У Магілёўскім дзяржаўным універсітэце імя А.А.Куляшова прайшоў адкрыты рэгіянальны конкурс-фестываль “Зоркі Прыдняпроўя”. Адразу чатыры дыпломы прывезлі з яго выхаванцы дзіцячай школы мастацтваў г.Кіраўска.

Удзел у конкурсе прынялі больш за 370 музыкантаў, вакалістаў, прадстаўнікоў творчай моладзі Магілёўскай, Віцебскай абласцей, Мінска. Гэтае культурнае мерапрыемства праводзілася ўпершыню, але плануецца, што “Зоркі Прыдняпроўя” стануць традыцыйнымі і будуць адной з візітных картак не толькі ўстановы адукацыі, але і культурнага жыцця рэгіёна.

Выдатна выступілі на конкурсе кіраўчане. Так, у намінацыі “Народна-інструментальнае выкананне” дыплом лаўрэата І ступені атрымаў  выканаўца на домры Ігар Урбановіч. Дыпломам лаўрэата ІІ ступені узнагароджаны выканаўца на гітары Вадзім Арцюхоў. Абодва юныя музыканты займаюцца ў педагога Ірыны Лебедзевай-Чыжонак. Выхаванка Аксаны Дзенісенка Віялета Халатава пакарыла журы сваімі вакальнымі дадзенымі, за што атрымала дыплом лаўрэата ІІІ ступені. Дыпломам ІІІ ступені таксама была адзначана цымбалістка Аляксандра Кузьміна (выкладчык — Кацярына Паляшчук).

Трэба адзначыць, што большасць вышэй названых выхаванцаў Кіраўскай ДШМ ужо станавіліся сёлета пераможцамі і прызёрамі і іншых конкурсаў. Ігар Урбановіч прымаў удзел у 2-м Міжнародным конкурсе-фестывалі мастацтваў “Музыкі святло-2017”, дзе стаў лаўрэатам І ступені. Ён жа, а таксама Вадзім Арцюхоў і Віялета Халатава сталі лаўрэатамі ІІ ступені Усерасійскага онлайн-конкурсу гуказапісу “Мелодынка”. Дарэчы, у гэтым жа конкурсе ў намінацыі “Інструментальны жанр” дыпломам лаўрэата І ступені адзначана трыо баяністаў пад кіраўніцтвам выкладчыка ДШМ Жанны Кудзінай.