Памяць будзе жыць вечна
У раёне працягваецца велапрабег у межах акцыі “За здароўем — на веласіпедзе!”, прысвечаны 70-годдзю вызвалення Рэспублікі Беларусь ад нямецка-фашысцкіх захопнікаў. Чарговае мерапрыемства па перадачы лампады з Агнём Славы і памяці герояў адбылося ў в.Стаўпішчы: лампаду з Чыгірынкі прывезлі прадстаўнікі Стайкаўскага сельсавета на чале са старшынёй Міхаілам Фрэйбергам (на здымку).
Старэйшыя жыхары Стаўпішчаў успаміналі, якія жорсткія баі вяліся на тэрыторыі іх вёскі. У красавіку 1944 г. байцы 537-га партызанскага атрада пад кіраўніцтвам С.Д.Баркоўскага разбілі гаспадарчую часць 134-й нямецкай дывізіі, знішчылі малочную ферму, маслазавод і каўбасны цэх, дзе гітлераўцы гатавалі прадукты харчавання для сваёй арміі.
Свята шануюць жыхары вёскі памяць загінуўшых 62 воінаў, якія пахаваны ў брацкай магіле: ускладаюць кветкі, добраўпарадкоўваюць тэрыторыю вакол яе. Да гэтай справы пастаянна далучаюцца прадстаўнікі маладога пакалення, якія ўдзячныя за прадастаўленую ім магчымасць жыць пад мірным небам, вучыцца, ствараць сем’і. Падчас мітынгу юнакі і дзяўчаты запэўнілі прысутных, што памяць аб загінуўшых будзе жыць вечна ў іх сэрцах.
Удзел у велапрабегу па вуліцах вёскі прынялі ўсе жадаючыя. Нягле-дзячы на ўзрост, многія пажылыя вяскоўцы разам з моладдзю з задавальненнем праехаліся на веласіпедах.
________________________________________________________________________
Наступным населеным пунктам, якому была перададзена лампада з Агнём Славы і памяці герояў стаў а/г Скрыпліца.
Яе прывезлі прадстаўнікі Мышкавіцкага сельсавета, а кіраўнік справамі Таццяна Астроўская ўручыла лампаду выпускніцы мясцовай школы Вераніцы Няфёдавай.
З увагай слухалі прысутныя, якія сабраліся каля мясцовага СДК, выступленне паважанага аднавяскоўца А.Ф.Сямёнава, які ў свой час узначальваў Скрыпліцкую СШ і сельскі Савет дэпутатаў. Ён нагадаў далёкія гады ваеннага ліхалецця, аднаўлення разбуранай гаспадаркі. Пажадаў моладзі, каб іх мары і надзеі ніколі не азмрочыла вайна.
Дырэктар мясцовай СШ Ф.С.Індзюхін звярнуў увагу юнакоў і дзяўчат на тое, каб яны ніколі не забывалі пра подзвіг дзедаў і прадзедаў, хто, не шкадуючы свайго жыцця, абараняў Радзіму ад ворага.
Для прысутных удзе-льнікі вакальнага калектыву “Скрыплічаначка” падрыхтавалі канцэртную праграму. Таксама праводзіліся розныя конкурсы, віктарыны. Жадаючыя прымалі ўдзел у спаборніцтвах па шашках, стральбе. Была арганізавана гульня ў валейбол.
Самыя кемлівыя, спрытныя атрымалі заахвочвальныя прызы.
Далей быў дадзены старт велапрабегу.