На Кіраўшчыне актыўна працягваецца корманарыхтоўка
Ні на хвіліну не прыпыняюцца работы на сельгаспалетках КСУП “Чырвоны баец”. Задача нумар адзін зараз — уборка кукурузы на сілас. “Каралева палёў” сёлета размясцілася на плошчы ў 600 га: з 250 га кукуруза будзе ўбрана на зерне. Сярэдняя ўраджайнасць зялёнай масы складае 370 ц/га, і гэта пакуль убіраюцца ўчасткі, якія найбольш пацярпелі падчас вясенніх замаразкаў.
Як адзначыў у размове з карэспандэнтам “раёнкі” галоўны аграном гаспадаркі Уладзімір Селівёрстаў, асноўны разлік яны зараз робяць на назапашванне кармоў і актывізацыю работ па правядзенні пасяўной кампаніі ў найбольш спрыяльныя тэрміны.
Да слова, “каралева палёў” сёлета радуе сваёй ураджайнасцю: расліны стаяць шчыльнай сцяной, метры пад два ў вышыню, прычым своечасова праведзеная хімапрацоўка не дала прарасці пустазеллю.
На ўборцы кукурузы працуюць два кормаўборачныя камбайны, якімі кіруюць вопытныя меха-нізатары Валерый Дырыкаў і Сяргей Іваноў. Для бесперабойнай работы корманарыхтоўчага канвеера на адвозцы сіласнай масы задзейнічаны 5 адзінак тэхнікі. Андрэй Новік, Аляксандр Сіндараў і Уладзімір Бяляўскі працуюць на трактарах, Мікалай Аляксееў і Віктар Кітоў — на МАЗах. Зялёная маса дастаўляецца на сіласныя ямы, што размешчаны каля МТФ “Дваранінавічы”. Па стане на ўчарашні дзень ужо закладзена 2700 т сіласу, што складае больш за 40% ад плана.
Для закладкі якасных кармоў вядзецца іх кругласутачная трамбоўка: Аляксандр Марцючэнка на К-700 і Мікалай Масюковіч на “Амкадор” робяць усё ад іх залежачае, каб нарыхтоўваемы сілас быў належнай якасці. Не сакрэт, што менавіта добра затрамбаваныя кармы будуць лепш захоўвацца і зберагуць свае карысныя рэчывы. Строгі кантроль за вільготнасцю і тэмпературным рэжымам закладваемай у сіласную яму масы ажыццяўляюць адказныя спецыялісты.
Актыўна вядуцца работы па ўборцы саломы з палеткаў: плошча больш чым 830 га ўжо ад яе вызвалена. Дзве адзінкі тэхнікі, на якіх працуюць Віктар Аляксееў і Яўген Кандраценка, задзейнічаны на прэсаванні саломы. Міхаіл Барадзін займаецца пагрузкай і разгрузкай цюкоў, а Яўген Марцючэнка — іх адвозкай.
Амаль кругласутачна ідуць у “Чырвоным байцы” работы па ўзворванні глебы пад азімыя збожжавыя культуры: больш за 180 га ўжо гатовы прыняць зярняты пад ураджай будучага года. Павел Букаты і Сяргей Барадзін, рыхтуючы глебу на сваіх трактарах, працуюць адказна і старанна, перавыконваючы дзённыя нормы.
На лушчэнні ржышча, якое ўжо праведзена на плошчы 160 га, шчыруе Аляксей Масюковіч.
Вядзецца ўборка яравога рапсу, які сёлета размясціўся на плошчы 325 га: са 160 га намалочана 130 т. Уборку рапсу даверылі аднаму з перадавікоў сёлетняй збожжаўборачнай кампаніі — Андрэю Новіку.
Завяршылі сяўбу азімага рапсу, які заняў плошчу ў 350 га, на ўчастку 70 га пасеяна азімая сурэпіца. Усяго ж азімы збожжавы клін сёлета ў “Чырвоным байцы” размесціцца больш чым на 850 га: з якіх 350 га адведзена пад пшаніцу, 400 га — пад трыцікале на зерне і 120 га — на зялёную масу.
Для паляпшэння кармавога рацыёну жывёлы ў гаспадарцы выкарыстоўваюцца пажніўныя паўкосныя культуры (проса). Лепшыя ўчасткі проса і канюшыны будуць убраны на насенне.
Пад асаблівым кантролем — нарыхтоўка і закладка насеннага матэрыялу. Уся неабходная яго колькасць засыпана ў сховішча, зараз яно праходзіць праверку. Акрамя таго, плануецца закупіць элітнае насенне азімай пшаніцы гатунку “элігія” і азімага трыцікале “імпульс”.
Паклапаціліся ў гаспадарцы і аб закладцы пад поўную патрэбу насення яравых збожжавых і зернебабовых культур: свайго часу чакаюць 165 т ячменю, 106 т зернебабовай сумесі, 10 т гароху.
Радуе сёлета аграрыяў і ўраджай яблыкаў, ужо сабрана 18 т: уся сакавітая прадукцыя рэалізавана.
Добрасумленная і адказная праца прыносіць свой плён. Аб гэтым яскрава сведчаць вынікі сёлетняй збожжаўборачнай кампаніі: з плошчы ў 927 га намалочана 4216 т збожжа (на 500 т больш ураджаю мінулага года, пры сярэдняй ураджайнасці 45,7 ц/га. Асабліва парадавала трыцікале, якое дало на круг па 56 ц/га.
У гэтыя восеньскія дні не змаўкае гул сельгастэхнікі на палетках КСУП “Чырвоны баец”, а гэта значыць, што спецыялісты і механізатары прыкладуць усе намаганні, каб палявыя работы былі выкананы якасна і ў тэрмін.
На здымках: галоўны аграном гаспадаркі Уладзімір Селівёрстаў і механізатар Мікалай Масюковіч задаволены якасцю нарыхтаванага сіласу, галоўнае зараз забяспечыць яго правільнае захоўванне; на пагрузцы саломы заняты вопытны механізатар Міхаіл Барадзін, на адвозцы — Дзмітрый Друк.
Людміла СЯМЁНАВА.
Фота
Максіма МІКЕШЫНА.
