У Цэнтры адпачынку адбылася тэматычная дыскатэка “Мы з табой, Беларусь!”.
Таццяна БАРАДЗІНА.