Аднымі з першых у раёне прыступілі да ўборкі цукровых буракоў раслінаводы ААТ “Кіраўскае райагра­прам­тэх­забеспячэнне”.

Вырошчваннем гэтай культуры тут сур’ёзна займаюцца шмат год і маюць вельмі неблагія вынікі. Сёлета салодкія караняплоды займалі плошчу ў 370 га. Па стане на ўчарашнюю раніцу буракі ўбраны на 95 га, накапана 2320 т пры сярэдняй ураджайнасці больш за 244 ц/га.
На буракаўборач­ным камбайне “Холмер” шосты сезон адказна і добрасумленна працуе механізатар Дзмітрый Комар (на здымку).

Карэспандэнт “раёнкі” заспеў працаўнікоў на палетках за вёскай Курганы, дзе і вялася ўборка буракоў. Тэхніка, своечасова і якасна даведзеная да ладу, працуе без збояў, уборка ідзе ў адпаведнасці з графікам.

Спачатку салодкія карані ссыпаюцца ў бурты. Затым аўтамабілямі, якія па дагавору наймае Слуцкі цукроварафінадны камбінат, караняплоды адпраўляецца на Асіповіцкі буракапрыёмны пункт. Ужо зда­дзена больш за 1450 т. На пагрузцы караняплодаў працуе Андрэй Хлапкоў, іншы раз падмяняе яго Анатоль Дзікун (на здымку).

Па словах галоўнага агранома, цукровыя буракі – важная тэхнічная культура, якая дае сыравіну для цукровай прамысловасці краіны. Тэхналогія вырошчвання салодкіх каранёў толькі на першы погляд здаецца нескладанай: падрыхтоўка глебы, сяўба, апрацоўка ад пустазелля і шкоднікаў, уборка. Але для таго, каб атрымаць добры ўраджай, неабходны строгае захаванне тэхналогіі, пастаянны клопат і штодзённая напружаная праца. Немалаважнае значэнне маюць і ўмовы надвор’я: культура вельмі патрабавальная да святла, вільгаці і цяпла.

У размове з намі галоўны аграном РАПТЗ Уладзімір Дарафей адзначыў, што сёлетняе спякотнае надвор’е зусім не паспрыяла росту і развіццю цукровых буракоў. Месцамі караняплоды драбнаватыя, але буракі радуюць сваімі якаснымі паказчыкамі, у прыватнасці, цукрыстасцю, якая не толькі “ўкладваецца” ў базавы 16-працэнтны нарматыў, але і пераўзыходзіць яго, складаючы па 17,5%. А калі ўлічыць, што працэс нарошчвання масы караняплодаў і назапашвання ў іх цукру ідзе бесперапынна, то ў працаўнікоў райаграпрамтэхзабеспячэння ёсць рэальныя шанцы разлічваць на яшчэ больш высокія паказчыкі.
Людміла СЯМЁНАВА.
Фота Максіма МІКЕШЫНА.

Подписывайтесь на нас в социальных сетях: «Одноклассники» и «Одноклассники» (группа), «ВКонтакте», «Фейсбук», «Instagram», «Telegram», «Яндекс Дзен».