Зладжана і арганізавана праходзіць “зялёнае жніво” ў КСУП “Ніва-Барсукі”: тут ідзе ўборка траў другім укосам. Увесь светлавы дзень на палетках сельгаспрадпрыемства не змаўкае гул тэхнікі: корманарыўтоўшчыкі імкнуцца забяспечыць бесперапынную работу зялёнага канвеера.

На зграбанні траў у валкі задзейнічаны вопытны механізатар Міхаіл Рымараў

Нарыхтоўка кармоў у гаспадарцы наладжана адразу на некалькіх участках, а аснашчанасць сучаснай тэхнікай дазваляе весці касавіцу аператыўна. Мясцовыя раслінаводы ўжо маюць больш за 7000 т сенажу, з якіх 35 т запакавалі ва ўпакоўку, і 566 т сена.
Як адзначыў галоўны аграном КСУП “Ніва-Барсукі” Сяргей Сіўчыкаў, сёлетняе спякотнае надвор’е ўнесла свае карэктывы ў тэмпы работ. Справа ў тым, што травы спыніліся ў росце, пачалі падгараць, таму, лічыць спецыяліст, калі прапусціць аптымальныя тэрміны скошвання і ўборкі, можна не толькі страціць карысныя якасці раслін, але і недаатрымаць сенажу і сена. Разумеюць гэта і працаўнікі палёў, у чыіх руках сёння будучыя надоі малака і прыбаўкі ў вазе буйной рагатай жывёлы.

Мікалай Таранаў и Сяргей Ярыгін

Рабочы дзень у механізатараў Мікалая Таранава, Сяргея Ярыгіна і Васіля Лебедзева, якія задзейнічаны на касьбе, пачынаецца рана, а заканчваецца познім вечарам. З пастаўленай задачай яны спраўляюцца выдатна, бо для кожнага з іх касавіца – справа звыклая. Услед за касілкамі на палеткі выводзіць трактар з граблямі Міхаіл Рымараў: падварушыць травы, сабраць іх у валкі – гэта яго задача. На прэсаванні сена і сенажу задзейнічана адразу тры прэсы, кіруюць якімі Аляксандр Аляхно, Мікалай Сурын і Сяргей Гушчын. Варта адзначыць, ніваўцы ўжо даўно практыкуюць закладку кармоў у стрэйч-плёнку: па-першае, забяспечваюць дойны статак і цялят якаснымі кармамі, а па-другое, “эканомяць” траншэі для закладкі сіласу. Запасы кармоў у ніваўцаў даходзяць да паўтара і больш год.
Вопытныя і адказныя працаўнікі Уладзімір Еўдакімаў і Алег Стальмакоў задзейнічаны на кормаўборачных камбайнах. Тэхніку сваю яны падрыхтавалі добра, таму і працуе яна без збояў, а пад’язжаючыя аўтамабілі і трактары імгненна напаўняюцца здрабнёнай “зялёнкай”. Хутка дастаўляюць масу да сянажных траншэй Юрый Сямёнаў, Мікалай Сурын, Рыгор Прусянкоў, Васіль Марозаў, Валянцін Пінчук і іншыя.

Сяргей Гушчын

Вельмі адказны ўчастак – закладка і трамбоўка сянажных траншэй, кантралююць гэты працэс адказныя спецыялісты. Трамбоўка зялёнай масы ідзе кругласутачна, вядуць яе Андрэй Свірко, Аляксандр Няфёдаў і Алег Сакабіцкі, усе яны ў гаспадарцы на добрым рахунку, добрасумленныя і адказныя.
На сяўбе аднагадовых траў задзейнічаны Генадзь Макаронак.
Увогуле, як адзначыў Сяргей Сіўчыкаў, мясцовыя механізатары – людзі, правераныя не адной сельскагаспадарчай кампаніяй, з такімі кадрамі па сілах выкананне любых пастаўленых задач. І бягучая корманарыхтоўка – таму пацвярджэнне.
Клапоціцца агранамічная служба і пра кармавыя запасы на будучыню: вядзецца падсеў траў, перазалужэнне ўгоддзяў. Актыўна вядуць сяўбу люцэрны: хаця культура вельмі патрабавальная да якасці глебы і добра расце толькі на мягкіх і ўрадлівых землях, чым мясцовыя плошчы “пахваліцца” не могуць. Але, па словах галоўнага агранома, яны штогод практыкуюць сяўбу люцэрны на розных участках, назіраюць, дзе зялёная маса атрымліваецца густая і сакавітая.
Палеткі, вызваленыя ад рулонаў з сенам, плануюць пераараць і пасеяць сумесі траў: люцэрну, цімафееўку, канюшыну.
Паралельна з іншымі работамі правялі хімапрацоўку кукурузы, у бліжэйшых планах – падрыхтоўка глебы пад восеньскую сяўбу азімага рапсу.
Праяўляе кіраўніцтва гаспадаркі клопат аб працаўніках падчас правядзення палявых работ: на палеткі дастаўляюцца гарачыя абеды, выдаюцца сняданкі, распрацаваны меры маральнага і матэрыяльнага заахвочання за якасную работу.
Усё разам дае ўпэўне­насць, што прадстаячую зімоўку грамадскі статак КСУП “Ніва-Барсукі” сустрэне з дастатковай колькасцю кармоў выдатнай якасці.
Людміла СЯМЁНАВА.
Фота Максіма МІКЕШЫНА.

Подписывайтесь на нас в социальных сетях: «Одноклассники» и «Одноклассники» (группа), «ВКонтакте», «Фейсбук», «Instagram», «Telegram», «Яндекс Дзен».