Навагодняе дабрачыннае свята прайшло ў Кіраўскім раённым доме культуры
Раздзяліць з дзятвой радасць ад чароўнага, светлага навагодняга свята прыйшлі старшыня райвыканкама Аляксандр Бутараў, старшыня раённага Савета дэпутатаў Галіна Слабоднікава, намеснікі старшыні райвыканкама, члены раённага выканаўчага камітэта, кіраўнікі грамадскіх аб’яднанняў, арганізацый.
У РДК, упрыгожаным сняжынкамі і гірляндамі, усіх сустракалі казачныя героі, роставыя лялькі, а на другім паверсе ветліва ззяла агеньчыкамі ёлка. Тут працавалі разнастайныя атракцыёны “Чароўны куфэрак”, “Незвычайны прыз” і іншыя, праводзіліся гульні.
А потым усе былі запрошаны ў залу, дзе на сцэне адбыліся асноўныя дзеянні свята. Навагодні настрой адразу задалі казачныя персанажы, а потым са словамі віншаванняў і шчырых пажаданняў да ўсіх звярнуўся кіраўнік раёна Аляксандр Бутараў. Ён адзначыў, што ў межах дабрачыннай акцыі “Нашы дзеці” робіцца ўсё магчымае, каб ніводнае дзіцяці не засталося без увагі. “І ваша шчырая радасць, усмешкі для нас, дарослых, і ёсць галоўны падарунак у любую пару года, — падкрэсліў старшыня райвыканкама. — Як вядома, той, хто дорыць шчасце, шчаслівы ўдвая…”
Кіраўнік раёна адзначыў, што ў нашай краіне робіцца ўсё, каб дзеці раслі ў атмасферы клопату і любові, каб жыццё юных грамадзян было мірным і спакойным, каб кожнае дзіця магло раскрыць свае таленты і рэалізаваць мары.
Аляксандр Бутараў назваў адметныя дасягненні вучняў раёна ў адыходзячым годзе.
За перамогі ў рэспубліканскіх конкурсах доследных работ гімназістка Лізавета Басацкая і Віталь Арлоўскі з Жыліцкай СШ узнагароджаны другой прэміяй спецыяльнага фонду Прэзідэнта Рэспублікі Беларусь па сацыяльнай падтрымцы адораных вучняў і студэнтаў, унесены ў Банк дадзеных адоранай моладзі Беларусі.
Па выніках абласнога конкурсу работ доследнага характару па вучэбных прадметах Дар’я Папова з СШ№1 узнагароджана дыпломам II ступені, гімназіст Павел Хурсаў удастоены дыплома III ступені, а таксама стаў пераможцам абласнога этапу рэспубліканскай алімпіяды па фінансавай граматнасці.
Вучні СШ №1 Ганна Бацян узнагароджана дыпломам III ступені ў абласным конкурсе біёлага-экалагічных работ, Вікторыя Шчоткіна, лідар піянерскай дружыны, — прызёр абласнога конкурсу “Лідар года-2016”, удзельнік Х Нацыянальнага дзіцячага форуму “Дзеці Беларусі — за мір і ўзаемаразуменне”.
Гімназістка Святлана Ісаічкіна — уладальнік дыплома III ступені ў абласным этапе рэспубліканскай алімпіяды па нямецкай мове.
Адыходзячы год стаў выніковым на творчыя поспехі для выхаванцаў Цэнтра дадатковай адукацыі дзяцей і моладзі: па выніках рэспубліканскіх інтэлектуальных турніраў “Светлагорская восень-2016”, “Сустрэча-2016”, “На ростанях” у скарбонцы зборных каманд 11 дыпломаў; Данута Перадня ўзнагароджана дыпломам I ступені ў міжнародным творчым конкурсе “Мае таленты”; удзельніцы ўзорнай студыі юнага мадэльера “Жамчужына” ўдастоены дыпломаў II ступені па выніках 2-га міжнароднага конкурсу музычна-мастацкай творчасці “Н’ю Стайл”; Дар’я Ананіч стала пераможцай адкрытага рэспубліканскага конкурсу чытальнікаў “Вяночак”, прысвечанага 125-годдзю Максіма Багдановіча, узнагароджана дыпломам II ступені ў абласным аглядзе-конкурсе чытальнікаў, вядучых і канферансье “Шлях да поспеху”.
Год традыцыйна завяршаецца дастойнымі спартыўнымі рэзультатамі. Так, гімназістка Веалета Бяляўская ў саставе нацыянальнай мала-дзёжнай зборнай Рэспублікі Беларусь па валейболе ўзнагароджана дыпломам I ступені ў Чэмпіянаце ўсходне-еўрапейскай занальнай асацыяцыі, Багдан Франк — пераможца адкрытага першынства Магілёўскай вобласці па боксу. У абласных спаборніцтвах па лёгкай атлетыцы “Шкаліяда” Яна Лісоўская з гімназіі і Максім Няйштэтар з Паўлавіцкай СШ імя Р.А. Худалеева ўзнагаро-джаны дыпломамі II ступені.
На рахунку выхаванцаў ДЮСШ — 3 месца на Кубку Рэспублікі Беларусь па пляжным футболе, 1 месца на Алімпійскіх днях моладзі ў г.Магілёве па валейболе сярод дзяўчат, 2 месца ў першынстве рэспублікі па пляжным валейболе сярод дзяўчат, 1 месца ў абласной Спартакіядзе школьнікаў-2016 па веласпорце.
“Вашы перамогі і дасягненні, — адзначыў Аляксандр Бутараў, — доказ таго, што дзякуючы таленту, працавітасці і ўпартасці можна пакарыць любыя вяршыні, увасобіць у жыццё самыя смелыя мары”.
Кіраўнік раёна выказаў удзячнасць педагогам, бацькам за высакародную працу, якая заслугоў-вае самай высокай адзнакі. Ён павіншаваў усіх з Новым годам і Раством Хрыстовым, выказаў найлепшыя пажаданні. Старшыня райвыканкама ўручыў прэміі спецыяльнага фонду Прэзідэнта Рэспублікі Беларусь па сацыяльнай пад-трымцы адораных вучняў і студэнтаў гімназістцы Лізавеце Басацкай, пераможцы рэспубліканскага конкурсу работ доследнага характару, і вучню Жыліцкай СШ Віталю Арлоўскаму, пераможцу рэспубліканскага конкурсу навуковых біёлага-эканамічных работ.
У якасці навагодняга падарунка Аляксандр Бутараў атрымаў ёлачныя ўпрыгожванні, зробленыя рукамі рабят.
Далей распачалося тэатралізаванае прадстаўленне “Новы год у Лукамор’і”, падчас якога юныя гледачы жыва адгукаліся на ўсе перыпетыі сюжэту, падтанцоўвалі на месцах, дружна давалі адказы на пытанні і загадкі. Іх усмешкі выклікалі суперсучасная Баба Яга з ноўтбукам, разважлівы Кот вучоны, Лешы ў камуфляжы і іншыя персанажы. І, як заўжды бывае ў навагодніх казках, са з’яўленнем Дзеда Мароза і Снягуркі дабро святкавала перамогу над злом. Заключным, вельмі радасным для рабят акордам свята стаў сапраўды чароўны момант — наяўнасць пад іх крэсламі навагодніх падарункаў!
Наталля ХАДАКОВА.
Фота
Максіма МІКЕШЫНА.
