Ва ўсе часы праца хлебароба цанілася высока. У Кіраўскім раёне падчас жніва ўшаноўваюць лепшых у працоўным спаборніцтве. Растуць намалоты, павялічваюцца рэзультаты, прыбывае ў кагорце лідараў. Жніво-2025 набрала дынамічны тэмп!

У першыя выхадныя жніўня на палях не спыняўся гул камбайнаў, па дарогах бегалі грузавікі, напоўненыя свежанамалочаным збожжам, на поўнай магутнасці працавалі сушыльныя комплексы. У гэты гарачы ва ўсіх сэнсах час на палях раёна праводзяцца ўшанаванні лідараў уборачнай кампаніі.

Першыя месцы ў традыцыйным раённым працоўным спаборніцтве ўпэўнена займаюць аграрыі ААТ «Рассвет імя К.П.Арлоўскага». Малады хлебароб – пераемнік дынастыі – Сяргей Дрозд першым у раёне пераадолеў мяжу ў 1000 тон намалоту на камбайне айчыннай вытворчасці. Другім на збожжаўборачнай машыне вытворчасці ААТ «Гомсельмаш» тысячу тон намалаціў экіпаж у саставе рассветаўцаў Мікалая Белакурскага і маладога аграрыя Эдуарда Фаміна.

З гэтымі працоўнымі поспехамі добрасумленных камбайнераў у нядзелю павіншавалі старшыня райвыканкама Галіна Слабоднікава, член Савета Рэспублікі Нацыянальнага сходу Рэспублікі Беларусь Аляксандр Багель, актывісты прафсаюзнага руху. Збожжаўборачны экіпаж братоў Мікалая і Анатоля Драздоў другім у раёне намалаціў больш за 1000 тон збожжа. З працоўным дасягненнем іх павіншаваў старшыня райкама прафсаюза работнікаў АПК Віктар Ставер. Ён адзначыў, што такі рэзультат – гэта вынік працавітасці і майстэрства старанных хлебаробаў, якія кожны год займаюць лідзіруючыя пазіцыі.

Пакуль надвор’е спрыяе, працаўнікі палёў шчыруюць з асаблівай адказнасцю, змагаюцца літаральна за кожнае зярнятка. У нядзелю на полі паміж Кіраўскам і Мышкавічамі ішла ўборка азімага рапсу. Там жа адбылося ўшанаванне першых вадзіцеляў-двухтысячнікаў раёна – працаўнікоў «Рассвета» Аляксандра Белага і Сяргея Іваніцкага.

У гэты дзень адзначылі і працоўныя заслугі вадзіцеля з КСУП «Чырвоны баец» Юрыя Кітова, які першым у раёне перавёз больш за 1000 тон збожжа на грузавым аўтамабілі МАЗ грузападымальнасцю да 10 тон. Яго павіншавалі намеснік старшыні райвыканкама Таццяна Бяляўская, старшыня райкама прафсаюза работнікаў АПК Віктар Ставер і дырэктар сельгаспрадпрыемства Сяргей Лянкевіч. На грузавіку Юрыя Кітова зараз красуюцца новыя наклейкі – «1000 тон» і «Лідар працоўнага спаборніцтва».
Жніво працягваецца ў актыўным тэмпе, і мы чакаем новых поспехаў працаўнікоў хлебных ніў. Уклад кожнага з іх каштоўны!

Яўгенія БЯЛЬКО.
Фота аўтара і Алесі БАГДАНАВАЙ.