Усталяваўшаеся цёплае надвор’е садзейнічае хуткаму падсыханню палёў, а каб не ўпусціць спрыяльныя тэрміны, неабходна арганізавана наладзіць увесь комплекс палявых работ. Па-першае, захаваць вільгаць у глебе і ажыццявіць падкормку пасеваў, падрыхтаваць палеткі да яравой сяўбы. Усе гэтыя работы належным чынам вядуцца ў СВК “Рассвет” імя К.П.Арлоўскага. 

У гэтым супрацоўнікі “раёнкі” пераканаліся, калі ў мінулую пятніцу пабывалі на палях сельгасарганізацыі. Першы наш прыпынак — рассветаўскі аэрадром. Яшчэ з дарогі пачулі гул магутнага рухавіка: гэта заводзіўся самалёт сельгасавіяцыі, які даўно стаў “крылатым” памочнікам земляробаў.
На палетках самай вялізнай па плошчы гаспадаркі з дапамогай авіяцыі выконваюцца такія віды работ, як падкормка пасеваў мінеральнымі ўгнаеннямі, хімічная апрацоўка ад шкоднікаў, падсеў траў. Падкормлены ўжо 1111 га.

Усяго рассветаўцам неабходна падкарміць 732 га шматгадовых траў, 1822 — сенакосаў і пашаў, 2033 — азімых збожжавых культур, 1780 — азімага рапсу.
У бягучым годзе ў сельгаскааператыве плануюць заняць пад яравыя культуры 5920 га, пасеяць кукурузу на зерне на 950 га і 2200 — на сілас, цукровыя буракі — на 215 га, бульбу — 410 га, агародніну — 105 га.
Значную ўвагу рассветаўцы надаюць вывазу і ўнясенню пад пасевы арганічных ўгнаенняў. Іх назапашана 105,7 тыс. т (123%), унесена ў глебу — 85,1 тыс. т. Дарэчы, на ўнясенні арганікі выдатна працуюць Аляксандр Міхалап, Васіль Клімовіч, Іван Салановіч. Пагрузкай арганікі на прычэпы з дапамогай “Амкадор-342С” займаецца Ігар Рудак, на яго рахунку — 6706 т загружаных арганічных угнаенняў.
Падрыхтоўчыя работы вядуцца на ўсіх вытворчых участках. На чызеляванні глебы стараннасцю вызначаюцца механізатар Сяргей Кахновіч, Сяргей Лісіцын, на баранаванні — Сяргей Міхалап, Іван Лучына.
Адказна і якасна працуюць на ворыве глебы Міхаіл Букаты, Валерый Піскуноў. Дарэчы, апошні ў той дзень на трактары “Беларус-3522” з 8-корпусным плугам шчыраваў на полі, размешчаным каля в.Капусціна: механізатар за дзень заворвае па 30-36 га.
Вядуцца работы і ў садзе: ужо абрэзаны пладовыя дрэвы на 150 га.
Каб своечасова і ў аптымальныя тэрміны правесці ўвесь комплекс веснавых палявых работ, у гаспадарцы падрыхтаваліся загадзя, задзейнічалі ўсе тэхналагічныя магчымасці: маецца паліва, уся неабходная глебаапрацоўчая і пасяўная тэхніка даведзена да ладу. Палявыя работы арганізаваны ў дзве змены, наладжана гарачае харчаванне. Распрацаваны меры маральнай і матэрыяльнай зацікаўленасці працаўнікоў.
Усе механізатары — вопытныя, ім не трэба паказваць, што і як рабіць: да даручанай справы яны ставяцца з душой. А значныя пасяўныя плошчы не дазваляюць ім расслабляцца.
Таццяна БАРАДЗІНА.
Фота
Максіма МІКЕШЫНА.