“Зялёнае жніво” — менавіта так працаўнікі сельгаспрадпрыемстваў часта называюць перыяд нарыхтоўкі кармоў. Гэта важная і вельмі адказная справа, якая патрабуе асаблівай увагі і самааддачы ад усіх удзельнікаў кормаўборачнай кампаніі. На першым плане — якасць работ: менавіта ад гэтага ў значнай ступені залежыць, якімі будуць малочная і мясная прыбаўкі ў жывёлагадоўчай галіне.Аднымі з першых да нарыхтоўкі кармоў прыступілі працаўнікі КСУП “Ніва-Барсукі”.
Як адзначыў галоўны аграном сельгаспрадпрыемства Аляксей Семашкевіч, травастой якраз дасягнуў той стадыі росту, калі трэба пачынаць касавіцу. Прычым, марудзіць нельга: трава набрала максімальную колькасць пажыўных рэчываў, а, значыць, паядаючы кармы, жывёла дасць у будучым найбольшую аддачу.
Варта адзначыць, што ніваўцы ўсебакова падрыхтаваліся да касьбы. Загадзя была прыведзена ў гатоўнасць корманарыхтоўчая тэхніка. Распрацаваны ўмовы працоўнага спаборніцтва, меры маральнага і матэрыяльнага заахвочвання, зацвердзілі тут і памеры дадатковай аплаты працы за высокую якасць правя­дзення работ.
Для нарыхтоўкі кармоў створана спецыяльнае механізаванае звяно. З убраных 30 га ўжо скатана ў рулоны і ўпакавана ў плёнку 60 т сена, у траншэі закладзена 1830 т сіласу.
З адказнасцю падышлі ніваўцы і да захаванасці нарыхтоўваемых кармоў: загадзя паклапаціліся аб рамонце і дэзінфекцыі наяўных траншэй і ям, аб уладкаванні да іх пад’язных дарог. Закладка кармоў вядзецца пад кантролем адказных спецыялістаў, што дазваляе забяспечваць выкананне ўсіх тэхналагічных патрабаванняў, строга адсочваюцца тэрміны закрыцця ям.
Аляксей Семашкевіч адзначыў, як і летась, частку кармоў у сельгаспрадпрыемстве плануюць захоўваць з прымяненнем сучасных тэхналогій: з дапамогай шматфункцыянальнага нямецкага прэс-падборшчыка яны будуць абгортвацца ў спецыяльную плёнку. Гэта дазваляе масе доўгі час не губляць сваіх пажыўных якасцей і захоўваць карысныя рэчывы.
Корманарыхтоўка вядзецца камбайнамі КЗР-10, якімі кіруюць вопытныя і адказныя механізатары Уладзімір Лукановіч і Сяргей Лебедзеў. Да слова, Сяргей падчас нарыхтоўкі кармоў заўсёды ў ліку лідараў, неаднойчы станавіўся пераможцай штогадовага раённага спаборніцтва. Хутка дастаўляюць зялёную масу да месца прызначэння Андрэй Свірко і Рыгор Асташоў. Старанна працуе на касьбе траў Мікалай Таранаў, добрасумленна выконваюць даручаную справу Уладзімір Еўдакімаў і Сяргей Гушчын: першы займаўся зграбаннем скошанай расліннасці, а другі — скатваннем сена ў рулоны.
Работа на кармавых палетках толькі набірае тэмп. Даражаць ніваўцы кожнай пагоднай хвілінай. Старанная праца механізатараў і добрая арганізацыя комплексу работ дае спадзяванне, што грамадскі статак будзе забяспечаны выскаякаснымі кармамі пад поўную патрэбу, а, магчыма, … і з запасам.
Людміла СЯМЁНАВА.
Фота Максіма МІКЕШЫНА.
На здымку: адказнае стаўленне да даручанай справы вызначаюць вопытных працаўнікоў сельгаспрадпрыемства Рыгора Асташова і Сяргея Лебедзева.