Работы завяршаюцца
Сёлетняя восень надзвычай прыгожая, падобная на зацягнутае лета. Яна прыемна радуе сваім цяплом і сонцам і дае магчымасць вяскоўцам спакойна ўбраць з палеткаў вырашчаны ўраджай.
У мінулую сераду, калі журналісты “раёнкі” наведаліся ў СВК “Добасна-агра”, ім пашчасціла трапіць ледзь не на “Дажынкі”: літаральна ў нас на вачах магутны “Лексіён”, якім кіраваў вопытны механізатар Міхаіл Галомзік, зжаў апошнія расліны кукурузы, і залацістыя зярняткі з бункера камбайна са строкатам пасыпаліся ў кузаў аўтамабіля.
“Уборачныя работы ў гаспадарцы завершаны”, — канстатаваў галоўны аграном Андрэй Голубеў.
У бягучым годзе “каралева палёў” займала плошчу ў 775 га, з якіх кукуруза на 625 га была ўбрана на сілас і на 150 га — на зерне.
Для таго, каб у зімова-стойлавы перыяд забяспечыць пагалоўе жывёлы кармамі, старанна папрацавалі механізатары на нарыхтоўцы сіласу: на круг кукурузныя палеткі давалі ў сярэднім па 290 ц/га, што дазволіла закласці амаль 13500 тон.
“Зерне кукурузы і сілас з гэтай культуры з’яўляюцца важнымі складальнікамі кармавога рацыёну жывёлы, — адзначыў у размове Андрэй Голубеў. — Без гэтага не абысціся. Таму ўсе ўдзельнікі корманарыхтоўчай кампаніі з адказнасцю ставіліся да выканання сваіх абавязкаў, бо разумелі важнасць забеспячэння сытнай зімоўкі грамад-скага статка”.
Парадавала ўраджайнасцю і кукуруза, якую ўбралі на зерне, з кожнага гектара намалацілі больш чым па 75 цэнтнераў. Зараз на сушыльнай гаспадарцы актыўнымі тэмпамі вядуцца работы па давядзенні зерня да неабходнай кандыцыі.
Дзякуючы стараннай працы аператараў у суткі дзве сушылкі паспяваюць перапрацаваць каля 60 тон кукурузы. На гэтых работах задзейнічаны Аляксандр Апенька, Рыгор Гушчын, Пётр Драздоў, Андрэй Хушану, Мікалай Мітраховіч і іншыя.
Увесь атрыманы ўраджай зерня кукурузы пакуль засыпаецца ў засекі. Частку яго ў далейшым плануюць выкарыстаць на выраб камбікармоў для ўласных патрэб, а лішкі — рэалізаваць.
У аптымальныя тэрміны правялі дабаснянцы і сяўбу азімых культур. Пад ураджай будучага года неабходна было засеяць 885 га, з якіх 100 га заняло трыцікале, 282 га — жыта, 300 га — пшаніца, крыху больш за 200 га вясной пойдзе на зялёны корм. Больш чым на 500 га ўжо праве-дзена хімапрацоўка азімых культур.
Сярод асноўных клопатаў зараз — давядзенне да ладу цукровых буракоў. З 57 га дабаснянцы накапалі прыкладна каля 1800 т пры сярэдняй ураджайнасці 316 ц/га. Шматлікі дэсант з ліку работнікаў гаспадаркі заняты зараз на пераборцы салодкіх каранёў. Справа ў тым, што перапрацоўчыя прадпрыемствы, якія закупляюць цукарнікі, за-кладваюць іх на захоўванне, таму патрабуюць каб сыравіна была без смецця.
Актыўна ўключыліся механізатары Уладзімір Казлоўскі, Алег Бычкоў і Міхаіл Грыцкевіч у не менш важную справу — вывазку арганічных угнаенняў пад ураджай будучага года. Бесперапынную іх работу на пагрузцы арганікі забяспечвае Аляксандр Есянецкі.
На ўборцы канюшыны і люцэрны для кармлення грамадскага статка шчыруюць Фёдар Петрусёў і Вячаслаў Хвясько.
Механізатары гаспадаркі дапамагаюць ААТ “Кіраўск-Лён” прэсаваць ільнотрасту.
Нягледзячы на тое, што асноўны фронт палявых работ завершаны, пакуль на палетках гаспадаркі не сціхае гул сельскагаспадарчай тэхнікі — работы на карысць ураджаю будучага года працягваюцца…
Людміла СЯМЁНАВА.