На палях СВК “Калгас “Ніва” з ранку да вечара чуецца гул сельскагаспадарчай тэхнікі — актыўна вядзецца ўвесь комплекс веснавых палявых работ. У гэтым супрацоўнікі “раёнкі” пераканаліся, пабываўшы ў мінулую суботу ў сельгасарганізацыі.
Зямельныя ўчасткі далучанага ў свой час да “Нівы” былога саўгаса імя Кірава ў асноўным заняты пад шматгадовыя травы, сенакосы і пашы, азімыя культуры: зараз яны падкармліваюцца мінеральнымі ўгнаеннямі. Дарэчы, шматгадовыя травы падкормлены ўжо на 520 га (48%), сенакосы і пашы — на 920 га (86%).
На палях, размешчаных бліжэй да цэнтральнай сядзібы, шырока разгорнуты фронт работ па вывазцы і ўнясенні арганічных угнаенняў, падрыхтоўцы глебы, сяўбе яравых збожжавых і зернебабовых культур. У сельгасработах задзейнічаны 20 адзінак сельгастэхнікі.
Пакуль заняты дзве сеялкі, на якіх працуюць вопытныя механізатары Уладзімір Лебедзеў і Міхаіл Пратасаў. Сёлета неабходна заняць пад яравыя культуры 870 га, з іх больш паловы ўжо засеяны. Як толькі надыдзе спрыяльны час для сяўбы кукурузы, у гаспадарцы плануюць працаваць і ў начную змену. Тым больш, што даведзены да ладу яшчэ адзін пасяўны агрэгат, таму, калі з’явіцца неабходнасць, ён будзе задзейнічаны.
Сёлета ў сяльчан дабавіліся работы па перасяванні часткі плошчаў, занятых азімым рапсам, загінуўшым з-за неспрыяльных умоў надвор’я. Якаснае насенне для гэтых мэт маецца.
Значную ўвагу ніваўцы надаюць абнаўленню пасяўнога матэрыялу. Ужо закуплена 18 т збожжавай эліты, 1,2 т люцэрны, 1 т яравога рапсу. Усё насенне, неабходнае для яравой сяўбы, пратручана, ачышчана.
Як адзначыў у размове кіраўнік сельгаскааператыва Іван Рыняк, усе палявыя работы вядуцца згодна плана. Людзі працуюць добрасумленна, забяспечваючы высокую якасць работ. Механізатары ведаюць, што іх старанная праца будзе па заслугах ацэнена: па выніках пасяўных работ (як і іншых відаў) прадугледжана прэміраванне. Так, за першае месца ў спаборніцтве будзе выплачана 3 б.в., за другое — 2 б.в., за трэцяе — 1 б.в. Акрамя гэтага, пасля ўзыходу яравых культур за якасна праведзеныя работы земляробам даплацяць па 5-8 тыс. рублёў за гектар.

Асноўны касцяк, на каго раўняюцца іншыя, — нязменны: Аляксандр Петранкоў, Уладзімір Лебедзеў, Міхаіл Пратасаў, Яўген Лютарэвіч, Юрый Сямёнаў, Васіль Белаглазаў, Валерый Кухарэнка. Гэта людзі, якіх не трэба кантраляваць, яны выконваюць даручаную справу якасна і адказна. Замацаваная за імі тэхніка заўсёды ў спраўным стане, а калі і здараюцца паломкі, то механізатары ўхіляюць іх у найкарацейшыя тэрміны.
Сёлета калектыў земляробаў папоўніўся шасцю маладымі працаўнікамі: чатырма механізатарамі і двума слесарамі. Гэта сведчыць аб тым, што аб гаспадарцы ідзе добрая слава: чалавеку працы тут надаецца належная ўвага.
Аднаму навічку ўжо выдзелена жыллё, і гэты фактар, як і дастойная заработная плата, дружалюбныя адносіны калег, станоўча паўплывае на працоўны настрой.
Усяго ў бягучым годзе ў гаспадарцы плануецца засеяць 910 га збожжавымі і зернебабовымі культурамі, 750 га — кукурузай, 180 га — цукровымі буракамі. Усё для гэтага ёсць: і спраўная тэхніка, і паліва, і якаснае насенне.
З першых дзён усяго комплексу веснавых палявых работ механізатары гаспадаркі ўзялі нядрэнны старт. Мясцовыя земляробы ўмеюць працаваць і імкнуцца за змену выканаць максімальныя аб’ёмы работ, прычым на высокім якасным узроўні, каб потым атрымаць добры ўраджай.

На здымку: вопытны механізатар Уладзімір Лебедзеў у гэты дзень быў заняты на сяўбе зернебабовай сумесі на полі ў раёне в.Ізабэліна.
Таццяна БАРАДЗІНА.

Фота
Максіма МІКЕШЫНА.