Экіпаж у саставе камбайнераў Уладзіміра Бяляўскага і Аляксея Дзмітрыева шчыруе на рассветаўскіх палетках.

Экіпаж збожжаўборачннага камбайна ў састааве Івана Салановіча і Івана Багеля

У ААТ «Рассвет імя К.П.Арлоўскага» набірае абароты ўборка збожжавых культур. 
Перад галоўнай сельскагаспадарчай кампаніяй тэхніка таварыства прайшла абкатку па рапсавым угоддзям, па стане на ўчарашні дзень культура ўбрана на 440 га з 780 наяўных.
Як толькі ўсталявалася спрыяльнае надвор’е, камбайнеры выехалі ўбіраць азімую пшаніцу. У гэтым годзе яна размешчана на 1750 га. За першыя дні жніва намалот склаў 360 т збожжа на 75 га. І ўраджайнасць добрая — 48 ц/га.
Увогуле сельгаставарыства з года ў год знаходзіцца у ліку лідараў па ўраджайнасці хлебнай нівы. Са свайго поспеху рассветаўцы сакрэту не робяць: дакладнае выкананне тэхналогій, працавітасць і беражлівыя адносіны да вырашчанага ўраджаю — вось яго асноўныя складаемыя.

Каб правесці жніво ў сціслыя тэрміны і якасна, на палеткі гаспадаркі штодзённа выходзіць 12 збожжаўборачных камбайнаў, з якіх 4 зараз працуюць на ўборцы пшаніцы. Бесперапынная дастаўка рапсу і збожжа на ачышчальна-сушыльныя комплексы ажжыццяўляецца з дапамогай 10 аўтамабіляў.
Тэмп уборкі, як і ў папярэднія гады, пачалі надаваць вопытныя хлебаробы — экіпаж у саставе Івана Салановіча і Івана Багеля. Сёлетняя ўборачная кампанія для Івана Леанідавіча ўжо 31-я, а яго цёзка 8-е жніво дапамагае старэйшаму таварышу ўбіраць вырашчаны ўраджай. У дружным тандэме яны штогод паказваюць выдатныя вынікі. Напрыклад, летась камбайнеры сталі першымі тысячнікамі ў раёне і вобласці.
Не адстаюць ад вопытных калег і маладыя экіпажы. Шчыру­юць на збожжавым полі камбайнер Уладзімір Бяляўскі, які другі раз прымае ўдзел ва ўборачнай кампаніі, і Аляксей Дзмітры­еў — ён на жніве ўпершыню. Настрой ў механізатараў такі: галоўнае, каб надвор’е не замінала, а мы — не падвядзем!
Як толькі камбайны пакідаюць палеткі, без прамаруджвання ўключаюцца ў работу прэс-падборшчыкі — з палёў убіраецца салома. Рулоны адразу вязуць на захоўванне да жывёлагадоўчых комплексаў.
Як адзначыў першы намеснік дырэктара ААТ “Рассвет імя К.П.Арлоўскага” Аляксандр Жылінскі, таварыства поўнасцю ўкамплектавана механізатарскімі кадрамі. Людзі, занятыя на жніве, разумеюць усю важнасць і адказнасць пастаўленай перад імі задачы, а таму працуюць старанна і добрасумленна. Тым больш, што тэхніка ўся прадрыхтаваная, няма перабояў з гаруча-змазачнымі матэрыяламі, працаўнікі забяспечаны спецвопраткай і сродкамі аховы, гарачым харчаваннем, якое механізатарам дастаўляюць прама ў поле. Ужо звыклымі атрыбутамі кабіны камбайна сталі не толькі аптэчка і сродкі пажаратушэння, але і кандыцыянер.
З-за неспрыяльных пагодных умоў усе культуры спеюць на ты­дзень-два пазней, чым планавалася. І, калі “нябесная канцылярыя” не будзе зноў перашкаджаць хлебаробам, убраць збожжа ў сельгаставарыстве плануюць дзён за 20.
На палях з раніцы і да позняга вечара закіпела работа: па хлебнай ніве плывуць камбайны, за сваім залатым грузам спяшаюцца аўтамабілі. Жніво набірае абароты…
НастассяЛОГВІНАВА.
Фота Максіма МІКЕШЫНА.