З раніцы і да змяркання не змаўкае гул сельгастэхнікі на палетках ААТ “Кіраўскае райаграпрамтэхзабеспячэнне”: шчыруюць руплівыя працаўнікі, клапоцяцца пра ўраджай сёлетняга года і робяць падмурак пад будучы. Як вядома, дзе старанная праца, там і добрыя вынікі.

Калектыў РАПТЗ адным з першых у раёне прыступіў да ўборкі цукровых буракоў. Вырошчваннем гэтай культуры тут займаюцца шмат год і маюць вельмі нядрэнныя вынікі. Сёлета салодкія караняплоды занялі плошчу ў 405 га.
На буракаўборачным камбайне “Холмер” адказна і добрасумленна працуе механізатар Дзмітрый Комар (на здымку). Карэспандэнт “раёнкі” заспеў яго на палетках за в.П.Слабада, дзе і вялася ўборка буракоў. Тэхніка, своечасова і якасна даведзеная да ладу, працуе без збояў, уборка ідзе строга па графіку.

Спачатку салодкія карані ссыпаюцца ў бурты. Затым аўтамабілямі караняплоды адпраўляюцца на Асіповіцкі буракапрыёмны пункт. Ужо здадзена больш за 4300 т. На пагрузцы караняплодаў працуе Андрэй Хлапкоў.
У размове з намі галоўны аграном райаграпрамтэхзабеспячэння Уладзімір Дарафей выказаў спадзяванне, што сёлетні ўраджай цукровых буракоў будзе важкім: на першых убраных 155 га на круг атрымана па 303 ц, а накапана больш за 4700 т.
Па словах Уладзіміра Дарафея, цукровыя буракі – найважнейшая тэхнічная культура, якая дае сыравіну для перапрацоўчай прамысловасці. Тэхналогія вырошчвання толькі на першы погляд здаецца нескладанай: падрыхтоўка глебы, сяўба, апрацоўка ад пустазелля і шкоднікаў, уборка. Але для таго, каб атрымаць добры ўраджай салодкіх каранёў, неабходны строгае захоўванне тэхналогіі, пастаянны клопат і штодзённая напружаная праца. Немалаважнае значэнне маюць і ўмовы надвор’я: культура вельмі патрабавальная да святла, вільгаці і цяпла.
Зараз, у пачатку ўборачнага сезону, буракі радуюць сваімі якаснымі паказчыкамі, у прыватнасці, цукровасцю, якая пераўзыходзіць базавы 16-працэнтны нарматыў і складае 16,9%. А калі ўлічыць, што працэс нарошчвання масы караняплодаў і назапашвання ў іх цукру ідзе бесперапынна, то ў мясцовых раслінаводаў ёсць рэальныя шанцы разліч­ваць на яшчэ больш высокія паказчыкі, а значыць і большую аплату за здадзеную салодкую прадукцыю.
Актыўнымі тэмпамі ў сельгаставарыстве вядзецца ўборка кукурузы на сілас. Усяго “царыца палёў” займае плошчу ў 830 га. На ўчарашнюю раніцу мясцовыя раслінаводы ўбралі кукурузу на 255 га, атрымаўшы 7820 т зялёнай масы пры ўра­джайнасці 308 ц/га. На прадстаячую зімоўку ў сіласныя траншэі закладзена больш за 6700 т сакавітых кармоў.

Уборка і здрабненне кукурузы вядзецца двума камбайнамі, кіруюць якімі Валянцін Сулімскі і Кірыл Гамалін. Хутка дастаўляюць сіласную масу да месцаў трамбоўкі і закладкі Яўген Рудак, Дзяніс Харытонаў, Леанід Паркалаў, Аляксандр Баянкоў і іншыя.
За тым, каб нарыхтаваная маса была якаснай, з неабходнай вільготнасцю і тэмпературай, назіраюць адказныя спецыялісты. Маючы вялізны статак БРЖ, раслінаводы райаграпрамтэхзабеспячэння прыкладаюць усе намаганні, каб забяспечыць яго кармамі добрай якасці.
Нягледзячы на ўсю важнасць правядзення ўборкі кукурузы і іншых сельгаскультур, не застаецца па-за ўвагай аграрыяў РАПТЗ не менш важная кампанія – сяўба азімых. Актыўныя тэмпы работ даюць спадзяванне, што ўсе планавыя заданні будуць выкананы своечасова.
Людміла СЯМЁНАВА.
Фота Максіма МІКЕШЫНА.