Галоўным пастаўшчыком агуркоў і памідораў на сталы кіраўчан і жыхароў раёна з’яўляецца цяплічны камбінат СВК “Рассвет” імя К.П.Арлоўскага. Радуюць рассветаўцы сваёй сакавітай і смачнай прадукцыяй спажыўцоў з іншых куткоў Беларусі, а таксама краін блізкага замежжа.

Як адзначыла ў размове з карэспандэнтам “раёнкі” в.а. галоўнага тэхнолага цяплічнага камбіната Марыя Бяляўская, сёлетні агуркова-памідорны сезон яны распачалі ў найбольш спрыяльныя тэрміны, таму ёсць на-дзея на атрыманне важкіх ураджаяў. У мінулым го-дзе рассветаўцы з кожнага квадратнага метра знялі па 52 кг агуркоў, гэта вельмі нядрэнны вынік. Памідоры таксама парадавалі ўраджаем: у новай цяпліцы атрымалі з квадратнага метра па 46 кг, святлокультуры далі па 50 кг, у старых цяпліцах — па 43,6 кг. Увогуле ж у па-раўнанні з 2014 г. прыбаўка з кожнага квадратнага метра склала па 1,8 кг — гэта дастаткова высокі паказчык.

Першую партыю насення памідораў пасеялі яшчэ ў пачатку снежня мінулага года, другую — праз два тыдні. Зараз расліны ўжо радуюць цяплічніц жоўценькімі кветачкамі. Цяпер работнікі камбіната шчыруюць над тым, каб расліны добра развіваліся.

Агульная плошча цяплічнай гаспадаркі — 10 га, з якіх 8 га займаюць памідоры, 2 га — агуркі. На 0,5 га плошчы размясціліся святлокультуры: тут ужо красуюцца першыя пакуль яшчэ невялічкія памідоркі. Справа ў тым, што працяглае выкарыстанне штучнага святла дазваляе раслінам хутчэй расці і развівацца, а таксама значна скарачае час да збору ўраджаю. Дарэчы, паступленне ў гандлёвую сетку першых чырвоных «сіньёраў» з цяплічнай гаспадаркі “Рассвета” плануецца ў пачатку сакавіка.

Агурочныя расліны поўнасцю расстаўлены на расадныя месцы — гэта ўжо іх пастаянная «прапіска»: напрыканцы лютага першы ўраджай зелянцоў адправіцца да сваіх пакупнікоў. Высадзілі ў цяпліцах і цыбулю на зеляніну.

Агуркі і памідоры растуць у падвясных латках. Сцяблы ўюцца па высокіх вяроўках, бо некаторыя гатункі памідораў дасягаюць 15 метраў. Каб сабраць ураджай, работнікам цяпліцы даводзіцца падымацца наверх на спецыяльных механічных пад’ёмніках. Да кожнай сцяблінкі падведзены трубачкі, праз якія расліны атрымліваюць комплекс неабходных угнаенняў і падкормак.

Як падкрэсліла в.а. галоўнага тэхнолага цяплічнага камбіната Марыя Бяляўская, сярод асноўных дасягненняў рассветаўцаў па вырошчванні агародніны закрытага грунту — поўнае адмаўленне ад выкарыстання хімічных прэпаратаў: нават са шкоднікамі тут “змагаюцца” біялагічнымі метадамі. Напрыклад, супраць кляшча-шкод-ніка прымяняецца другая разнавіднасць кляшчоў, якія знішчаюць “ворагаў” раслін.

Апыленне агуркоў і памідораў ажыццяўляецца з дапамогай “крылатай гвардыі” — чмялёў. Іх домікі з сем’ямі расстаўлены па ўсёй плошчы цяпліц. Дарэчы, гэтыя “паласатыя госці” прыехалі з Ізраіля, яшчэ плануецца закупіць каля 30 такіх домікаў, астатняя колькасць пры неабходнасці будзе набыта ў беларускіх пастаўшчыкоў.

Як адзначыла Марыя Бяляўская, галоўнае багацце цяплічнай гаспадаркі — гэта яе работнікі. Якімі б тэмпамі ні рухаліся сучасныя тэхналогіі, пры вырошчванні агародніны на першым месцы — ручная праца. Гэта значыць, што ад кожнага паасобку залежыць агульны вынік работы ўсяго камбіната. Кожная расліна патрабуе асабістага догляду, ніякія тэхналогіі з гэтым не справяцца, упэўнена спецыяліст.

Калектыў цяплічнага камбіната ўяўляе сабой сплаў вопыту і маладосці. Шмат агароднінаводаў прысвяцілі гэтай нялёгкай справе не адзін дзесятак гадоў, хапае і маладых кадраў, якія з задавальненнем вучацца тонкасцям агароднінаводства ў больш вопытных калег.

З адказнасцю да сваіх абавязкаў ставяцца аграном Таццяна Стэльмах, тэхнолаг Святлана Куцянкова, аграном па абароне раслін Аляксандр Сібіркоў. Дарэчы, Аляксандр прыйшоў на цяплічны камбінат маладым спецыялістам па размеркаванні, і праца тут “зацягнула”: пасля заканчэння тэрміну адпрацоўкі юнак вырашыў застацца жыць і працаваць у Мышкавічах, ажаніўся. Кіраўніцтва гаспадаркі выдзеліла маладой сям’і добраўпарадкаваны дом, пабудаваны з дапамогай дзяржаўных сродкаў.

Стараннасцю ў рабоце вызначаюцца агароднінаводы. Па выніках унутрыгаспадарчага спаборніцтва першае месца за атрыманую максімальную колькасць прадукцыі з аднаго квадратнага метра ў мінулым годзе атрымала брыгада ў саставе Наталлі Карпенка, Марыны Арлоўскай, Наталлі Брацянковай. Другімі сталі Таццяна Лешчык, Святлана Бяляўская і Таццяна Цішкова.

Ужо зусім хутка на паліцах гандлёвых кропак з’явіцца вітамінная прадукцыя рассветаўскіх агароднінаводаў, якая парадуе спажыўцоў сваімі добрымі смакавымі якасцямі і будзе экалагічна чыстай.

Людміла СЯМЁНАВА.

Фота Максіма МІКЕШЫНА.